Read Runyoro - rutooro Lev 26 Bible Online

Lev 26 - Runyoro - rutooro bible

Lev 26

¹“Mutalyekorra ebisisani eby'okuramya, mutalyekorra ekisisani ekisarwirwe rundi kwemereza ibaale lyona eriri omunsi yanyu, habwokuba ninyowe MUKAMA Ruhanga wanyu.

²Musemezeege ekiro kyange ekya Sabbato, kandi ekiikaro kyange ekirukwera, mukitemuga ekitiinisa: Ninyowe MUKAMA.

³“Obu mulikwata ebiragiro byange, n'ebigambo byange, mukakora ebibirukuragira,

⁴nubwo ndibanagira enjura omu kasumi ak'erukwetaagirwamu, ensi eryeeza ebyokulya, emiti ey'omunsi eyane ebijuma.

⁵Mulihuura okuhika ha inoga ly'emizaabbibbu, kandi inoga ly'emizaabbibbu, lirihika ha mulirrira ebyokulya mwigute kandi bibahikye ha isiga, mwikale omunsi yanyu n'obusinge.

⁶Ndibaha okugwagwana omunsi, mulibyama mugwijagire nkooku murukwenda, tihalibaho n'omu alibatiinisa; ebisoro kaita bantu ndibicwa omunsi yanyu, kandi terihikwaho bulemu.

⁷Mulibinga abanyanzigwa baanyu mubaise ebitara, abazigu bagwe omumaiso ganyu.

⁸Abataano bonka omuli inywe, balibinga abanyanzigwa omutwaro kandi abantu kikumi omuli inywe, balibinga abanyanzigwa kikumi, abanyanzigwa baanyu mulibaitisa ebitara bagwe omumaiso ganyu.

⁹Ndibataho omutima mbahe oruzaaro mbakanyise, kandi ngumye endagaano ei naragaine na inywe.

¹⁰Mulirya ebyokulya ebyayahwirwe ira, ebindi, mulibinaga nukwo mubone omwanya ogw'okuhunikamu ebihyaka.

¹¹Ndaikaraga hagati yanyu kandi tindibanaga.

¹²Ndaikaraga na inywe hoona hoona,

¹³ndaabaga Ruhanga wanyu ayabaihire omunsi Misiri, nukwo Abanyamisiri baleke kubafoora bairu baabu; nkabacwamu enkomo ezikaba zibabohere, nabasoboza kurubata mwesimbire.

¹⁴“Obu mulyanga kumpurra, mukalema kukwata ebiragiro byange byona, mulifubirwa.

¹⁵Obu mulyanga ebiragiro byange mukagaya ebigambo byange, mukanga kukwata ebiragiro byange kandi mukacwa endagaano yange,

¹⁶binu nibyo ndibakora: Ndibaleetera bwango ebintu ebirukutiinisa, nukwo akakonko n'omuswija ogutarukukira, gubagongonole. Ebi mulisiga, mulibisigira busa, habwokuba abanyanzigwa baanyu nubo balibirya.

¹⁷Ndibaitira eriiso, abanyanzigwa baanyu bababinge; abarukubanoba nubo balibalema, kandi muliiruka hataroho muntu arukubairukya.

¹⁸Obu mulyanga kumpurra kunu mmazire kubakora ebi ndibafubira kukiraho emirundi musanju, nimbatura ebibi byanyu.

¹⁹Ndibamaramu okwekuza kwanyu okunyakurumu obutahurra, iguru lyanyu ndirihindura lisisane ekyoma. Ensi yanyu ndigihindura esisane omulinga;

²⁰mulijwahira busa; habwokuba ensi terigira eki eribeereza, n'emiti teribaanira bijuma.

²¹“Nabwo, obu mulirema kunyorobera, mukanga kumpurra, ndyongera kubaleetera eby'okubasaaliza ebirukukiraho binu emirundi musanju, ebirukwingana ebibi byanyu.

²²Ndibataisurra enyamaiswa ez'omu kisaka zitaagataagule abaana baanyu, zihwerekereze ente zanyu, zibakeehye, emihanda yanyu efe, eburwe ow'okugirabamu.

²³“Obu mulikarora ebi byona, mukanga kungarukira, baitu mukongera kukora ebi ntarukwenda,

²⁴na nyowe ndikora ebi mutarukwenda, mbafubire okukiraho emirundi musanju habw'ebibi byanyu.

²⁵Ndibaleetera obulemu mpoole enzigu habw'okucwa endagaano yange, mulyesorooleza omu mbuga zanyu; ndibaleetera endwara kandi mbalekere abanyanzigwa baanyu.

²⁶Obu ndikeehya ebyokulya byanyu, abakazi ikumi baraabicumbaga omu nyungu emu, babibaleetere b'amazire kwongera kubirenga; mubirye baitu muleme kwiguta.

²⁷“Obu mulirora ebi, nabwo mukanga kumpurra, baitu mukongera kukora ebi ntarukwenda,

²⁸na nyowe ndikora ebi mutarukwenda, nyina ekiniga kingi, ndibafubira nyowe nyenka emirundi musanju habw'ebibi byanyu.

²⁹Mulirya batabani baanyu na bahara baanyu.

³⁰Ndiseesa ebiikaro byanyu eby'ekitiinisa ncwacwane amatambiro ganyu aga mucumiikirirraho obubbani, emitumbi yanyu, ndigigereekaniza ha mitumbi eyembandwa zanyu; ndibatamwa.

³¹Embuga zanyu ndiziseesa; ebiikaro byanyu ebirukwera, mbifoole bitongo, ebisorrokoko byanyu ebirukuboya kurungi tindibiikiriza.

³²Ensi yanyu ndigifoora ihamba, abanyanzigwa baanyu abanyakugiikaramu nukwo batiine.

³³Ndibararangya omu mahanga, ndibairukya nkwasire ekitara; ensi efooke ihamba, embuga zanyu zibe bitongo.

³⁴“Akasumi koona ensi aka erimara eri ihamba, inywe mukyali omunsi ey'abanyanzigwa baanyu, eriba n'obusinge, egonze Sabbato zaayo.

³⁵Akasumi koona aka erimara eri ihamba, eritunga ekihuumuro eki etakatungaga ha Sabbato zanyu, obu mukaba mukyagirumu.

³⁶Kandi abo abasigaireho omuli inywe, ndibaha emitima erukucwekwa enkizi omunsi ez'abanyanzigwa baabu; obu baraahurraga ekikoora ekirukuhuuhurwa omuyaga, barairukaga nk'abarukwiruka omuntu anyakukwasire ekitara, bagwe kandi kunu busaho arukubairukya.

³⁷“Balihuumirana nk'abarukwiruka omuntu akwasire empirima kandi kunu busaho arukubairukya; abanyanzigwa baanyu timulisobora kubeemera.

³⁸Mulihwerekererra omu mahanga, ensi ey'abanyanzigwa baanyu ebamire.

³⁹Kandi abo abasigaireho omuli inywe, balihwerekererra omunsi y'abanyanzigwa baanyu, habw'obubi bwabo; kandi balihwerekerra nka baisenkurubo oku baahwerekeriire habw'obubi bwabo.

⁴⁰“Obu balyaatura ebibi byabo n'eby'abaisenkurubo baakozire nibangobeza, kandi ebi bakozire nibakora ebintu ebi ntarukwenda,

⁴¹ebi nibyo nasigikiireho kubakora kubi, nabaleeta omunsi ey'abanyanzigwa baabo. Kakuba omwoyo gwabo ogugumangaine gworoba, bakazira ebibi byabo,

⁴²nubwo ndiijuka endagaano yange naragaine na Yakobbo, ei naragaine na Isaaka kandi ei naragaine n'Abburahamu. Ndiijuka ensi egi,

⁴³abantu bamazire kugirugamu, eyegondeze omu Sabbato zaayo. Obu eriba esigaire kitongo, balyeeteera habw'ebibi byabo, habwokuba bakanga ebigambo byange, baagaya ebiragiro byange.

⁴⁴Baitu noobu kiraaba kiri kiti, obu baliba bakyali omunsi ey'abanyanzigwa baabo, tindibeehooga kandi tindukwija kubanobera kimu, nkabahwerekereza; habwokuba ninyowe MUKAMA Ruhanga wanyu.

⁴⁵Kyonka ninyija kubaijuka habw'endagaano ei naragaine na baisenkurubo, aba naihire omunsi Misiri, abanyamahanga nibarora, nukwo mbe Ruhanga wabo, ninyowe MUKAMA.”

⁴⁶Ebi nibyo bigambo Ruhanga ebi yaragiire, n'ebiragiro ebi yateeriireho abantu ba Isirairi ebiyaragiire Musa ha rusozi Sinai.