Read Runyoro - rutooro Lev 27 Bible Online

Lev 27 - Runyoro - rutooro bible

Lev 27

¹MUKAMA akagambira Musa ati:

²“Gambira abantu ba Isirairi ngu: Binu nibyo ebiragiro ebinyakutairweho habwabo. Omuntu kakuba ahebwayo hali MUKAMA habw'okuhikiriza endagaano eyakozirwe; omuntu ogu aralekerwaga hamazire kuhabwayo omuhendo gunu ogwa sente;

³kusigikira ha rulengo orwatairweho nkokuziragirwa: Omusaija ow'emyaka abiri kuhika ha nkaaga ey'obukuru haraheebwayoga ebicweeka bya feeza makumi ataano.

⁴Kakuba omuntu ogu aba ali mukazi, haraheebwayoga ebicweeka bya feeza makumi asatu.

⁵Kakuba aba ali mwana mwoojo ow'emyaka etaano kuhika ha abiri ey'obukuru, haraheebwayoga bicweeka bya feeza makumi abiri; kandi omwisiki ow'emyaka nkeegi, uwe araheererwaga bicweeka bya feeza ikumi.

⁶Kandi obwaraabaga atarukukira ha myaka etaano, obwaraabaga mwoojo haraahebwayoga ebicweeka bya feeza bitaano, kandi obwaraabaga mwisiki bibege bicweeka bya feeza bisatu.

⁷Omuntu ogu kakuba aba ali w'emyaka nkaaga n'okukiraho, obwaraabaga ali musaija araaherwaga bicweeka bya feeza ikumi na bitaano; kandi obwaraabaga mukazi bibege bicweeka bya feeza ikumi.

⁸Omuntu kakuba aba munaku muno atarukusobora kusasura muhendo ogu omubaliriire, ayereete omumaiso ga nyakatagara, nyakatagara nuwe amubalirre naarorra ha bintu ebi anyina.

⁹“Obu kiraaba kiri kisoro, abantu eki bahongera MUKAMA, kyona hali ebi omuntu eki ahongera MUKAMA, kiba kirukwera.

¹⁰Atalireeta ekintu ekindi omu kiikaro kyakyo rundi kukihingisaamu ekindi, akata ekirungi omu kiikaro ky'ekibi, rundi ekibi omu kiikaro ky'ekirungi; kakuba ekisoro akihingisamu ekindi, obu, eki ekyalesire, na kiri ekirukuhingisibwa, byombi nibyera.

¹¹Kakuba kibaire kisoro ekirukuzirwa ekitasobora kuhongerwa MUKAMA, ekisoro eki omuntu akitwarre nyakatagara.

¹²Nyakatagara eki araacwamu, nikyo kiikirizibwe.

¹³Kihonga kisoro eki, kakuba agonza kukicungura ha muhendo gwakyo ogwakibaliriirwe, ayongereho kimu kya kataano kyagwo.

¹⁴“Kakuba omuntu ahayo enju ye kuba nju erukwera ya MUKAMA, nyakatagara nuwe araabibalirraga, obu eraaba eri nungi rundi mbi, nyakatagara eki araacwamuga nukwo kiikale.

¹⁵Kihayo nju, kakuba agonza kugicungura, ayongereho kimu kya ikumi ekya sente ezaagibaliriirwe, nukwo emugarukire.

¹⁶“Omuntu kakuba ahongera MUKAMA, ekicweka eky'itaka lye eri yagwetiirwe, omuhendo gubaliriirwe ha bwingi bw'embibo ezikusobora kusigwamu; endengo ey'embibo eya Sairi, ebalirwe ha rulengo rwa ebicweeka bya feeza ikumi habwa buli kiloguraamu makumi abiri.

¹⁷Kakuba ahonga omusiri gwe okurugirra ha mwaka ogw'okujaguza, gusasurwe omuhendo ogu aramwiire;

¹⁸baitu kakuba aguhonga Okujaguza kumazire kuhwa nyakatagara omuhendo gwa sente zagwo, agubalirre naarorra ha myaka enyakusigaire okuhika ha mwaka gw'okujaguza ogw'omumaiso, nukwo omuhendo ogubaliriirwe, gwihwe hali guli oguramwirwe.

¹⁹Ogu anyakuhongere omusiri gwe kakuba ayenda kugucungura, ha muhendo ogubaliriirwe, ayongereho kimu kya kataano, nubwo gumugarukire.

²⁰Baitu obu araaba atarukwenda kugucungura, rundi obu araaba agugulize omuntu ondi, buli tikikyasoboka kugucungura.

²¹Baitu omu mwaka ogw'okujaguza, kigugura obu gulimurugaho, guliba kintu kya MUKAMA ekirukwera; omusiri ogu, habw'okusoroorwa, nyakatagara nuwe agutungege.

²²Omuntu kakuba ahongera MUKAMA itaka eri aguzire, litali eri yagwetiirwe,

²³nyakatagara abalirre omuhendo gwalyo okuhika ha mwaka gw'okujaguza, omuntu ogu ayaguguzire agusasule ha kiro eki kyonyini gube kintu kya MUKAMA ekirukwera.

²⁴Omu mwaka ogw'okujaguza, itaka nubwo lirigarukira oli ayaligulize, nuwe mukama w'itaka ayaligwetiirwe.

²⁵Buli muhendo gulirengerwa ha rulengo oruragirwa.

²⁶“Baitu ekisoro kyona ekizigaijo, habwokuba kizigaijo, eki kya MUKAMA, hatalibaho n'omu akihonga; noobu eriba nte rundi ntaama, egi ya MUKAMA.

²⁷Ekisoro eki kakuba kiba ekirukuzirwa, ayongere akigule ha muhendo ogu obaliriire, agwongereho kimu kya kataano kyagwo; rundi kakuba kitacungurwa, kiguzibwe ha muhendo ogubaliriirwe.

²⁸“Busaho kintu na kimu ekyasoroirwe kyahongerwa MUKAMA ekisemeriire kuguzibwa rundi kucungurwa, abe muntu, kibe kisoro rundi itaka eryagwesirwe; ekintu kyona ekihairwe MUKAMA, kiba kintu ekirukukirra kimu kwera.

²⁹Busaho muntu ayayeziibwe ati, asemeriire kucungurwa; ogu aitwege.

³⁰“Ekicweka kyona ekya ikumi eky'itaka rundi eky'ebyokulya ebinyakwezire ha itaka eri, rundi eky'ebijuma by'emiti, kiba kya MUKAMA, kiba kintu kya MUKAMA ekirukwera.

³¹Kakuba omuntu ayenda kwesigaliza kimu kya ikumi, asasulege omuhendo gwakyo ogubaliriirwe, ayongereho kimu kya kataano kyagwo.

³²Kimu kya ikumi eky'ente, entaama rundi embuzi, buli kisoro omuliisa eki ataho omwigo gwe obu aba naabara, kiba kisoro kya MUKAMA ekirukwera.

³³Omuntu atalyejwahya kukaguza obu kiraaba kiri kirungi rundi kibi, kandi tasemeriire kukihingamu ekindi; kakuba akihinga, byombi, ekyahingire, na kiri eki ahingisize, byona biriba bintu birukwera; tikisemeriire kucungurwa.”

³⁴Binu nibyo biragiro MUKAMA ebi yaragiire Musa ha rusozi Sinai abimanyise abantu ba Isirairi.