Read Runyoro - rutooro Lev 3 Bible Online

Lev 3 - Runyoro - rutooro bible

Lev 3

¹Kakuba omuntu ahonga ekyonzira habw'okusaba obusinge, kakuba ahonga ente enimi rundi ezigija, agihongere MUKAMA etanyina kamogo.

²Ekihongwa kye, akiteho omukono gwe ha mutwe gwakyo kandi akiitire ha mulyango ogw'Eheema ey'okutangatanganiramu; banyakatagara batabani ba Arooni, esagama yakyo bagimiisire itambiro okulyehinguliriza.

³Ha kihongwa eki eky'okuhebwayo habw'okusaba obusinge, ekinyakwokibwe habwa MUKAMA, aiheho ebisajwa ebinyakuswekere ebyenda n'ebya ha byenda

⁴Ensigo ibiri n'ebisajwa byazo, n'ebisajwa ebya ha mugongo, n'obune obw'empagara, abitwarre hamu n'ensigo, ebi abihongere MUKAMA.

⁵Hanyuma ekihongwa eki, batabani ba Arooni bakyokeze ha itambiro, ha ruguru y'ekihongwa ekyokeze, ekinyakuli ha murro; eki nikyo kihongwa ekyokeze ekirukuboyera kurungi MUKAMA.

⁶Ekihongwa eki ahongiire MUKAMA habw'okusaba obusinge, kakuba eba entaama rundi emburabuzi, mpaya rundi buguma, ahonge etanyina kamogo

⁷Kakuba ahonga omwana gw'entaama nugwo gube kihongwa kye, aguhongere omumaiso ga MUKAMA,

⁸ate omukono gwe ha mutwe gwagwo kandi agwitire ha mulyango ogw'Eheema ey'okutangatanganiramu; batabani ba Arooni bamisiirre itambiro esagama yakyo kulyehinguliriza.

⁹Ha kihongwa eki eky'okusaba obusinge, ekinyakwokiibwe kyahongerwa MUKAMA, aiheho ebisajwa abihonge, omukira gwona ogw'ebisajwa agutwarre hamu n'omugongo, ebisajwa ebinyakuli ha byenda,

¹⁰ensigo ibiri n'ebisajwa ebinyakuziroho, n'ebya ha mugongo abitwarre hamu n'obune n'ensigo.

¹¹Ebi byona nyakatagara abyokeze ha itambiro, bibe kihongwa ekyokeze ekinyakuhongiirwe MUKAMA.

¹²Ekihongwa kye kakuba eba mbuzi, agihonge omumaiso ga MUKAMA,

¹³agiitire omumaiso g'Eheema ey'okutangatanganiramu, batabani ba Arooni, esagama yayo bagimiisire itambiro balyehingulirize.

¹⁴Hanyuma ebisajwa ebinyakuli ha byenda,

¹⁵ensigo ibiri n'ebisajwa byazo ebya ha mugongo, abihongere MUKAMA,

¹⁶bibe kyokulya ekyokeze, kirugwemu ekisorokoko ekirukuboya kurungi.

¹⁷Hoona ha muraikaraga, eki kiraabaga kiragiro kyanyu eky'ebiro byona, ekirukubatanga kulya ebisajwa rundi enjuba.