Read Runyoro - rutooro Lev 4 Bible Online

Lev 4 - Runyoro - rutooro bible

Lev 4

¹MUKAMA akagambira Musa ati:

²Gambira abaana ba Isirairi oti: Kakuba omuntu akora ekibi atagenderiire, ekimu ha bintu MUKAMA ebi yatangire, akakora ekimu hali byo,

³anyakusobeze, kakuba aba ali nyakatagara ayaseesirweho amagita, akaleetera ati abantu omusango, ahongere MUKAMA enimi ento etanyina kamogo habw'ekibi eki akozire.

⁴Enimi egi, agireete ha mulyango ogw'Eheema ey'okutangatanganiramu, omumaiso ga MUKAMA, ate omukono gwe ha mutwe gwayo, agiitire omumaiso ga MUKAMA.

⁵Nyakatagara ayaseesirweho amagita, akwate ekicweka ky'esagama yayo, agitwale omu Heema ey'okutangatanganiramu;

⁶aibike orukumo rwe omu sagama egi, agimiise emirundi musanju omumaiso ga MUKAMA, ali aheeru y'enyigamo ey'Ekiikaro Ekirukwera.

⁷Nyakatagara asiige esagama ha mahembe g'itambiro ericumiikirirwaho obubbani oburukuboya kurungi, itambiro eri niryo erinyakuli omu Heema ey'okutangatanganiramu, esagama y'enimi enyakusigaireho, agiseesere ekicweka ekya hansi eky'itambiro eryokezibwaho ebihongwa, erinyakuli ha mulyango ogw'Eheema ey'okutangatanganiramu.

⁸Ebisajwa byona eby'enimi ey'ekihongwa eky'okuganyiza ebibi, abigiihemu, ebisajwa ebirukusweka na byona ebinyakuli ha byenda,

⁹ensigo ibiri n'ebisajwa byazo, n'eby'omu mugongo, n'obune obw'empagara abitwale hamu n'ensigo

¹⁰nyakatagara abyokeze ha itambiro eryokezibwaho ebihongwa (nk'ebyakubaire biihirwe omu nimi ey'ekyonzira habw'okusaba obusinge).

¹¹Baitu orususu n'enyama yayo yoona, omutwe, ebirenge, ebyenda n'efa yayo,

¹²enimi yoona agiihe omu rukande, agitwale omu kiikaro ekirungi nambere baseesa iju, agihembere omurro agyokye.

¹³Kakuba abantu ba Isirairi bakora ekibi batagenderiire, bakakora ekimu ha bintu MUKAMA ebi yatangire, bakacwa omusango, ekintu bakakisereka abantu abandi bakalema kukimanya;

¹⁴ekibi eki, ekibakozire obu kirimanywa, abantu abo bahonge enimi ento ey'okubaganyiza ekibi eki, bagirete omumaiso ag'Eheema ey'okutangatanganiramu;

¹⁵abakuru b'abantu bate emikono yabo ha mutwe gw'enimi, egi bagiitire omumaiso ga MUKAMA.

¹⁶Nyakatagara ayaseesirweho amagita, atwale ekicweka ky'esagama yayo omu Heema ey'okutangatanganiramu,

¹⁷aibike orukumo rwe omu sagama egi, agimiise emirundi musanju omumaiso ga MUKAMA, ali aheeru y'enyigamo ey'Ekiikaro Ekirukwera.

¹⁸Asiige esagama ha mahembe g'itambiro erinyakuli omumaiso g'Eheema ey'okutangatanganiramu, omumaiso ga MUKAMA, enyakusigaireho, agiseesire ekicweka kya hansi eky'itambiro erinyakwokezibwaho ebihongwa, erinyakuli ha mulyango ogw'Eheema ey'okutangatanganiramu.

¹⁹Ebisajwa byayo byona abiihemu, abyokeze ha itambiro.

²⁰Enimi nukwo agikole ati; nkooku yakozire enimi ey'okuganyiza ekibi eky'abanyakatagara, n'enu nukwo agikole ati; nyakatagara asabire abantu nukwo baganyirwe.

²¹Enimi agiihe omu rukande agitwale agyokye nkooku yayokeze ey'okubanza.

²²Omulemi obu alikora ekibi atagenderiire, akakora ekimu ha bintu MUKAMA Ruhanga we ebi yatangire, akacwa omusango,

²³kakuba bamumanyisa ekibi eki yakozire, aleete embuzi empaya, etanyina kamogo,

²⁴ate emikono ye ha mutwe gwayo, agiitire omumaiso ga MUKAMA omu kiikaro nambere baitira ebihongwa eby'okwokya, ebe kihongwa kye; eki nikyo kihongwa eky'okuganyiza ekibi.

²⁵Aho nyakatagara atwale ekicweka ky'esagama, aibikemu orukumo rwe, agisiige ha mahembe g'itambiro eryokezibwaho ebihongwa, enyakusigaireho, agiseesire ekicweka ekya hansi eky'itambiro eryokezibwaho ebihongwa.

²⁶Ebisajwa byayo byona abyokeze ha itambiro nkooku yayokeze ebisajwa eby'ekyonzira ekiheebwayo habw'okusaba obusinge; amusabire kuganyirwa ekibi kye nukwo aganyirwe.

²⁷Kakuba omu ha bantu kwonka akora ekibi atagenderiire, akakora ekimu ha bintu MUKAMA ebi yatangire,

²⁸abantu obu bamumanyisa ekibi eki yakozire, omuntu ogu aleete embuzi ebuguma etanyina kamogo.

²⁹Ate emikono ye ha mutwe gwayo, agiitire omu kiikaro nambere haitirwa ebihongwa eby'okwokya, ebe kihongwa kye eky'ekibi eki yakozire.

³⁰Nyakatagara atwale ekicweka eky'esagama yayo, aibikemu orukumo, agisiige ha mahembe ag'itambiro ery'okwokezaaho ebihongwa, enyakusigaireho, agiseesire ekicweka ekya hansi eky'itambiro.

³¹Embuzi agiihemu ebisajwa byayo byona nkooku yaihire ebisajwa omu mbuzi ey'ekihongwa habw'obusinge, abyokeze ha itambiro, harugemu ekisorokoko ekirukuboyera kurungi MUKAMA, asabire omuntu ogu kuganyirwa, nukwo aganyirwe.

³²Kakuba aleeta omwana gw'entaama nikyo kibe kihongwa eky'okumuganyiza ekibi,

³³aleete eruusi etanyina kamogo, ate emikono ye ha mutwe gw'ekihongwa eki agiitire omu kiikaro nambere baitira ebihongwa eby'okwokya, nukwo emuganyize ekibi.

³⁴Nyakatagara atwale ekicweka ky'esagama ey'ekihongwa eky'okuganyiza ekibi, aibikemu orukumo, agisiige ha mahembe ag'itambiro eryokezibwaho ebihongwa, enyakusigaireho, agiseeserre ekicweka ekya hansi eky'itambiro.

³⁵Agiihemu ebisajwa byayo byona, nkooku yabiihire omu kyonzira ekiheebwayo habw'obusinge, abyokeze ha itambiro, abigereke ha bihongwa ebindi ebyokebwa ha murro bikahongerwa MUKAMA, asabire omuntu ogu habw'ekibi kye eki yakozire nukwo aganyirwe.