Read Runyoro - rutooro Lev 5 Bible Online

Lev 5 - Runyoro - rutooro bible

Lev 5

¹Kakuba omuntu arahizibwa kuha obwakaiso ha kintu eki arozire rundi eki ahuliire, akalema kubaza amazima nkooku akimanyire, omuntu ogu aba asiisire, asemeriire kujunaanwa.

²Rundi kakuba omuntu akwata ha kintu ekirukuzirwa nk'omutumbi gw'ekisoro ekirukuzirwa, ogw'ente rundi ogw'ebihuka atakimanyire, omuntu ogu asiisikara kandi ajunaanwa.

³Rundi oburofu obunyakurugire omu muntu, rundi oburofu obwa buli mulingo obusobora kusiisa omuntu, akabukwata atamanyire obu alikimanya aliba naasingwa omusango.

⁴Rundi kakuba omuntu arahukiriza kurahira kukora ekintu ekirungi rundi ekibi, rundi kurahukiriza kurahira endahiro endi yoona abantu ei barahira akarahira atamanyire, obu akimanya, omu bintu ebi byona, asingwa omusango.

⁵Omu bintu ebi byona, omuntu obu amanya omusango nkooku gumusingire, aikirize ekibi eki akozire,

⁶aleetere MUKAMA ekihongwa eky'okumuganyiza ekibi eki, kinu nikyo ekimu ha bihongwa ebi asemeriire kuleeta, aihe omu igana ebuguma y'entaama rundi y'emburabuzi, nukwo nyakatagara amusabire ekiganyiro eky'ekibi kye.

⁷Kakuba omuntu ogu aba atarukusobora kutunga entaama, ekihongwa eki araaleetera MUKAMA kumuganyiza ekibi, nugo amaiba amato abiri rundi enduka ibiri, erimu libe kyonzira eky'okumuganyiza ekibi, erindi kihongwa eky'okwokya.

⁸Ebintu ebi abireetere nyakatagara, nuwe abanze kuhonga ekimu hali ebi eky'okuganyiza ekibi; asale omutwe gwalyo baitu aleke kugwihira kimu ha bikya,

⁹ha sagama ey'ekihongwa eky'okuganyiza ekibi, aiheho nke agimiisire orubaju rumu orw'itambiro, enyakusigaireho ekenenukire ekicweka ekya hansi eky'itambiro, eki nikyo kihongwa eky'okuganyiza ekibi.

¹⁰Hanyuma nyakatagara ahonge erya kabiri, libe kihongwa ekyokwokya nkooku kikorwa bwona; nyakatagara amusabire ekiganyiro habw'ekibi eki yakozire nukwo aganyirwe.

¹¹Baitu obu araaba atarukusobora kuleeta amaiba amato abiri kuba kihongwa kye habw'ekibi eki yakozire aleete kimu kya ikumi eky'ensaano enyakuniinuukire erukwijura omu lita asatu na mukaaga, nikyo kibe kihongwa nyakatagara atalikitaho amagita kandi atalikitaho emyamirro, habwokuba kihongwa ky'okuganyiza ekibi.

¹²Ensaano egi agireetere nyakatagara, nyakatagara aiheho orucumite arwokeze ha itambiro, agigereke ha bihongwa ebindi ebyokebwa ha murro bikahongerwa MUKAMA, ebe kiijukyo ky'ekihongwa kye eki; eki nikyo kihongwa eky'okuganyiza ekibi.

¹³Nyakatagara nubwo araasabiraga omuntu anyakukozire ekibi ha bintu ebi ebigambirweho, omuntu ogu nukwo aganyirwe. Ensaano enyakusigaireho ebe ya nyakatagara, nkooku kikorwa ha bihongwa eby'ebyokulya.

¹⁴MUKAMA akagambira Musa ati:

¹⁵“Kakuba omuntu asobya akasiisa okwikiriza, akasiisa atagenderiire ekimu ha bintu ebirukwera ebya MUKAMA, ekihongwa eki alireetera MUKAMA kumuganyiza ekibi, aihe omu igana empaya y'entaama etanyina kamogo, ei murukurora neehikya efeeza erukuhikya kiloguraamu abiri na ibiri n'ekicweka, nk'ezi, eziheebwayo Omukiikaro Ekirukwera eki nikyo kihongwa eky'okuganyiza ekibi.

¹⁶Alehe eki yakozire yasiisa ekintu ekirukwera ayongere omuhendo ogurukuhikya kimu kya kataano eky'omuhendo gwakyo, nyakatagara amusabire ekiganyiro naatamba empaya y'entaama, ey'okuganyiza ekibi, omuntu ogu nukwo aganyirwe.

¹⁷“Kakuba omuntu asiisa akakora ekimu ha bintu MUKAMA ebi yatangire, noobu araaba atakimanyire, nabwo omusango agucwire kandi aikirize eki akozire.

¹⁸Aihe omu igana empaya y'entaama ei murukurora neehikya omuhendo ogw'okuleha ekibi ekikozirwe, agireetere nyakatagara, nyakatagara amusabire habw'ekibi eki akozire atagenderiire; omuntu ogu nukwo aganyirwe.

¹⁹Eki nikyo kihongwa eky'okuganyiza ekibi, habwokuba akasobeza MUKAMA atamanyire.”