Read Runyoro - rutooro Lev 7 Bible Online

Lev 7 - Runyoro - rutooro bible

Lev 7

¹“‘Kinu nikyo kiragiro eky'ekihongwa eky'okwihaho omusango. Ekihongwa kinu, kihongwa ekirukwera mali.

²Omu kiikaro ekinyakwitirwamu ekisoro eky'ekihongwa eky'okwokya nuho haitirwege n'ekisoro eky'ekihongwa eky'okwihisaaho omusango, esagama yakyo emiisirwe itambiro lyona kulyehinguliriza.

³Ebisajwa byakyo byona abihonge, ebisajwa ebinyakusweka ebyenda,

⁴ensigo zombi n'ebisajwa byazo eby'omu mugongo, obune obw'empagara abitwarre hamu n'ensigo;

⁵nyakatagara abyokeze ha itambiro bibe kihongwa ekyokiibwe ha murro kyahongerwa MUKAMA; eki nikyo kihongwa eky'okwihisaaho omusango.

⁶Buli nyakatagara wena omusaija, nuwe arukwikirizibwa kukiryaho; kiriirwe Omukiikaro Ekirukwera; habwokuba kihongwa ekirukwera mali.

⁷Ekihongwa eky'okwihisaaho omusango, nikisisana n'ekihongwa eky'okuganyiza ebibi, ekiragiro kyabyo, kiri kimu kyonka, nyakatagara arukukihonga kandi akasabira abantu nuwe akitwale.

⁸Kandi nyakatagara anyakuhonga ekihongwa eky'okwokya eky'omuntu wena, atwalege orususu orw'ekihongwa eki ahongere,

⁹kandi ekihongwa kyona eky'ebyokulya ekinyakutalikirwe ha kyoto, na byona ebinyakukarangiirwe mu safuliya rundi ha rusaniya, bitwarwege ogu abihongere.

¹⁰Buli kihongwa kyona eky'ebyokulya, ebitairwemu rundi ebitatairwemu magita, bibe bya batabani ba Arooni, babibagane nibainganaingananiza.

¹¹“‘Kinu nikyo kiragiro eky'ebihongwa habw'okusaba obusinge omuntu ebi asobora kuhongera MUKAMA.

¹²Ekihongwa eki kakuba akihonga naagenderra kusiima, akihonge na keeki ezitatumbisiibwe, ezinyakutugisiibwe amagita, na bisikwiti ezitatumbisiibwe, ezinyakusiigirwe amagita, na keeki ez'ensaano enyakuniinuukire zitugiirwemu amagita.

¹³Obu araabaga naaleeta ekyonzira kye eky'okusiima habw'obusinge obu atungire, atehoga obucweka bw'omugaati ogutumbisiibwe.

¹⁴Akacweka kanu ak'omugaati ogu akahongere MUKAMA; ako karaabaga ka nyakatagara araamiisaga esagama ey'ekihongwa eky'okusaba obusinge.

¹⁵Enyama ey'ekyonzira ekihongerwe omuntu habw'okusiima obusinge obu atungire, eriibwege ha kiro eki kyonyini, omuntu eki ahongiireho; kihonga ataliraazaaho enyama egi okuhika nyenkya.

¹⁶Omuntu obu araabaga ahongere ekihongwa eky'okuhikiriza okweraga kwe rundi ekihongwa eky'okwegondeza, kiriibwege ha kiro eki kyonyini, omuntu eki ahongiireho, kandi ekiraabaga kisigaireho, kiriibwege ha kiro ekirukuhonderaho,

¹⁷ekicweka ekiraabaga kisigaireho kuhika ha kiro ekya kasatu, bakyokye n'omurro kisiiriire.

¹⁸Baitu enyama ey'ekyonzira ekinyakuheebwayo habw'obusinge, kakuba eriibwa ha kiro ekya kasatu, kireeta kihongwa taasiimwege kandi ekihongwa tikyamubalirwege kiriba kiri kinugwa, weena anyakukiryaaho ayereetera omusango.

¹⁹“‘Enyama yoona enyakuhikirweho ekintu ekitasemeriire, etaliriibwa; eyokebwege n'omurro esiiriire. Abantu boona abarungi bonka nubo barukusobora kugiryaho.

²⁰Baitu omuntu anyakulya ha nyama ey'ekyonzira kya MUKAMA ekinyakuheebwayo habw'okusaba obusinge atali murungi, asendwe.

²¹Kandi kakuba omuntu akwata ha kintu eky'omuziro, ekintu eki kakuba aba ali muntu rundi kisoro, rundi ekintu ekindi kyona ekirukuzirwa, hanyuma akalya enyama ey'ekyonzira ekihongiirwe MUKAMA ekinyakuheebwayo habw'obusinge, omuntu ogu na uwe, asendwege.’ ”

²²MUKAMA akagambira Musa ati:

²³“Gambira abantu ba Isirairi oti: ‘Mutalirya ebisajwa by'ente, entaama rundi eby'embuzi.

²⁴Ebisajwa eby'ekisoro ekinyakweferiire rundi ekinyakwisirwe enyamaiswa, bikozesibwege emirimo endi, baitu mutalikisura mukabirya.

²⁵Baitu omuntu anyakulya ebisajwa eby'ekisoro eby'ekihongwa kya MUKAMA ekinyakwokiibwe ha murro, asendwe.

²⁶Kandi ekindi, mutalirya ha sagama y'ekintu na kimu, rundi ey'ekinyonyi rundi ey'ebisoro ebitungwa.

²⁷Wena anyakulya esagama, asendwe.’ ”

²⁸MUKAMA yagambira Musa ati:

²⁹“Gambira abantu ba Isirairi oti: ‘Ogu anyakuha MUKAMA ekihongwa habw'okusaba obusinge, ekihongwa kye akyeretere wenka hali MUKAMA; ekicweka kyakyo akiheyo nk'ekisembo ekitali kya butoosa,

³⁰ekihongwa kye eky'okwokeza MUKAMA ha murro, akyereetere wenka hali MUKAMA; ebisajwa abireete hamu n'embanda, nukwo embanda imukaimukibwe, eki nikyo kihongwa eky'okwimukyaimukiza MUKAMA.

³¹Ebisajwa ebi, nyakatagara abyokeze ha itambiro, baitu embanda eriibwe Arooni n'abatabani.

³²Ekirumbu eky'obulyo, akihe nyakatagara, nugwo mugabo ogunyakurugire ha kihongwa kye habw'okusaba obusinge,

³³Omu batabani ba Arooni, ogu anyakuhonga esagama, n'ebisajwa by'ebihongwa eby'okusaba obusinge, omugabo gwe guraabaga ekirumbu ky'obulyo.

³⁴Embanda ei baimukyaimukiza hamu n'ekirumbu eki bampongera, nkabiihaho abaana ba Isirairi, birugege ha bihongwa eby'okwokya, nabiha Arooni nyakatagara n'abatabani, gube mugabo gwabo ogw'oruteekerro ogu baraihaga ha bantu ba Isirairi.’ ”

³⁵Ogu nugwo mugabo gwa Arooni n'abatabani, ogunyakuruga ha bihongwa eby'okwokeza MUKAMA, ogu baahairwe okuruga ha kiro eki baajwekiirweho omulimo ogw'obunyakatagara; okuruga ha kiro Arooni n'abatabani eki baaterirweho.

³⁶MUKAMA akaragira abantu ba Isirairi, omugabo ogu baguhege Arooni n'abatabani, ha kiro eki baaseesirweho amagita; gwikale guli mugabo gwabo ogw'oruteekerro, ebiro byaabu byoona.

³⁷Kinu nikyo kiragiro eky'ebihongwa eby'okwokeza MUKAMA: ebihongwa eby'ebyokulya, ebihongwa eby'okusaba kuganyirwa ekibi, eby'okwihwaho omusango, eby'okwezibwa na habw'okusaba obusinge,

³⁸ebi nibyo MUKAMA yaragiire Musa ali ha rusozi Sinai, ha kiro eki yaragiriireho abantu ba Isirairi bamuleetere ebihongwa byabo obu bakaba bali mwirungu lya Sinai.