Read Runyoro - rutooro Lev 9 Bible Online

Lev 9 - Runyoro - rutooro bible

Lev 9

¹Ha kiro ekya munaana, Musa yayeta Arooni, batabani ba Arooni n'abakuru ba Isirairi;

²yagambira Arooni ati: “Kwata enimi ento ebe kihongwa eky'okuganyiza ekibi, n'empaya y'entaama, ebe kihongwa eky'okwokya, byombi ebitanyina kamogo, obihongere MUKAMA.

³Kandi ogambire abakuru ba Isirairi oti: ‘Mutwale empaya ey'emburabuzi, ebe kihongwa eky'okuganyiza ekibi, enyana n'ekyana ky'entaama, byombi ebinyakuhikize omwaka gumu, ebitanyina kamogo, bibe kihongwa eky'okwokya,

⁴kandi enimi n'empaya y'entaama, bibe kihongwa habw'okusaba obusinge mubihongere MUKAMA, hamu n'ekihongwa eky'ebyokulya ekinyakutabwirwemu amagita, habwokuba kiro kinu MUKAMA naija kubeeyoleka.’ ”

⁵Abantu baaleeta omumaiso g'Eheema ey'okutangatanganiramu ebintu Musa ebi yaragiire kandi ekitebe kyona kyairra haihi, kyayemerra omumaiso ga MUKAMA.

⁶Musa yagamba ati: “Ekintu kinu nikyo MUKAMA yabaragire kukora kandi nimwija kurora ekitiinisa kye.”

⁷Nubwo Musa yagambira Arooni ati: “Irra haihi itambiro ohonge ekihongwa kyawe eky'okukuganyiza ekibi n'ekihongwa kyawe eky'okwokya, oyesabire wenka osabire n'abantu; kandi oleete ekihongwa eky'abantu, obasabire nkooku MUKAMA aragiire.”

⁸Kandi Arooni yairra haihi itambiro, yaita enyana ey'ekihongwa kye eky'okumuganyiza ekibi,

⁹Abatabani baamuleetera esagama yaibikamu orukumo rwe, yagisiiga ha mahembe g'itambiro, endi yagiseeserra ha kicweka ekya hansi;

¹⁰baitu ebisajwa, ensigo n'obune obw'empagara ebyarugire omu kihongwa ky'okuganyiza ekibi, yabyokeza ha itambiro; nkooku MUKAMA yaragiire Musa.

¹¹Enyama n'orususu yabyokeza aheeru y'orukande.

¹²Kandi yaita ekihongwa eky'okwokya, abatabani baamuleetera esagama, yagiseesa ha itambiro kulyehinguliriza.

¹³Baamuleetera ekicweeka kimu kimu eky'ekihongwa eky'okwokya n'omutwe, nabyo yabyokeza ha itambiro.

¹⁴Ebyenda n'ebirenge yabyogya kandi yabyokeza ha itambiro hamu n'ekihongwa eky'okwokya.

¹⁵Hanyuma yaleeta ekihongwa eky'abantu yakwata embuzi ey'ekihongwa eky'okuganyiza ekibi, yagiita yagihonga nkooku yakozire ey'okubanza ey'okuganyiza ekibi.

¹⁶Yaleeta ekihongwa eky'okwokya, yakihonga nkooku ekiragiro kirukuragira.

¹⁷Kandi yaleeta ekihongwa eky'ebyokulya, yaihaho orucumite yarwokeza ha itambiro, yakyongerereza ha kihongwa eky'okwokya eky'obwire bwa nyenkya.

¹⁸Yaita enimi n'empaya y'entaama, kibe kihongwa eky'abantu habw'okubasabira obusinge, batabani be baamuleetera esagama, yagimiisira itambiro kulyehinguliriza,

¹⁹ebisajwa eby'omukira, n'ebi ebirukusweka ebyenda, ensigo n'obune obw'empagara,

²⁰baabigereka ha mbanda ebisajwa baabyokeza ha itambiro,

²¹baitu embanda n'ekirumbu eky'obulyo, Arooni yabiimukyaimukiza MUKAMA, nkooku Musa yaragiire.

²²Arooni obu yamazire kuhonga ekihongwa eky'okuganyiza, ekihongwa eky'okwokya n'ekihongwa habw'okusaba obusinge, aho yaimukiza abantu emikono, yabasabira omugisa, yarugaho yagenda.

²³Musa na Arooni baagenda omu Heema ey'okutangatanganiramu, kandi obu baarugiremu, baasabira abantu omugisa, abantu baarora ekitiinisa kya MUKAMA nikyangasana.

²⁴Omurro gwaruga omumaiso ga MUKAMA, gwasiriiriza kimu ekihongwa eky'okwokya n'ebisajwa ebikaba biri ha itambiro, abantu boona obu baarozire eki, baayamuza, baajuumara hansi.