Read Runyoro - rutooro Yer 1 Bible Online

Yer 1 - Runyoro - rutooro bible

Yer 1

¹Binu nibyo ebigambo bya Yeremiya mutabani wa Hirikiya, owa banyakatagara abakaba bali Anatoosi omunsi ya Benyamiini,

²MUKAMA ou yagambiire omu businge bwa Yosiya mutabani w'Amoni omukama wa Yuda, omu mwaka ogwa ikumi n'esatu ogw'engoma ye.

³Kandi ou yagambiire omu businge bwa Yehoyakimu mutabani wa Yosiya omukama wa Yuda, okugarukira ha mpero y'omwaka ogwa ikumi na gumu ogwa Zedekiya mutabani wa Yosiya omukama wa Yuda, okuhikira kimu ha kunywagwa kwa Yerusaalemu, omu kwezi okwa kataano.

⁴MUKAMA akangambira ati,

⁵“Obu nkaba ntakakubumbire omunda ya nyoko, nkaba nkumanyire, kandi nkakweza otakazairwe; nakukoma obe murangi hali amahanga.”

⁶Nubwo nagarukiremu nti, “Ai MUKAMA Ruhanga! Ka ntamanyire kubaza, habwokuba ndi muto mali.”

⁷Baitu MUKAMA yangambira ati, “Leka kungambira ngu, ‘Ndi muto mali’ habwokuba boona aba ndakutumaho, nubo olihikaho kandi kyona eki ndaakuragira, nikyo olibaza.

⁸Otabatiina, habwokuba ndaikaraga na iwe ninkulinda.”

⁹Hanyuma MUKAMA yagorra omukono gwe yankwata ha kanwa yangambira ati, “Nakuta omu kanwa ebigambo byange ebi olibaza.

¹⁰Kiro kinu, omanye, nakuha kulema amahanga n'abakama nakuha obusobozi obw'okumenya n'okuseesa, obw'okuhwerekereza n'okujuumika, obw'okwombeka n'okubyara.”

¹¹MUKAMA akankaguza ati, “Yeremiya noorora ki?” Nagarukamu nti “Nindora omwigo ogw'omuti omurozi.”

¹²MUKAMA nukwo kungarukamu ati, “Orozire kurungi, habwokuba na nyowe, mpangire eriiso kurora ebigambo byange, nibihikirizibwa.”

¹³MUKAMA akongera yankaguza ati, “Norora ki?” Nagarukamu nti “Nindora enyungu erukufuukira ha bukiizi obw'emoso eyeculikire eri haihi kuseeseka kunu.”

¹⁴MUKAMA nubwo yangarukiremu ati: “Ha bukiizi obw'emoso, nuho haliruga akabi akaligwera abantu boona abanyakuli omunsi enu.

¹⁵Habwokuba MUKAMA naagamba ati: Ninyija kweta enganda zoona ez'abakama aba ha bukiizi bw'emoso; baliija, kandi buli omu, alita Ekitebe Eky'obukama bwe ha mulyango gw'amalembo ga Yerusaalemu, ha bisiika byarwo byona okubyehinguliriza, n'okwehinguliriza embuga zoona eza Yuda.

¹⁶Habw'ebibi byabo byona ebibakozire, nahabw'okunfuruka, bakacumikirra embandwa obubbani, bakaramya ebintu ebi bayekoliire bonka n'emikono yabo, ndibacwera omusango.

¹⁷Baitu iwe oyeteege oimuke obagambire kyona eki ndaakuragira. Otalifuberra na nyowe ntaliija kukukanga omumaiso gaabo.

¹⁸Dora kiro kinu, naakufoora rubuga oruroho muhuruzi, nakufoora nyomyo ey'ekyoma, kandi nakufoora bisiika eby'omulinga, oleme ensi enu yoona, abakama ba Yuda, abanyoro be; banyakatagara be, n'abantu ab'ensi yoona.

¹⁹MUKAMA naagamba ati: Balikurwanisa, baitu tibalikusingura, habwokuba, ndaikaraga na iwe kukujuna.”