Read Runyoro - rutooro Yer 10 Bible Online

Yer 10 - Runyoro - rutooro bible

Yer 10

¹Inywe ab'enju ya Isirairi, muhurre ekigambo MUKAMA eki arukubagambira.

²MUKAMA naagamba ati: “Mutalyega engeso ez'amahanga, kandi mutalikangwa ebintu eby'omu mwanya, ebintu ebi nibyo bikanga amahanga

³habwokuba engeso z'amahanga ago, z'ebisuba. Omuti gutemwa gwihwa omu kibira omufundi akwata endemu agubaija n'engaro ze.

⁴Abantu bagusiiga efeeza n'ezaabbu; bakwata enyondo baguboha n'emisumaali, nukwo guleke kutengeeta.

⁵Ebisisani byabo nibisisana nk'ebintu eby'omumusiri gw'emyongo ebyokukanga enyonyi. Kandi tibisobora kubaza, bintu byokuhimbwa habwokuba tibisobora kurubata. Muleke kubitiina, habwokuba tibisobora kukora akabi kandi tibisobora kukora ekintu ekirungi.”

⁶Ai MUKAMA, busaho n'omu arukukusisana, oli w'ekitiinisa, ibara lyawe ly'ekitiinisa kandi ry'obusobozi.

⁷Iwe omukama w'amahanga, n'oha ataakutemu kitiinisa? Habwokuba eki, nikyo osemeriire kwo; habwokuba, omu bantu boona abanyamagezi ab'amahanga, n'omu bakama baabu boona, busaho n'omu arukukusisana.

⁸Badoma kandi ntaami; ebintu ebitaroho ebi ekibyegesa, tikirumu magezi.

⁹Efeeza enyakwagiibwe omu murro, eruga Tarasiisi, kandi ezaabbu, eruga Ufazi. Bintu ebikorwa abakozi ab'emirimo y'engaro n'abaheesi b'ezaabbu engoye zaabu za bbururu na kahuukya; zoona zikakorwa abanyamagezi.

¹⁰Baitu MUKAMA nuwe Ruhanga ow'amazima; nuwe Ruhanga omwomeezi kandi Omukama ow'obusinge n'obusinge. Obu abiihirwa, ensi etukumira, kandi amahanga tigasobora kwemera kiniga kye.

¹¹Mubagambire muti: “Embandwa ezitarahangire iguru n'ensi, zirihwerekerra zihwere kimu omunsi.”

¹²MUKAMA nuwe yakozire ensi n'obusobozi bwe, nuwe yagumize ensi n'amagezi ge, kandi nuwe yabambire iguru n'obwetegereza bwe.

¹³Obu agamba, amaizi ag'omwiguru gahirra, kandi aimukya ekiho omu mitaano y'ensi. Aleeta emirabyo eyerukumanyisa enjura, kandi aimukya omuyaga omu maahurro ge.

¹⁴Buli muntu wena mudoma kandi taina magezi; buli muheesi, ebisisani bye bimuswaza; habwokuba ebisisani bye by'ebisuba, tibiina rwoya orw'obwomeezi.

¹⁵Tibiina mugaso, kintu ky'okubiiha ebisuba; akasumi ak'okufubirwa kwabyo obu kalihika, birihwerekerra.

¹⁶Ruhanga wa Yakobbo tarukusisana bisisani ebi nuwe yahangire ebintu byona, kandi akakoma Isirairi nurwo ruganda rw'obugwetwa bwe. Ibara lye nuwe MUKAMA w'Amahe.

¹⁷Mubohe! Mwiruke muruge omunsi inywe abanyakugosirwe!

¹⁸Habwokuba MUKAMA, kinu nikyo arukugamba ati: “Hati ha murundi gunu abasi b'ensi enu, ninyija kubanaga aheeru, kandi ninyija kubaleetera akabi, ndole obu baranserra!”

¹⁹Mara, kanimpururwa kundi! Obuhuta nibuncumita muno. Baitu nkagamba nti, “Mananu kwo, gunu muhito, kimpikiriire kwemerra.”

²⁰Eheema yange ecencebukire, kandi emiguha yange yoona ecwacwainwe; abaana bange bandugireho baagenda tiharoho muntu ow'okugaruka kwemereza eheema yange, n'okuhanika engoye zange ez'entimbe.

²¹Nkagarukamu nti, Abeebembezi baitu badoma; tibarukusaba MUKAMA kubeebembera nikyo balemiirwe, n'abantu baitu nikyo bararangiire.

²²Muhurre haroho orugambo! Ngu omunsi eya habukiizi bw'emoso haimukireyo akambayaaya akatagambwa akarukwija kufoora embuga za Yuda itongo, bwikaro bw'eboha.

²³Ai MUKAMA, mmanyire omuntu nkooku atasobora kwezorra wenka omuhanda, kandi obu aba naarubata, nkooku atasobora kutereekereza entambu ze.

²⁴Ai MUKAMA, ompane, baitu ne'mbabazi; noolengerra otangoroza ekiniga, otaliikara kumpwerekereza.

²⁵Ekiniga kyawe kimarreho amahanga agatakumanyire na ha bantu abatakuteerra muranga habwokuba, bakaita Yakobbo; bakamwita bamubuuleeza, kandi ekiikaro kye, baakifoora itongo.