Read Runyoro - rutooro Yer 12 Bible Online

Yer 12 - Runyoro - rutooro bible

Yer 12

¹Ai MUKAMA niiwe omuhikiriire, obu nkuleetera omusango, oyoleka nkooku okora eby'obulyo; baitu ka nkukaguze ha bintu eby'obwinganiza: Habwaki ababi nubo batunga omugisa? Habwaki abantu boona encwangya, ebintu nubo bigendera kurungi?

²Niwe ababyara, banaga emihama; bakura bazaara abaana; tobahwa omukanwa, baitu tibakuta ha mutima.

³Ai MUKAMA baitu iwe ommanyire, orora ebi nkora, kandi orora nkooku ndukukugonza. Bacunde obaturukye aheeru nk'entaama ezirukugenda kubaagwa, kandi obate ha rubaju okuhika ha kiro eki baliitirwaho.

⁴Ensi erihikya ha kwikara neeteera empamo, kandi obunyansi obunyakuli omu iswa lyona, bulihikya ha kuhotoka? Enyamaiswa n'enyonyi nibifa habw'obubi bw'abantu, nubo abo abarukugamba bati: “Ruhanga tarukurora ebiturukukora.”

⁵“Obu oliba wairukire n'abamaguru baakujwahya, empaka ez'embaraasi oliisobora ota? Kandi obu oraaba nogwa omunsi ey'obusinge, oliba ota omukisaka kya Yorudaani?

⁶Habwokuba nobwakubaire bagenzi bawe n'enju ya sso, na bo bakakugobeza; bakuhondiire nibateera muno enduuru; noobu balikubaliza amarungi, otalibaikiriza.”

⁷“Enju yange nkagisiga, obugwetwa bwange nkaburugaho abantu aba nagonzaaga, nkabata omu mikono y'abanyanzigwa baabu.

⁸Omugwetwa wange anfookiire nk'entale ey'omwirungu, ancoomiire; habweki mmunobere.

⁹Omugwetwa wange nuwe yanfookera nk'ibebe kalya nyama? Enyonyi kalya nyama zimwehinguliriize nizimurwanisa? Mugende musorooze ebisoro byona eby'omu kisaka; mubireete bikaabule.

¹⁰Abaliisa baingi bakahwerekereza omusiri gwange ogw'emizabbibbu, omugabo gwange bakagurubaatirra; omugabo gwange ogunsemereza bakagufoora irungu eritaikarwamu muntu.

¹¹Bakagufoora ihamba; nigundirirra guli ihamba. Ensi yoona bakagifoora ihamba; baitu busaho muntu n'omu arukukifaaho.

¹²Abahwerekereza bahikire hansozi zoona ez'omwirungu; habwokuba empirima ya MUKAMA neehwerekereza okuruga ha mpero y'ensi okuhika ha mpero endi; busaho n'omu anyakwina obusinge.

¹³Bakasiga engano, baitu bakagesa amahwa, bakejwahya muno, baitu batatunge kantu. Habw'ekiniga kya MUKAMA ekibi, ebi baagesire biribakwasa ensoni.”

¹⁴Abataahi bange boona ababi, abanyakukwataho obugwetwa obu nahaire abantu Abaisirairi babugweterwe, MUKAMA naabagambaho ati: “Ndibameenya mbaihe omunsi yabu kandi enju ya Yuda ndigimeenya ngibaihemu.

¹⁵Kandi obu ndiba mmazire kubameenya ndigaruka mbaganyire, kandi ndyongera mbagarre buli omu omubugwetwa bwe, kandi buli omu omunsi y'owabo.

¹⁶Kandi kirihika, obubalyekamba kwega engeso ez'abantu bange, okurahira Ibara lyange nibagamba bati: ‘Ndahiire MUKAMA omwomeezi’, nkooku baayegeseze abantu kurahira Baali; obu nubwo balitunga ekiikaro omu bantu bange.”

¹⁷MUKAMA naagamba ati, “Baitu obu halibaho ihanga eriryanga kuhurra, eri ndirimenyera kimu ndihwerekereze.”