Read Runyoro - rutooro Yer 14 Bible Online

Yer 14 - Runyoro - rutooro bible

Yer 14

¹Kinu nikyo ekigambo MUKAMA eki yagambiire Yeremiya ha ibura ly'enjura:

²“Yuda neeteera empamo amalembo gaayo nigasaalirwa muno; abantu baayo baikaliire hansi nibateera empamo, kandi enduuru ya Yerusaalemu neehulirwa muno.

³Abanyoro baayo nibatuma abaheereza baabu kuleeta amaizi; nibagenda ha maziba tibarukusangayo maizi, nibagaruka n'ensoha zaabu zitarumu kantu; nibakwatwa ensoni, nibasoberwa kandi nibeeswekerra emitwe.

⁴Enjura habwokutagwa, kandi na habw'itaka kwoma kerekere, abalimi baina obujune n'ensoni.

⁵Enjaza ey'omu iswa, enjura habw'okutagwa nayo neesiga ekyana kyayo ekiyakarukga kuzaara habwokuba tiharoho bunyansi.

⁶Entulege zeemeriire hansozi ezitaroho kantu, niirakaraka nk'eboha nukwo itunge orwoya; amaiso gaazo gaswekerwe oruho, habwokuba tiharoho bunyansi.

⁷Ai MUKAMA, ebibi byaitu noobu biraaba nibitusingisa omusango, otukoonyere nkooku waraganiize habwokuba tukagarukira emirundi nyingi twakusiisira.

⁸Niiwe kunihira kwa Isirairi, omujuni wayo omu kasumi ak'omuhito, kiki ekirukukusisaniza nk'omunyaihanga omunsi yaitu, nk'omugenzi anyakukubuka araale ekiro kimu kyonka?

⁹Kiki ekirukukusisaniza nk'omuntu anyakusobiirwe, nk'omuntu ow'amaani atasobora kujuna? Ai MUKAMA, niiwe otuli hagati, kandi tweterwa ibara lyawe; otatuleka.”

¹⁰MUKAMA abantu banu naabagambaho ati: “Nukwo baagondeze kwenjeera bati, batasobole kwikara omu kiikaro kimu. MUKAMA nikyo atarukubaikiririza, hati aina kwijuka obubi bwabo, kandi abafubire habw'ebibi byabo.”

¹¹MUKAMA akangambira ati: “Abantu banu otalibasabira obusinge.

¹²Noobu baraaba nibasiiba, tindihurra omuranga gwabo, noobu baraaba nibahonga ekihongwa ekyokeze n'eky'ebyokulya, tindibaikiriza; baitu ndibahwerekereza n'empirima, kiihe, na kagingo.”

¹³Nubwo nagarukiremu nti: “Ai MUKAMA Ruhanga, abarangi nubo babagambira bati, ‘Timulihikwaho mpirima, kandi timuligwerwa kiihe, baitu omu kiikaro kinu, ndibaheeramu obusinge obutali bw'okukeehebwaho.’”

¹⁴Ruhanga kandi akangambira ati: “Abarangi nibaranga ebisuba omu ibara lyange; ntabatume, ntabaragire kandi ntabaze na bo. Ebintu ebi baayolekerwe ebi barukubazaaho, bitaruge hali nyowe; ebi barukuranga, bintu ebitaina mugaso ebi baayehangahangire.”

¹⁵Abarangi abo abarukuranga omu ibara lyange kandi kunu ntabatume, abanyakugamba bati, empirima na kiihe tibirihika omunsi enu, MUKAMA naabagambaho ati: Abarangi abo nubo balihwerekerezibwa empirima na kiihe.

¹⁶Kandi abantu ababarukurangira, balihungurwa aheeru omu makuute ga Yerusaalemu, baisirwe enjara n'empirima, tihalibaho muntu ow'okubaziika, abasaija, bakazi baabu, batabani baabu na bahara baabu, habwokuba ndibahoora enzigu habw'obubi bwabo.

¹⁷Obagambire ekigambo kinu oti: “Kandire nyamusana n'ekiro obutalekerra, habwokuba abantu bange bahutaazibwe kubi kandi bahendahenzirwe muno.

¹⁸Obu ndukugenda omu misiri, nindorayo emitumbi y'abantu abaisirwe empirima! Kandi obu ndukutaaha omu rubuga, nindora abaraaliire kwitwa enjara! Habwokuba abarangi na banyakatagara nibarabanganaho omunsi nibakora omulimo gwabo, baitu tibamanyire eki barukukora.”

¹⁹Ai MUKAMA, Yuda okamwogera kimu Ziyoni okagihwamu? Habwaki kututeera muno oti, tukalema n'okukira? Twanihiraga obusinge, baitu hatabeho karungi na kati; twanihiraga akasumi ak'okukira, baitu eby'okutiinisa nibyo byaizire.

²⁰Ai MUKAMA, obubi bwaitu nitubwikiriza, kandi nitwikiriza n'ebibi ebya baisenkuru itwe, habwokuba tukakusiisira.

²¹Habw'ibara lyawe, otatuleka ekitebe kyawe eky'obukama eky'ekitiinisa, otakiswaza; oijuke, otacwa endagaano ei waragaine naitwe.

²²Omu mbandwa ez'ebisuba ez'abamahanga, haroho asobora kunaga enjura? Rundi iguru, lisobora kunaga obutoonyatoonya? Nangwa, niwe MUKAMA Ai Ruhanga waitu, niiwe kunihira kwaitu, habwokuba binu byona, niiwe obikora.