Read Runyoro - rutooro Yer 15 Bible Online

Yer 15 - Runyoro - rutooro bible

Yer 15

¹Hanyuma, MUKAMA yangambira ati, “Musa na Samwiri noobu baakunyemerra omumaiso, nabwo abantu banu tinaakubagiriire mbabazi. Babinge bagende; bagambire banduge omumaiso.

²Obu baraakukaguza ngu, ‘Tugende nkaha?’ Obagambire oti, ‘MUKAMA naagamba ati: Abo abaategekiirwe kagingo, bagende baitwe kagingo, abo abaategekiirwe empirima, bagende baitwe empirima; abo abaategekiirwe kiihe, bagende baitwe kiihe, kandi abo abaategekiirwe kukwatwa, bagende bakwatwe.’”

³“MUKAMA naagamba ati: Ninyija kubakomera ebintu ebihwerekereza eby'emiringo ena: empirima ey'okubaita, embwa ez'okubataagatagura, amanyonyi ag'omu mwanya ag'okubaboija n'enyamaiswa ez'omwirungu ez'okubajunjubura n'okubahwerekereza.

⁴Habw'ebikorwa ebibi Manaase mutabani wa Hezekiya omukama wa Yuda ebi yakoliire Yerusaalemu, ndibafoora kintu ky'okutiinwa abakama boona ab'ensi.

⁵Ai bambi Yerusaalemu, n'oha alikuganyira, rundi n'oha alikulirirra? N'oha aligaruka ha rubaju kukaguza nkooku oli?

⁶MUKAMA naagamba ati, okaanaga, wanteera amabega; na nyowe nukwo kugorra omukono gwange nakusasangura, habwokuba nkajwaha nalemwa kwetanga ekiniga.

⁷Omu mbuga ez'omunsi yabo, nkabahehemukizaamu n'orugali. Abantu bange obu baayangire kucwa engeso zaabu, nkabaaka abaana baabu nabahwerekereza.

⁸Abafaakati baabu, nkabakanyisa okukira omusenyi ogw'amayanja; omwihangwe nubwo naleetiire baanyina abasigazi omuhwerekereze; nkabaleetera bwango okuhururwa n'obutiini.

⁹MUKAMA naagamba ati: Omukazi anyakuferiirwe abaana be musanju, agwire ensazi, alemerwe n'ag'okwikya. Obwire bukyaikaire, baitu obwe bwizire (ekiro kikyaikaire) akwasirwe ensoni kandi aswaire. Kandi abasigaireho, ninyija kubalekera abanyanzigwa baabu babatemateme.”

¹⁰Mawe, mau, mahano iwe kuzaara nyowe omusaija ow'empaka kandi arukuhakaniza ensi yoona! Tinkoohozaaga habwensaagi, kandi omuntu takanyohozaaga, baitu abantu boona bankondereza!

¹¹MUKAMA, obu ndiba ntarakuheeriize kurungi, obu ndiba ntaratonganiriire abanyanzigwa bange hali iwe, bali omu kabi n'omu muhito byona ebi bankonderiize bihikirre.

¹²Busaho muntu asobora kucwa ekyoma, munomuno ekyoma ekya habukiizi bw'emoso, ekinyakutabiremu omulinga.

¹³Habw'ebibi byawe ebi wakozire omunsi yoona, obuguuda bwawe bwona na byona ebi wayahwiire ndibihayo binyagwe, bisasule ebibi ebi.

¹⁴Ndibafoora bairu b'abanyanzigwa banyu omunsi ei mutamanyire, habwokuba ekiniga kyange nikyaka nk'omurro ogulibokya gukabasiiriiza.

¹⁵Ai MUKAMA, niiwe omanyire onyijuke kandi onkoonyere, abo abanyakumpiiganiza obamporre enzigu. Otabagumiisiriza, kandi bakasangwa banyita. Oijuke nkooku njumwa habwawe.

¹⁶Ai MUKAMA Ruhanga ow'amahe, okambaliza, buli kigambo eki wabalize nakihurra. Ebigambo byawe bikanyijuza omuhimbo n'okusemererwa, habwokuba nyeterwa ibara lyawe.

¹⁷Ntaikarre omu kitebe ky'abantu abakaba nibeegonza, kandi ntasemererwe; habwokuba omukono gwawe gukaba gunkwasireho, nkaikara nyenka, habwokuba okaba ombiihiize muno.

¹⁸Habwaki okuhururwa kwange, nikweyongera, habwaki obuhuta bwange butatambwa, kiki ekibutangire kukira? Orambeera nk'akambu akateesigwa, nk'amaizi agarukwoma?

¹⁹Kinu MUKAMA naakigarukamu ati: “Obwoligaruka, ndiikiriza kukugarra, oligaruka obe muheereza wange. Omu kiikaro eky'okubaza eby'obudoma, obwolibaza ebigambo ebisemeriire, oligaruka obe murangi wange. Abantu baligaruka baije hali iwe, baitu iwe toligonza kugenda nambere bali.

²⁰MUKAMA naagamba ati, ha bantu banu, ndikufoora kisiika ky'omulinga ekigumire; balikurwanisa baitu tibalikusingura, habwokuba ndi na iwe kukujuna n'okukutabura.

²¹Ndikujuna nkwiheho abantu ababi, ndikucungura nkucweho abantu abataina mbabazi.”