Read Runyoro - rutooro Yer 16 Bible Online

Yer 16 - Runyoro - rutooro bible

Yer 16

¹MUKAMA akangambira ati:

²“Omu kiikaro kinu, otalisweramu omukazi, kandi otalizarramu abaana, aboojo rundi abaisiki.

³Habwokuba MUKAMA, abaana aboojo n'abaisiki abalizaalirwa omu kiikaro kinu, baanyinabo na baisebo abalibazarra omunsi enu, binu nibyo arukubagambaho:

⁴Baliitwa endwara embi tibaliteererwa mpamo kandi tibaliziikwa; balisisana nk'obusa obunyakunagirwe ha rubuungo. Balihwerekerezibwa empirima na kiihe, emitumbi yabu eriba byokulya by'amahungu ag'omu mwanya, eriibwe n'enyamaiswa ez'omwirungu.

⁵“Habwokuba MUKAMA naagamba ati: Otalitaaha enju nambere barukurra, kandi otaligenda nambere barukuteera empamo kubalirirra; habwokuba MUKAMA naagamba ati: abantu abo nkabaihaho obusinge bwange, tinkyabainaho ngonzi n'embababazi.

⁶Ab'ekitiinisa n'abatali b'ekitiinisa balifeera omu si enu; tibaliziikwa, tihalibaho muntu ow'alibaterra empamo, ow'alibasaalirirwa, rundi ow'alibaturukira orufu.

⁷Tihalibaho muntu ow'alitwarra abafeerwa ebyokulya kubairukirra habwokufeerwa omuntu wabo; omuntu noobu aliba aferiirwe ise rundi nyina, busaho alimuganyira.

⁸Otalitaaha enju nambere hali obugenyi, okaikarra, okalya, okanywa hamu n'abantu abanyakuli omu bugenyi.

⁹Habwokuba MUKAMA ow'amahe, Ruhanga owa Isirairi naagamba ati: Omu kiikaro kinu kandi omu businge bwanyu, na inywe nimurora muti, ninyija kufuuhyamu enseko n'okusemererwa, tihaligaruka kuhulirwamu obugenyi obwokugabura n'okugabuka.

¹⁰“Ebigambo binu byona obu oraabigambira abantu abo, bakabakaguza bati, MUKAMA kutugambaho akabi akakooto akarukwingana aho, atutuzire ki? Obubi bwaitu buli nkaha? MUKAMA Ruhanga waitu tukamusiisira ki?

¹¹Obagarukemu oti: MUKAMA naagamba ati: ‘Ngu habwokuba, baisenkuru inywe bakanfuruka, baahondera embandwa nizo baaheereza kandi baaramya,

¹²nyowe bakanfuruka bayanga kukwata ebiragiro byange, habwokuba buli omu omuli inywe naahondera ebiteekerezo eby'omutima gwe omubi ogugumangaine, timurukumpurra;

¹³habweki, ninyija kubabinga omunsi enu, mbatwale omunsi, inywe na baisenkuru inywe ei mutamanyire, oku nyamusana n'ekiro, nuho muraaramizaaga embandwa, habwokuba tindibagirra mbabazi.’

¹⁴“Habweki, MUKAMA naagamba ati, akasumi kalihika, abantu obubataligaruka kwongera kugamba, ‘Ndahiire Ruhanga ayaihire abantu ba Isirairi omunsi Misiri,’

¹⁵baitu ‘batagambaga ngu, ndahiire Ruhanga omwomeezi ayaihire abantu ba Isirairi omunsi eyahabukiizi bw'emoso, n'omunsi ezindi zoona nambere akaba ababingiire.’ Habwokuba, ndibagarra omunsi yabu yonyini ei nahaire baisenkurubo.

¹⁶“MUKAMA naagamba ati, Ninyija kweta abasohi baingi baije basohe abantu banu. Hanyuma abahiigi baingi, babahiige ha buli rusozi, ha kasozi n'omu maingira aganyakuli omu myandara hagati.

¹⁷Byona ebi barukukora nimbirora. Busaho na kimu ekinserekerwe; ebibi byabo tibirukunyesobera.

¹⁸Ebibi byabo n'obubi, ninyija kubibasasuza kabiri, habwokuba ensi yange bagisiisize ebisisisani ebitaina bwomeezi nk'emitumbi kandi baagiijuzaamu embandwa zaabu ez'ebisuba.”

¹⁹Ai MUKAMA, amaani gange kandi obugumiro bwange, obu mba omu kabi, obwirukiro bwange, amahanga galiruga ha mpero z'ensi gakuhikeho gagambe gati: “Baisenkuru itwe bakagweterwa amasa bakagweterwa ebisuba, ebintu ebitarukugasa ebitaina magoba.

²⁰Omuntu asobora kwekorra baaruhanga be? Nangwa, kakuba abakora, tibaakubaire baaruhangakwo.”

²¹Hati MUKAMA naagamba ati: “Hati omurundi gumu gwonka, ninyija kumanyisa amahanga obusobozi bwange n'amaani gange; abantu nukwo bamanye nkooku mba MUKAMA.”