Read Runyoro - rutooro Yer 17 Bible Online

Yer 17 - Runyoro - rutooro bible

Yer 17

¹“MUKAMA naagamba ati: Inywe abantu ba Yuda ekibi kyanyu kihandiikirwe n'ekalaamu ey'ekyoma; kijerengerwe n'ensonga ey'ibaale ery'omuhendo omu mitima yanyu, kandi kisarwiirwe ha mbaju z'amatambiro ganyu.

²Ha matambiro na ha bisisani ebyateeriirweho embandwa Asera, haihi na buli muti ogujumbire, ha butwetwe bw'obusozi

³na hansozi ez'omu bwerre, abantu banyu nuho baramiza. Habw'ebibi byanyu byona ebi mwakozire omunsi yanyu, itungo lyanyu n'amaahurro ganyu, ndibireka binyagwe.

⁴Obugwetwa obu nabahaire, nimwija kubusiga, ndibafoora bairu b'abanyanzigwa banyu omunsi ei mutamanyire, habwokuba ekiniga kyange kiraayakaga nk'omurro ebiro byona.”

⁵MUKAMA naagamba ati: “Akyenerwe omuntu ogu anyakundugaho kandi anyakwesiga omuntu n'amaani g'omuntu anyakufa.

⁶Asisana nk'ekitongo eky'omwirungu, talirora kirungi na kimu ekiriija. Araikaraga omu biikaro ebyoomere eby'omwirungu, omunsi ey'ekisura etaikarwamu.

⁷W'omugisa omuntu ogu anyakwesiga MUKAMA, anyakwesingiza MUKAMA.

⁸Asisana nk'omuti ogunyakubyairwe haihi n'amaizi, ogunyakunaga emihama yagwo haihi n'ekyambu, obu hajwa omusana tigutiina habwokuba amababi gagwo gaikara gali mabisi kandi omu mwaka ogw'ekyanda, tigutuntura, habwokuba tigulekerra kwana ebijuma.”

⁹N'oha asobora kwetegereza omutima gw'omuntu? Busaho kintu na kimu ekigobya nk'omutima; obu gurwara tigutambirwa.

¹⁰“Nyowe MUKAMA ninyowe nyekebiija ebiteekerezo, nyetegereza omutima, nukwo nsasule buli muntu nindorra ha ngeso ze, ninsigikira ha bikorwa bye.”

¹¹Nk'endahi enyakubumbaatira obwana obu etarayatiire, n'omuntu anyakutunga itungo ery'obugobya nukwo asisana; hagati y'obwomeezi bwe, itungo lirimuhwaho, kandi ha mpero ye, aliba mudoma.

¹²Okuruga ira, ekitebe ky'obukama eky'ekitiinisa ekyatairwe haiguru nikyo ekiikaro kyaitu ekirukwera.

¹³Ai MUKAMA iwe okunihira kwa Isirairi abo boona abanyakukufuruka, baliswazibwa; abo abanyakukurugaho, balihandiikwa ha itaka, habwokuba barugireho MUKAMA, ensoro ey'amaizi agoomeeza.

¹⁴Ai MUKAMA, ntambira; nubwo ndakira njuna nubwo ndajunwa habwokuba niiwe kukugiza kwange.

¹⁵Huurra, abantu nibaikara nibankaguza bati, “MUKAMA eki yagambire kiri nkaha? Hati nu, kihikirre turole!”

¹⁶Baitu nyowe tinkakuhambirizaaga kuleeta akabi ekiro eky'akabi ntakigonze, eki n'okimanya eki nagambire okakimanya.

¹⁷Otankanga; obu mba ndi omu kabi, niiwe bwirukiro bwange.

¹⁸Abo abarukumpiiganiza, obaswaze, baitu nyowe otanswaza; obakange, baitu nyowe otankanga; baleetere ekiro eky'akabi; obahwerekereze, kandi ogaruzeemu.

¹⁹MUKAMA akangambira ati: “Genda oyemerre omu irembo lya Benyamiini, eritaahya kandi eriturukya abakama ba Yuda, n'omu malembo ga Yerusaalemu goona,

²⁰ogambe oti: ‘Inywe abakama ba Yuda, Yuda yoona, n'abasi ba Yerusaalemu boona abanyakuraba omu malembo ganu nibataaha, muhurre ekigambo kya MUKAMA.

²¹Obagambire oti, obu muraaba nimugonza obwomeezi bwanyu mutalyetweka omutumba ha kiro kya Sabbato; mutalihimba ekintu mukakirabya omu malembo ga Yerusaalemu,

²²rundi kuturukya ekintu omu maju gaanyu ha Sabbato. Mutalikora omulimo; nkooku naragiire baisenkuru inywe, Sabbato bagimanyege nkooku eba kiro ekirukwera.

²³Baitu nabwo batahurre kandi batatege kutu, baitu bakagumanganiza engoto nukwo baleme kuhurra bakaikiriza kwegesibwa.

²⁴“‘Ogambire abantu abo oti, kibahikiriire kumpurra omu byona. Ha kiro kya Sabbato, mutalyetweka omutumba mukagurabya omu malembo g'orubuga runu. Sabbato mugimanyege nkooku eba kiro ekirukwera, kandi mutalikisura mukakora omulimo.

²⁵Obu, abakama abalisinga ha kitebe ky'obukama ekya Daudi, abanyoro baabu hamu n'abantu ba Yuda, nabaikazi ba Yerusaalemu, batembere ebigaali n'embaraasi, nubwo balyongera kuraba omumalembo g'orubuga runu. Kandi orubuga runu, ruliikarwamu abantu ebiro byona.

²⁶Abantu baliruga omu mbuga za Yuda, n'omu biikaro ebiherraine na Yerusaalemu, baliruga omunsi ya Benyamiini, baliruga Sefela, baliruga omunsi ey'ensozi na Negebbu, baleete ebihongwa ebyokeze n'ebyonzira, ebihongwa eby'ebyokulya n'obubbaani, kandi baleete ebihongwa eby'okusiima omunju ya MUKAMA.

²⁷Baitu obu mutalimpurra, mukasemezaaga ekiro kya Sabbato, mukafuuhya kwetweka omugugu mukagurabya omu malembo ga Yerusaalemu ha Sabbato, obu, amalembo gaarwo ndigacumika omurro, guhwerekereze ebikaali bya Yerusaalemu, kandi tiguliraazibwa.’ ”