Read Runyoro - rutooro Yer 18 Bible Online

Yer 18 - Runyoro - rutooro bible

Yer 18

¹MUKAMA akangambira ati:

²“Imuka ogende omunju y'omubumbi oku nuho ndikugambirra eki ndukwenda kugamba.”

³Nanyowe nukwo kugenda omunju y'omubumbi; namusanga aikaliire hanyamuzigaye nakora omulimo gwe.

⁴Ekibindi eki yabaga naabumba obu kyasiisikaraga, nkooku kibaho ha ibumba ababumbi eri babumba, yatandikaga buhyaaka abumba ekibindi ekindi, ababumbi nkooku bakora.

⁵MUKAMA nubwo yangambiire ati,

⁶“Inywe abantu ba Isirairi tinsobora kubakora omubumbi ogu nkooku akozire ibumba? Nk'ibumba okuliba omungaro z'omubumbi, nainywe ab'Enju ya Isirairi nukwo mundi omu ngaro.

⁷Hoona nambere nkagondiize kakuba ngamba nti, ihanga bunanka, rundi obukama buli, ninyija kubiihaho kubicwacwana rundi kubihwerekereza,

⁸baitu ihanga eri kakuba lifuuhya obubi bwalyo, eki nkaba ngambire nti ninyija kukikora, tinkikora.

⁹Kandi kakuba ngamba nti, ninyija kutaho rundi kugumya ihanga,

¹⁰baitu ihanga eri likanga kumpurra kandi likakora ebibi, eki nkaba ngambire kubakorra tinkikora.

¹¹Habweki, ogambire abantu ba Yuda n'abasi ba Yerusaalemu oti: ‘MUKAMA naagamba ati, ntegekere kandi nyeteekaniize kubafubira. Mwegarukemu, buli omu aruge omu muhanda gwe omubi, musemeze engeso zanyu n'ebikorwa byanyu.’

¹²“Balikugarukamu bati, ‘ebyorukugamba byabusa! Itwe nitugonza kukora nkooku turukwenda; buli omu omuli itwe, naagonza kukora omutima gwe omubi ebi gurukumugambira.’

¹³Habweki, MUKAMA naagamba ati: Mukaguze amahanga goona, n'oha arahuliireho ekintu nka kinu? Isirairi empikirre, akozire ekintu ekibi muno.

¹⁴Ebirika ebya Lebbanoni biruga ha myandara ey'omu kisaka? Amaizi g'ensozi agarukuruga hara gooma? Ebyambu ebirukugera amaizi agarukufuka, biihwaho?

¹⁵Baitu abantu bange banyeberwe, embandwa nizo bacumiikirra obubbaani; nibatabaijukira omu mihanda yabu, omu nguudo enkuru, bakwasire obuhanda obwa harubaju, ikuute balyangire.

¹⁶Ensi yabu bagifoire kintu eky'okutiinwa, kintu eky'okusiimuzibwaga ebiro byona. Weena anyakugirabaho atiina kandi ahungya omutwe.

¹⁷Nk'ecuucu erukucucuurwa omuyaga ogwa Burugaizooba, nukwo ndibabarangya omumaiso g'abanyanzigwa baabu; obu baliba bali omu kabi, ndibateera amabega, tindibeeyoleka.”

¹⁸Abantu nubwo baagambire bati “Yeremiya onu tugire eki turaamukoraho. Obutoosa nihaija kubahoga banyakatagara ab'okutwegesa, abantu abanyamagezi ab'okutuha amagezi n'abarangi ab'okurangaga ebigambo bya Ruhanga. Tumunyegerre, kandi tuleke kuhurra ebi arukugamba.”

¹⁹Nubwo nayesengeriize ningamba nti, Ai MUKAMA ohurre eki ndukugamba, kandi ohurre abanyanzigwa bange ebi barukungambaho.

²⁰Ekirungi kisasurwamu ekibi? Bandimiire obuhya banyite. Oijuke nkooku nakwemeriire omumaiso nabatonganirra, nukwo oleke kubabiihirirwa

²¹Habweki, abaana baabu banagire kiihe; obaleke bagwe ha bwogi bw'empirima. Bakazi baabu bafeerwe abaana na baibabo. Abasaija baabu baitwe kagingo Abasigazi baabu baitwe empirima bagwe omu bulemu.

²²Obu olibaleetera omunyagi ow'atalengeriirwe, omu maju gaabo nihakahulirwemu eboroogo! Habwokuba bakandimira obuhya mbugwemu bakantega emitego ngirubatemu.

²³Ai MUKAMA, baitu iwe omanyire encika yabu yoona ey'okunyita. Otabaganyira obubi bwabo, kandi oteebwa ekibi kyabo. Obahwerekereze, kandi obakoleho obiihiirwe.