Read Runyoro - rutooro Yer 19 Bible Online

Yer 19 - Runyoro - rutooro bible

Yer 19

¹Hanyuma MUKAMA nubwo yagambiire Yeremiya ati, “Genda ogule ensoha y'omubumbi ey'ibumba, otwale abamu ha bantu abakuru n'abamu ha banyakatagara abakuru,

²ogende hakihanga ekya mutabani wa Hinoomu ekinyakuli ha ntaaho y'irembo ly'enguhyo, nuho orangiriirre ebigambo ebi ndaakugambira.

³Ogambe oti, ‘Inywe abakama ba Yuda n'abasi ba Yerusaalemu, muhurre ekigambo kya MUKAMA. MUKAMA ow'amahe Ruhanga owa Isirairi naagamba ati ninyija kuleetera ekiikaro kinu akabi, weena ow'alikakihurraho, amatu galimworra.

⁴Habwokuba abantu abanfurukire baasiisa ekiikaro kinu, nibakitambirirramu embandwa ebyonzira by'embandwa, bbo, baisenkurubo noobwakubaire abakama aba Yuda ababatakamanyahoga. Ekiikaro kinu bakiitiiremu abantu baingi abataina musango,

⁵kandi bombekiire Baali amatambiro nuho bookeze batabani baabu omumurro, babe bihongwa ebyokiibwe ebihongiirwe Baali. Eki tinkakibaragiraga; n'okukiteekereza, tinkakiteekerezaaga.

⁶Habweki, MUKAMA naagamba ati, akasumi kalihika, obu, ekiikaro kinu, tikiryongerwa kwetwa Tofesi, rundi ekihanga kya mutabani wa Hinoomu, baitu kiraayetwaga ekihanga eky'afeero.

⁷Kandi omu kiikaro eki, nuho ndidibiza entegeka za Yuda na Yerusaalemu, kandi nuho ndiikiririza abanyanzigwa baabu bahahwerekereze n'empirima, babanage omu bulemu, baitwe abantu abaategekerwe kubaita. Emitumbi yabu, ndigihiira amahungu ag'omu mwanya n'enyamaiswa ez'omu kisaka.

⁸Ekiikaro kinu, ndikifoora kintu eky'okutiinwa, kintu eky'okwesiimuliza; habw'obubi bwona obw'ekiikaro kinu, weena ow'araakirabahoga, araatiinaga muno kandi ayesiimuze.

⁹Abanyanzigwa baligota orubuga nibenda kwita abantu baarwo. Balirugotera kimu, n'amaani abantu ab'omunda y'orubuga, balyengana, noobwakubaire abaana baabu bonyini babalye.’

¹⁰“MUKAMA nubwo yandagiire ati nkwate ensoha, abantu abankaba ngenzire nabo nibarora,

¹¹kandi mbagambira ngu MUKAMA ow'amahe naagamba ati: ‘Omuntu nkooku ayata ensoha y'omubumbi, etasoborra kimu kugaruka kubumbirirwa, Nanyowe nukwo ndukwija kukora abantu banu n'orubuga runu. Abantu habwokuburwa handi hoona ekiikaro eky'okuziikamu, baraaziikwaga Tofesi.

¹²MUKAMA naagamba ati, ekiikaro kinu, nukwo ndukwija kukikora nti, hamu n'abantu baakyo, abarukufoora orubuga nka Tofesi.

¹³Amaju ga Yerusaalemu n'amaju g'abakama ba Yuda, amaju goona agaacumikiriirweho obubbaani ebintu byona eby'omumwanya ha rusu rwago, kandi agaaseesiirweho embandwa ebihoongwa eby'okunywa galisiisikara nk'ekiikaro Tofesi.’ ”

¹⁴Yeremiya nubwo yarugire Tofesi, MUKAMA nambere akaba amutumire kuranga, yayemerra omu zigati y'enju ya MUKAMA yagambira abantu boona ati:

¹⁵“MUKAMA Ruhanga owa Isirairi naagamba ati orubuga runu n'embuga zaarwo entoito, ninyija kuruleetera akabi koona aka narugambiire, habwokuba abantu bakagumanganiza engoto, baayanga ebigambo byange.”