Read Runyoro - rutooro Yer 2 Bible Online

Yer 2 - Runyoro - rutooro bible

Yer 2

¹MUKAMA akangambira ati,

²“Genda orangirre, Yerusaalemu ehuliriize, oti MUKAMA naagamba ati, ninyijuka engonzi ez'obuto bwawe, nkooku wangonzaaga nk'abantu abaswerangaine juba nkooku wamponderaga nooraba omwirungu, nooraba omunsi etakasigwamuga.

³Isirairi akaba naayera hali MUKAMA, nuwe bijuma eby'omuganuro eby'igesa lye.” Boona ababiriireho bakacwa omusango bagwerwa akabi.

⁴Iwe enju ya Yakobbo, n'ebitabu byona eby'enju ya Isirairi, muhurre ekigambo kya MUKAMA.

⁵MUKAMA naagamba ati: “Baisenkuru inywe bakandoramu kabi ki, nukwo bandugeho bagende, beeteho ebintu ebitaroho, nabo nukwo babe bataroho?

⁶Batakaguze ngu, ‘MUKAMA ayatwihire omunsi Misiri, ayatwebembiire omwirungu, omunsi ey'amarungu n'ebiina, ensi ey'ekyanda kandi ey'omwirima kasira, ensi etarabwamu muntu n'omu, etaikarwamu muntu, ali nkaha?’

⁷Nkabaleeta omunsi ey'omweru, mulye ebyokulya byayo, mwegondeze omu birungi byayo. Baitu obu mwagihikiremu, ensi yange mwagisiisa, kandi obugwetwa bwange, mwabufoora kinugwa.

⁸Baanyakatagara batakaguze ngu, ‘MUKAMA ali nkaha?’ Abo abanyakutaho Ebiragiro batammanye; abalemi bakanyemera; abarangi bakaranga omwibara lya Baali, baayetaho ebintu ebitaina mugaso.

⁹Habweki, MUKAMA naagamba ati, nikyo ndukuhakanira nainywe, kandi nikyo ndihakanira n'abaijukuru banyu.

¹⁰Mugende ha mikungu ya Kitimu murole, rundi mutume Kedara, mwetegereze mutaireho omutima; murole ekintu nk'eki, obu kiraaba kirabaireho.

¹¹Haroho ihanga erirahingisize baaruhanga baalyo noobu baraaba bataina mugaso naakake? Baitu abantu bange, bakahingisa ekitiinisa kyabo, habw'ekintu ekitaina mugaso.

¹²MUKAMA naagamba ati, ‘Iwe iguru; eki kikucwe enkizi, kikuhunirize muno, omarweho obujune’

¹³Habwokuba abantu bange bakozire ebibi bibiri: barugireho nyowe ensoro ey'amaizi agoomeeza, baayekorra amaziba, amaziba aganyakurumu enyatika, agatasobora kwikarwamu maizi.

¹⁴Isirairi aba mwiru? Mwiru ayazairwe omuka? Kiki ekyamuleetiire kuhiigwa?

¹⁵Entale nizimubbukurra omumaiso, zibbukwiire muno. Ensi ye zigifoire itongo; embuga ze bikamburro, tiharumu muntu.

¹⁶Kandi ekindi abasaija ba Menfisi na ba Tahapanihesi, nubo baakwasire oruhanga.

¹⁷Eki, otakyereetere wenka noofuruka MUKAMA Ruhanga wawe, kandi kunu yakwebemberaga omu muhanda

¹⁸Hati, omu kugenda Misiri kunywa amaizi g'ekisaaru Nairo, noihamu magoba ki? Rundi omu kugenda Asiriya kunywa amaizi g'ekisaaru Efuraate noihamu magoba ki?

¹⁹MUKAMA Ruhanga ow'amahe naagamba ati: Obubi bwawe nubwo bulikufubira, kandi okwangana kwawe nukwo kulikusingisa omusango. Omanye kandi oyetegereze nkooku kiri kibi kandi ky'okusaalirwa hali iwe, kurugaho MUKAMA Ruhanga wawe; tokyantiina.

²⁰Habwokuba, hahingwire omwanya mukooto oyecwiremu ekikoligo, oyesumurwiremu enjegere; kandi wagamba oti, ‘Tindukwija kuheereza.’ Mazimakwo, wainamaga ha buli kasozi koona akaraihire, na hansi ya buli muti gwona ogujumbire, nuho waramizaaga ba ruhanga ab'oruzaaro oli nka Malaaya.

²¹Nobwoliba wakozire ebi byona nkakubyara oli muzabbibbu ogutongoirwe, ogurugire omu mbibo enungi mali. Okasiisikara ota kufooka muzabbibbu ogw'omu kisaka?

²²MUKAMA naagamba ati, noobu oraayoga omukeneko n'esabbuni enyingi muno, ekitoonyezi kyawe eky'ekibi, nabwo ninkyakirora.

²³Osobora ota kugamba ngu oteesiise, ngu tokaramyaga Baali? Orole nkooku wasiisire omu kihanga orole ebi wakozire. Iwe ebuguma y'engamiya erukutiga, erukwirukairuka omu mihanda yayo.

²⁴Haa, iwe entulege ey'omu iswa enyakumanyiire irungu, obu eba eteegere enyakukaga omuyaga! N'oha asobora kugitanga ek erukwegomba? Enimi ezinyakugiserra, tizisiiba zaayejwahize; okwezi kwayo obu kuhika, zigizoora.

²⁵Ebigere byawe otalibibuzaaho enkaito, n'omumiro gwawe kukarakara habw'iroho. Baitu iwe okagamba oti, ‘Eki tikirukwita kantu, habwokuba nyowe nkagonza abanyamahanga, kandi nubo ndikuraatira.’

²⁶Nk'omusuma okwaswara obu aba akwasirwe, n'enju ya Isirairi nukwo eriswara: Abaisirairi, abakama baabu, abanyoro baabu, banyakatagara baabu n'abarangi baabu,

²⁷abanyakugambira omuti ngu, ‘Niiwe isenyowe,’ n'abanyakugambira ibaale bati ‘Niiwe wanzaire.’ Habwokuba bakanteera amabega, batampindukire. Baitu obu baba bali omukabi nubwo bagamba bati, ‘Imuka otujune!’

²⁸Embandwa ezi mwayekoliire, ziri nkaha? Obu ziraaba nizisobora obumurabaga muli omu kabi ziije zibajune! Iwe Yuda, embuga zawe nambere zirukwingana obwingi, n'embandwa zaawe nuho zirukwingana.

²⁹MUKAMA naagamba ati, nimumpyemererra ki? Inywe Inywena mukanyemera.

³⁰Nkajwahira busa kuteera abaana banyu bataikirize kugororwa; empirima yanyu yonyini, nukwo kutematema abarangi banyu nk'entale enyakutuubire.

³¹Inywe abomulembe gunu, mute omutima ha kigambo kya MUKAMA. Isirairi, nkamufookera irungu, rundi nsi ey'omwirima kasira? Kiki ekirukugambisa abantu bange ngu, ‘twina obugabe titulyongera kugaruka nambere oli’?

³²Omwisiki asobora kwebwa ebintu eby'okwesemeza, rundi omugole omukazi asobora kwebwa ebyokujwara bye? Baitu abantu bange bakanyebwa ira muno muno.

³³K'omanya kurungi omuhanda ogw'okuserra enganzi zaawe! Ekyarugiremu, noobwakubaire abakazi ababi, okabeegesa engeso zawe.

³⁴Na ha byokujwara byawe, hazookereho esagama y'abanaku abataina musango; otabasange nibacwa enju nukwo bataahe. Baitu noobu oliba wakozire ebi byona,

³⁵noogamba oti, ‘Tinyina musango; mazimakwo MUKAMA takyayongera kumbiihirirwa.’

³⁶Ka kikwanguhira kujeerajeera n'okuhingisa emihanda yawe! Asiriya nkooku yakuswaize, na Misiri nukwo erukwija kukuswaza.

³⁷Nayo oligirugamu ogende oyetwekere emikono, habwokuba abo aba oyesiga, MUKAMA akabaanga, kandi tolibaihamu karungi.