Read Runyoro - rutooro Yer 20 Bible Online

Yer 20 - Runyoro - rutooro bible

Yer 20

¹Pasuhara nyakatagara mutabani wa Imeri, ow'akaba ali mulemi omukuru omunju ya MUKAMA, obuyahuliire Yeremiya naaranga ebintu ebi,

²yaragira Yeremiya omurangi ateerwe, hanyuma akwatwe omu nkomo eya ha irembo eryatwaraga omunju ya MUKAMA.

³Ha kiro ekya kurasireho Pasuhara obu yaihire Yeremiya omu nkomo, Yeremiya yamugambira ati, “MUKAMA tarukukweta Pasuhara, baitu naakweta kagingo ha mbaju zoona.

⁴Habwokuba MUKAMA naagamba ati: Ninyija kukuleetera kwetiina iwe wenka n'okutiinwa banywani bawe. Abanyanzigwa baabu balibaisa empirima oroleriire oti. Yuda yoona ndigirekera omukama wa Bbabbulooni; alibanyaga abatwale Bbabbulooni abaise empirima.

⁵Tindigarukira aho honka, obuguuda bwona obw'orubuga runu, amagoba gaarwo, ebintu byarwo byona eby'omuhendo, itungo lyona ery'abakama ba Yuda, byona abanyanzigwa baabu, babinyage, babikwate babitwale Bbabbulooni.

⁶Iwe Pasuhara n'eka yawe yoona, mulinyagwa mutwarwe Bbabbulooni; oku nuho oligwa kandi nuho oliziikwa hamu na banywani bawe boona aba warangiire ebisuba.

⁷Ai MUKAMA okambiiha, nabiihwa; nonkiza amaani, nikyo wansiinguliire nsiiba ninsekerezibwa izooba lyona; buli muntu nansekeereza.

⁸Buli kubaza, nteera enduuru, nyamuza nti, okunyaga n'okuhwerekereza!” Habwokuba ekigambo kya MUKAMA, kindeetiire kusiiba ninjumwa kandi ninsekerezibwa.

⁹Obu ngira nti, “Tingambe MUKAMA, rundi tinyongere kubaza omu ibara lye,” omu mutima gwange, hasisana oti harumu omurro ogurukwaka ogumbohiirwe omu magufa, mpurra njwahire kugwikazaamu, kandi ndemwa.

¹⁰Habwokuba nimpurra baingi nibahwehweterra hoona hoona ngu haliyo kukangwa! Mumunyegerre Banywani bange nfe-nanfe abategeriize kurora nkooku ndukugwa, nubo barukugamba bati, “Mumunyegerre. Itwena tumunyegerre; nibagamba bati rundi yaakubiihwa, obu nubwo tusobora kumusingura n'okumuhoora enzigu.”

¹¹Baitu iwe MUKAMA ow'amaani kandi ow'obusobozi oli na nyowe; habweki abo abarukumpiiganiza balyesiitara, tibalinsingura. Ensoni ziryenda kubaita, habwokuba baliremwa. Okuswara kwabo kuraijukwaga ebiro byona.

¹²Ai MUKAMA ow'amahe anyakwekebiija abahikiriire, anyakurora emitima n'ebiteekerezo, onyikirize ndole nkooku orukubahoora enzigu, habwokuba niiwe nakwasize omusango gwange.

¹³Muzinire MUKAMA; mukugize MUKAMA, habwokuba ajunire omuseege, yamwiiha omu mikono y'enkozi z'ebibi.

¹⁴Ekiro eki nazaaliirweho nikikaigale! Ekiro Nyina-nyowe eki yanzaaliireho, kitaliheebwa omugisa!

¹⁵Omusaija ogu ayagambiire isenyowe ati, “Ozaire omwana w'obwojo,” yamusemereza, naakaigale.

¹⁶Omusaija ogu, naakabe nk'embuga, MUKAMA ezi yahwerekeriize atarukuganyira; Naakahurre empamo omu bwire bwa nyenkya, kandi naakahurre enduuru omu ihangwe,

¹⁷habwokuba ntafeere omunda; nyina-nyowe nubwo yaakubaire kituuro kyange, kandi enda ye, yakubaire y'ekitiinisa ebiro byona.

¹⁸Nkazaalirwa ki, nkazaalirwa kugada n'okubona enaku, n'okumara obwomeezi bwange nyina ensoni?