Read Runyoro - rutooro Yer 21 Bible Online

Yer 21 - Runyoro - rutooro bible

Yer 21

¹Omukama Zedekiya owa Yuda, akantumaho Pasuhara mutabani wa Malikiya na Zefaniya mutabani wa Maaseya, naasaba ati:

²“Tukwesengeriize, otubalize na MUKAMA, habwokuba omukama Nebbukadaneza owa Bbabbulooni agosire orubuga hamu n'ihe rye. MUKAMA rundi araatukorra ekimu ha by'amahano bye, ahambirize Nebbukadaneza agaruke enyuma.”

³Yeremiya nubwo yabagarukiremu ati:

⁴“Mugambire Zedekiya muti, ‘MUKAMA Ruhanga wa Isirairi naagamba ati ihe ryawe erirukurwanisa omukama wa Bbabbulooni, ninyija kulisingura. Ebyokurwanisa by'abaserikale bawe, ninyija kubituuma omurubuga hagati.

⁵Nyowe nyenka ninyowe ndukwija kukurwanisa n'amaani gange goona, nyina ekiniga, nyina obukaya, kandi mbiihiirwe muno.

⁶Ndiita boona abanyakuli omu rubuga runu; abantu n'ebisoro biriitwa endwara embi.

⁷Hanyuma MUKAMA yagamba ati, Zedekiya omukama wa Yuda n'abaheereza be, n'abantu ab'omu rubuga runu abaatabukire kagingo, ndibata ha mpirima mbanagire kiihe, mbalekere Nebbukadaneza omukama wa Bbabbulooni, abanyanzigwa baabu, n'abo abanyakugonza kubaita. Alibaisa obwogi bw'empirima; talibagirra mbabazi, talibaleka kandi talibaganyira.’

⁸“Hanyuma MUKAMA nubwo yandagiire kugambira abantu abo nti, ‘Muhurre! Nyowe MUKAMA, nimbaikiriza kwekomera omuhanda ogurukutwara omu bwomeezi n'ogurukutwara omu kufa.

⁹Omuntu ow'araikara omu rubuga runu, naija kwitwa empirima, kiihe na kagingo; baitu ow'araarugamu akeehongera Abakalidaaya abanyakubagosire, ogu nuwe alyoomeera, kandi obwomeezi bwe bulimubeera nk'omunyago.

¹⁰MUKAMA naagamba ati, mmaliriire kutaganyira orubuga runu, baitu ncwiremu kuruhwerekereza, nirwija kulekerwa omukama wa Bbabbulooni arusiiriirize kimu rugwe ha itaka.’

¹¹“MUKAMA akandagira kugambira eka ya Yuda ey'obukama,

¹²abaijukuru ba Daudi ebigambo binu: ‘Muhurre nyowe MUKAMA eki ndukugamba. Obwinganiza bube kintu kya buli kiro omuntu anyakukozirwe kubi, mujune ogu arukumukora kubi. Kitali eki, ekiniga kyange kirimekuka nk'omurro kyake kandi busaho noomu ow'alikiraaza.’

¹³MUKAMA naagamba ati, Iwe omusi ow'omu kihanga, iwe omwandara ogw'omu kyeeya, iwe anyakugamba ngu ‘N'oha ow'aliba naatuseesira kandi n'oha ow'alitutaahirra, nyowe ninkurwanisa?’

¹⁴MUKAMA naagambaho orubuga ati: Ndikufubira nindorra ha bikorwa byawe ndyokya ekikaali kyawe, omurro gwokeze kimu byona ebiruherraine.”