Read Runyoro - rutooro Yer 22 Bible Online

Yer 22 - Runyoro - rutooro bible

Yer 22

¹MUKAMA akandagira ati: “Genda omukikaali ky'omukama wa Yuda, nuho orangirre ekigambo kinu oti,

²‘iwe omukama wa Yuda anyakusinga ha kitebe ky'obukama ekya Daudi, iwe n'abaheereza bawe n'abantu bawe abanyakutaaha amalembo ganu.

³MUKAMA naagamba ati: Mukole ebyobwinganiza n'eby'obulyo, kandi omuntu anyakunyagirwe mumujune ogu arukumukora kubi mutalikora kubi. Kandi mutalinyaga omunyaihanga, enfuuzi, omufaakati, kandi omu kiikaro kinu, mutaliitiramu omuntu ataina musango.

⁴Obu mulikorakwo nkooku mbaragiire, baijukuru ba Daudi nubwo balyongera kulya obukama. Bbo hamu n'abalemi baabu, n'abantu baabu, balyongera kuraba omumalembo ag'ekikaali kinu, batembere ebigaali n'embaraasi.

⁵Baitu MUKAMA naagamba ati, ebigambo ebi obu mutalibitaho omutima, nyerahiire nyenka, enju enu eriba kitongo.’

⁶Habwokuba MUKAMA enju ya Yuda naagigambaho ati: “‘Nonsisanira nka Giryadi nk'akatwetwe ka Lebbanoni, baitu hataroho kugurakyagurukya, ndikufoora irungu, ndikuhindura mbuga ezitaikarwamu bantu.

⁷Ndikuteekaniriza abantu ab'okukukuhwerekereza, buli omu n'ebyokurwanisa bye; kandi emikogoto yaawe erikukirra kimu oburungi, baligitema bagihungule omu murro.

⁸Amahanga maingi garaarabaga ha rubuga runu, abantu baraayekaguzaaga bati: “Orubuga runu orw'ekitiinisa, habwaki MUKAMA yarukozire ati?”

⁹Baraayegarukamuga bati, “Habwokuba abantu bakacwa endagaano ya MUKAMA Ruhanga wabo baaramya embandwa, kandi baaziheereza.”’ ”

¹⁰Muleke kulirirra omuntu anyakufiire, kandi muleke kumuganya; baitu mulirirre muno ogu anyakugiire hara, habwokuba taligaruka kurora ensi ye ei yazairwemu.

¹¹Habwokuba Saluumu mutabani wa Yosiya omukama wa Yuda, ayatiire engoma ya ise Yosiya, kandi ayarugire omu kiikaro kye, MUKAMA naamugambaho ati: “Talyongera kugaruka hanu.

¹²Baitu omu kiikaro eki baamunyagire baamutwaramu, oku nuho aligwa, kandi ensi enu, taligaruka kugirora.”

¹³“Alikibona omuntu ogu anyakweyombekera enju, atarabire omu mihanda ey'obulyo, anyakweyombekera kainaabiri atahondiire obwinganiza; anyakukoleza busa omuntu omulimo, akalema kumusasura empeera ye.

¹⁴Anyakugamba ati: ‘Ninyija kweyombekera enju enkooto, ngitemu kainaabiri ey'ebisiika ebigalihire,’ ngitemu amadirisa, ngikingise embaaho ez'emikogoto ngisiige erangi erukunanata.

¹⁵Okwombeka amaju ag'embaaho ez'emikogoto, amarungi okukira ag'abandi nikyo ekirukufoora omukama arukukira abandi oburungi? Sso akeegonza muno, busaho ekyamubuzireho yakoraga eby'obwinganiza n'eby'obulyo, byona ebi yakoraga, nukwo kumugendera kurungi.

¹⁶Abanaku yabacweraga omu bwinganiza, byona nukwo kumugendera kurungi. Ago nugo amakuru ag'okumanya MUKAMA.

¹⁷Baitu iwe, amaiso gawe n'omutima gwawe, biri ha kwetungira ebintu eby'obugobya, ha kwita abantu abataina musango, ha kubonesa abantu na ha kutwaza amaani”

¹⁸Habweki, Yehoyakimu mutabani wa Yosiya, omukama wa Yuda MUKAMA naamugambaho ati: “Abantu tibalimuterra empamo nibagamba bati: ‘Ai bambi mugenzi wange!’ Rundi bati ‘Ai bambi munyanya-nyowe!’ Tibalimuterra empamo nibagamba bati ‘Ai bambi omukama!’ Rundi bati ‘Ai bambi Agutamba!’

¹⁹Aliziikwa nk'enkaina oku eziikwa, alikururwa ahungurwe hara muno enyuma y'amalembo ga Yerusaalemu.”

²⁰“Genda Lebbanoni oteere enduuru, kandi oyamulize Basani; oyeme Abarimu oteere omukungo, habwokuba enganjani zawe zoona zihwerekeriire.

²¹Nkakugambira oina obusinge otungire baitu wagamba oti ‘tindukwija kuhurra.’ Okuruga omu buto bwawe, okutampurra niyo yabaire ngeso yawe.

²²Abaliisa bawe boona nibaija kuhuhuurwa omuyaga gubatwale omu malisizo agandi, enganzi zawe zinyagwe habw'obubi bwawe obu bwona nukwo oswale kandi osoberwe.

²³Iwe omusi wa Lebbanoni, ayayombekere hagati y'emiti emikogoto, obu olihikwaho obusaalizi nk'obwomukazi arukurumwa kuzaara olisinda ota!”

²⁴MUKAMA n'agamba ati “Ndahiire, Koniya mutabani wa Yehoyakimu omukama wa Yuda, noobu nuwe yakubaire empeta ey'emanyiikirizo ei njwaire ha rukumu orwange orw'omukono ogw'obulyo, nabwo naakukwihireho,

²⁵nkukwasa abo abarukwenda kukwita, nkulekere abo aborukutiina, nkukwasa noobwakubaire Nebbukadaneeza omukama wa Bbabbulooni n'Abakalidaaya.

²⁶Iwe na nyoko kikuzaara ndibacumiriza mbatwale omunsi endi ei mutarazairwemu, oku nuho muligwa.

²⁷Mulyegomba kugaruka kurora ensi enu, baitu timuligaruka ebiro byona.”

²⁸Omusaija Koniya ogu, kinugwa ekirukugaywa, kinaga ekitarukwendwa muntu? Uwe n'abaana be, nikyo baazaahisiziibwe, baatwarwa omunsi ei batamanyire?

²⁹Iwe ensi, ensi, ensi, ohurre ekigambo kya MUKAMA!

³⁰MUKAMA n'agamba ati: “Omusaija onu omuhandiike nk'atarazaire baana, nuwe omusaija atalitunga mugisa omu bwomezi bwe; habwokuba ha ruzaaro rwe, busaho n'omu ow'alisobora kwikarra ha kitebe ky'obukama ekya Daudi akagaruka kulema omunsi Yuda.”