Read Runyoro - rutooro Yer 23 Bible Online

Yer 23 - Runyoro - rutooro bible

Yer 23

¹“MUKAMA naagamba ati, Balikibona abaliisa abanyakuhwerekereza kandi bakararangya entaama ez'iriisizo lyange.”

²MUKAMA Ruhanga owa Isirairi, kinu nikyo arukubazaaho abalemi, abaahairwe omulimo ogw'okurolerra abantu be: “Abantu bange mutabarolerre; mukabararangya mwababinga. Hati ninyija kubafubira habw'ekibi eki mwakozire.

³Abantu bange abaasigaireho, ndibasorooza mbaihe omunsi ezi nabararangizemu mbagarre omunsi y'owabo. Balizaara abaana baingi bakanye.

⁴MUKAMA naagamba ati, “Nditaho abaliisa ab'okubarolerra, tibaligaruka kutiina n'okukangwa, kandi tihaligaruka kuburaho muntu n'omu.

⁵“MUKAMA naagamba ati, Akasumi kalihika nkome omwijukuru omurungi omu baijukuru ba Daudi alye obukama. Omukama ogu, alirema n'amagezi, kandi alikora ebyobulyo n'eby'obwinganiza omunsi yoona.

⁶Omu businge bwe Yuda nubwo alijunwa, kandi Isirairi nubwo aligwagwana. Kandi linu, niryo ibara eri alirukwa: ‘MUKAMA nuwe kujunwa kwaitu.’

⁷“MUKAMA naagamba ati, akasumi kalihika abantu aka batalyongera kugambiramu ngu ‘Ndahiire MUKAMA omwomeezi ayaihire abantu ba Isirairi omunsi Misiri,’

⁸baitu baraagambaga bati, ‘Ndahiire MUKAMA omwomeezi ayaihire kandi ayayebembiire abaijukuru b'enju ya Isirairi kubaiha omunsi ey'omu matemba, n'omunsi ezindi zoona ezi nkaba mbararangiizemu.’ Nukwo baikale omunsi yabu yonyini.”

⁹Habw'ebyabarangi: Omutima nigunsarra omunda, amagufa gange goona nigatukumira; ninsisana nk'omutamiizi nk'omuntu anyakunywiire eviini yamuhingurana, anyakurugireho MUKAMA, kandi arugireho ebigambo bye ebirukwera.

¹⁰Habwokuba ensi ijwiire abasiihani; nerra habw'omukyeno, kandi amaliisizo ag'omwirungu goomiire kimu. Omuhanda gwabo mubi, kandi obusobozi bwabo tibuli bw'obulyo.

¹¹MUKAMA naagamba ati, “Abarangi na banyakatagara tibarukugonza Ruhanga; mbakwasire nibakora ebibi omunju ya Ruhanga yonyini.

¹²MUKAMA naagamba ati: Habweki omuhanda gwabo, guraabasisanira obuhanda oburukuterra omu mwirima. Nubwo balisindikwamu bagwe; habwokuba omu mwaka ogw'ekifubiro kyabo, nubwo ndibaleetera akabi.

¹³Omu barangi aba Samaliya, nkabonamu ekintu ekibi: bakaranga omu ibara lya Baali, kandi baahabisa abantu bange Abaisirairi.

¹⁴Baitu omu barangi aba Yerusaalemu mboinemu ekintu ekibi: beemaliire ha rwanju kandi nibabiiha ebisuba; nibasagika enkozi z'ebibi, nukwo haleke kubaho n'omu afuuhya obubi bwe. Boona nibansisanira nka Sodomu, kandi abasi b'orubuga oru, nibanzookera nka Gomora.”

¹⁵Habweki MUKAMA ow'amahe, abarangi naababazaaho ati: “Ninyija kubaliisa ekibiriizi mbanywise amaizi agarumu obutwa; habwokuba abarangi ba Yerusaalemu tibarukugonza Ruhanga, kandi eki bakituliire ensi yoona.”

¹⁶MUKAMA ow'amahe naagamba ati “Muleke kuhurra ebigambo by'abarangi abo abarukubarangira; abarukubanihiza ebitaroho; nibabaza ebintu ebi barukwehangahanga bonka tibarukubaza ebigambirwe MUKAMA.

¹⁷Baikara nibagambira abo abanyakugaya ekigambo kya MUKAMA, bati, nimwija kuba kurungi, kandi weena ayakadadaire, arukukuraatira ebiteekerezo by'omutima gwe, nibabagambira bati, timulihikwaho kabi.”

¹⁸N'oha omuli bbo ayayemeriire omu rukurato rwa MUKAMA nukwo ayetegereze kandi ahurre ekigambo kye rundi n'oha ayataireho omutima yahuliriza?

¹⁹Ekiniga kye ihunga, kiyaga eky'amaani, ekiryaakira ha mitwe y'ababi,

²⁰kandi tikirukwija kukangira aho, kiryeyongera okuhika obwalikamara byona ebi yategekere kukora. Omubiro eby'omumaiso, kinu nubwo mulikyetegereza kurungi.

²¹MUKAMA naagamba ati: “Abarangi abo ntabatume, baitu noobu ntarabatumire, bakagenda, ntabagambire bigambo, noobu ndaaba ntarabagambiire, baitu bakarangira omu ibara lyange.

²²Obu baakubaire beemeriire omu rukurato rwange, obu nubwo baakubaire barangiriire abantu bange ebigambo byange, nubwo baakubaire babacwisize engeso zaabu embi, kandi nubwo baakubalekeseze ebikorwa byabo ebibi.

²³“MUKAMA naakaguza ati: ninyowe Ruhanga anyakwikara haihi baitu tindi Ruhanga anyakwikara hara muno?

²⁴Omuntu asobora kwesereka omu biikaro ebya ha rubaju, ngu tiimubone? MUKAMA naagamba ati, tininyowe anyakwijura iguru n'ensi?

²⁵Abarangi abo abarukuranga ebisuba omu ibara lyange, mpuliire ebi bagambire ngu ‘Ndoosirege, ndoosirege!’

²⁶Ebisuba ebinyakwikara omu mitima y'abarangi, abaranga ebisuba n'obucwangya obwo omu mitima yabo, birihikyankaka?

²⁷Abanyakuteekereza kwebesa abantu bange ibara lyange, nka baisenkurubo oku baalyeberwe habwa Baali nibabagambira ebirooto ebi barukugambirangana balihikya nkaha?

²⁸Omurangi ayaroosire ekirooto, akirange naagamba ati, kinu kyange nyenka! Kandi ngu ou nagambiire ekigambo, akirangirre n'obwesige. MUKAMA naagamba ati, embuba n'engano, bigira kakwatane ki?

²⁹Ekigambo kyange, kisisana nk'omurro, nk'enyondo kasasangura myandara.

³⁰Habw'obulyo obu, ndi muzigu w'abarangi abo abarukwihanganaho ebigambo by'abo bonka na bonka, bakabirangirra, ngu byange.

³¹MUKAMA nagamba ati kandi ndi muzigu w'abarangi abarukwebaliza ebigambo ebyabu byonka, kandi bakagamba ngu bakatumwa nyowe.

³²Muhurre MUKAMA eki arukugamba ndi muzigu w'abarangi abarukuranga ebirooto ebi baroosire bonka ebiijwiire ebisuba. Ebirooto ebi nibyo barukuranga, nibahabisa abantu bange n'ebisuba byabo n'okwenyumiza kwabo, ntabatume, kandi ntabaragire kugenda, tibaina eki barukugasiraho abantu n'akake konka.

³³“Omu ha bantu banu, omurangi rundi nyakatagara kakuba akukaguza ati, ‘Omugugu gwa MUKAMA niguha?’ Mubagarukemu muti, ‘Niinywe mugugu gwe, kandi MUKAMA naagamba ati, ninyija kubararangya.’

³⁴Kandi omurangi, nyakatagara, rundi omu ha bantu arukugamba ati: ‘Omugugu gwa MUKAMA’ omuntu ogu ndimufubira n'eka ye.

³⁵Mugambe muti, omutaahi akaguze omutaahi, owanyinamuntu, alibaliza owanyina naagamba ati, ‘MUKAMA agarukiremu ki?’ Rundi ati, ‘MUKAMA agambire ki?’

³⁶Baitu mulekere aho kwekoonyeza ebigambo ‘Omutumba gwa MUKAMA’, habwokuba, nkooku murukuhindahindura ebigambo bya Ruhanga omwomeezi, MUKAMA ow'amahe Ruhanga waitu, omuntu ow'araabazaaga ebigambo ebi mazimakwo, birimufookere mugugu.

³⁷Olikaguza omurangi oti, ‘MUKAMA akakugarukamu ki?’ Rundi muti ‘MUKAMA agambire ki?’

³⁸Kakuba mugamba muti ‘Omugugu gwa MUKAMA’ MUKAMA nubwo araagamba ati: Habw'okwekoonyeza ebigambo binu, ‘Omugugu gwa MUKAMA’; kandi kunu mmazire kubahabura nti, ‘Mutagaruka kugamba muti, Omugugu gwa MUKAMA,

³⁹Nyowe nyenka ninyija kubakwata, inywe n'orubuga oru nabahaire, kandi oru nahaire baisenkuru inywe, mbahungule munduge omumaiso.

⁴⁰Ndibaleetaho ekijumo ekitalihwaho, ndibaleetera ekihemu eky'ebiro n'ebiro, kandi ekitasobora kweba.’ ”