Read Runyoro - rutooro Yer 24 Bible Online

Yer 24 - Runyoro - rutooro bible

Yer 24

¹Nebbukadaneeza omukama wa Bbabbulooni, obu yamazire kwiha Yerusaalemu Yekoniya mutabani wa Yehoyakimu omukama wa Yuda, hamu n'abalemi ba Yuda, n'abafundi n'abaheesi, abazaahisize abatwaire Bbabbulooni, MUKAMA akaanyoleka ekintu kinu: Nkarora ebigega by'emitini bibiri, biteekerwe omumaiso g'Enju ya MUKAMA.

²Ekigega ekimu, kikaba kirumu ebijuma ebirungi muno, nibisisana nk'ebijuma eby'omuganuro ebibandize kwenga, baitu ekigega ekindi kikaba kirumu ebijuma ebibi cuu, ebibi mali ebitarukusobora n'okuliibwa.

³MUKAMA yankaguza ati, “Yeremiya, noorora ki?” Nagarukamu nti “Nindora ebijuma by'emitini ebirungi, ebirungi muno, n'ebibi ebihinguraine, ebitasobora n'okuliibwa.”

⁴MUKAMA nubwo yangambiire ati:

⁵“MUKAMA Ruhanga owa Isirairi, naagamba ati: Abantu abaarugire omba Yuda abaazaahisiibwe, aba nabingire omu kiikaro kinu, nabatwara omunsi y'Abakalidaaya, nimbarora bali barungi, nk'ebijuma by'emitini binu.

⁶Ninyija kwikara mbataireho eriiso babe n'obusinge kandi ndibagarra omunsi enu, ndibombeka tindibaseesa, ndibabyaara, baitu tindibameenya.

⁷Ndibaha omutima ogw'okumanya nkoooku ndi MUKAMA; baliba bantu bange, na nyowe mbe Ruhanga wabo, habwokuba, balingarukira n'omutima gwabo gwona.

⁸“Baitu MUKAMA naagamba ati: Nk'ebijuma by'emitini binu ebibi, ebibi mali ebitasobora n'okuliibwa, nukwo ndikora nti Zedekiya omukama wa Yuda, abanyoro be, endagalikwa eza Yerusaalemu abakyali omunsi enu n'abo abarukwikara omunsi Misiri, nukwo ndibakora nti.

⁹Ndibaleetera kutiinwa abakama boona ab'ensi, ndibaleetera kujumwa, okwacwibwahoga orufumo, okuswahirizibwa n'okukonderezibwa omu biikaro byona ebi, ndibabingiramu.

¹⁰Kandi ndibaleetera kucwekerwa obulemu, kugwerwa kiihe na kagingo, okuhika obu balikahwerekererra kimu, bakahwa omunsi ei nabahaire, kandi ei nahaire baisenkurubo.”