Read Runyoro - rutooro Yer 25 Bible Online

Yer 25 - Runyoro - rutooro bible

Yer 25

¹Omu mwaka ogwa kana ogwa Yehoyakimu mutabani wa Yosiya omukama wa Yuda, nugwo omwaka ogw'okubanza ogwa Nebbukadaneza omukama wa Bbabbulooni, Yeremiya akagambirwa ekigambo ekirukukwataho abantu ba Yuda boona,

²ekigambo eki, Yeremiya omurangi akakigambira abantu boona, n'abasi ba Yerusaalemu boona, naagamba ati:

³“Okumara emyaka amakumi abiri n'esatu okuruga ha mwaka ogwa ikumi n'esatu ogwa Yosiya mutabani w'Amooni omukama wa Yuda, okuhika ha kiro kinu, MUKAMA ataaha nangambira ekigambo na nyowe nkaikara ninkibagambira, baitu mutahurre.

⁴MUKAMA noobu araaba yaikaraga naabatumira abaheereza be boona abarangi,

⁵naagamba ati, ‘Inywena muhinduke, buli omu acwe engeso ze embi kandi afuuhye ebikorwa bye ebibi nukwo mwikale omunsi MUKAMA ei yabahaire kandi ei yahaire baisenkuru inywe ebe yanyu buli na buli, mutahurre kandi mutatege matu.

⁶Muleke kuhondera embandwa kubaheereza n'okuziramya, n'okumbiihiza nimuramya ebisisani ebi mwakozire. Obu, tindibakora kabi.’

⁷MUKAMA naagamba ati, mutahurre, nukwo mumubiihize nimuramya ebisisani ebi mwakozire, mwereetere inywenka akabi.

⁸“Habweki, MUKAMA ow'amahe naagamba ati: Habwokuba mutahurre bigambo byange,

⁹ninyija kweta amahanga goona ag'obukiizi bw'emoso, na Nebbukadaneza omukama wa Bbabbulooni omuheereza wange, mbaleete barwanise ensi enu n'abasi baayo, barwanise amahanga ganu goona agaherraine nayo, ninyija kubahwerekerereza kimu, mbafoole kintu ky'okuhunaaza, ky'okwesiimuza kandi eky'okujumwaga ebiro byona.

¹⁰Tindigarukira aho, ndibafuuhyamu enseko n'okusemererwa, mbafuuhyemu abagole, alihulirwa orubengo orurukusa, kandi tihalizokamu taara erukwaka.

¹¹Ensi enu yoona erihwerekerezibwa libe itongo, kandi amahanga ganu galiheereza omukama wa Bbabbulooni okumara emyaka nsanju.

¹²MUKAMA naagamba ati, hanyuma emyaka nsanju obu erihwaho, ndifubira omukama wa Bbabbulooni n'ihanga eri, nfubire ensi y'Abakalidaaya habw'obubi bwabo, ngifoole itongo ery'ebiro n'ebiro.

¹³Byona ebi nagambireho ensi egi, kyona Yeremiya eki yarangireho amahanga ekinyakuhandiikirwe omu kitabu kinu, ndibikora.

¹⁴Habwokuba amahanga maingi n'abakama ab'ekitiinisa balibafoora bairu rubaale, ndibasasura nindorra ha bikorwa byabo; ninsigikira ha mirimo ei baakozire n'emikono yabu.”

¹⁵MUKAMA Ruhanga owa Isirairi akangambira ati: “Nyihaho ekikopo kinu eki nkwasire eky'eviini ey'ekiniga, okinywise amahanga goona aga ndaakutumaho.

¹⁶Banywe bataratale, bagwe iraro, nukwo beemere empirima ei ndaabanagamu.”

¹⁷Nanyowe nukwo kumwihaho ekikopo, nakinywisa amahanga aga yantumireho.

¹⁸Yerusaalemu n'embuga za Yuda abakama barwo n'abanyoro, embuga nzifoole matongo, mahamba kintu eky'okusiimuza n'okukondereza, okuhika na hati.

¹⁹Banu nubo abandi boona abanywire hakikompe eki. Faraaho omukama wa Misiri, abaheereza be, abanyoro be abantu be boona,

²⁰n'abanyamahanga boona abaikaraga nabo; abakama boona ab'ensi Uzi, n'abakama boona ab'ensi ey'Abafirisiti, (Asekelooni, Gaaza, Ekurooni n'endagalikwa ez'Asidoodi)

²¹Edomu, Mowabbu, na batabani b'Amooni;

²²abakama ba Taya boona abakama ba Sidoni boona, n'abakama aba hamukungu obuseeri bw'enyanja;

²³Dedani, Teema, Buuzi, n'abo boona abanyakwekona isoke;

²⁴abakama boona aba Buharabu n'abakama boona ab'amahanga goona agatabiraine aganyakwikara omwirungu;

²⁵abakama ba Zimuri boona, abakama b'Eramu boona, n'abakama b'Abameedi boona;

²⁶abakama ab'omu mambuka boona, aba haihi n'aba hara nkooku barukukuratana, n'amakama goona ag'ensi yoona aganyakuli omunsi. Abo obu balimara kunywa, omukama wa Bbabbulooni nawe nubwo anywe.

²⁷“Hanyuma mugambire abantu muti: ‘MUKAMA ow'amahe, Ruhanga owa Isirairi naagamba ati: Munywe mutamiire, kandi mutanake, mugwe kandi mutagaruka kwimuka, habw'empirima ei ndukwija kubanagamu.’

²⁸“Obu baraayanga kukwihaho ekikopo eki bakanywa, nubwo obagambire oti, ‘MUKAMA ow'amahe naagamba ati: nimusemerra Munywe!

²⁹Habwokuba ntandikire kukora akabi ha rubuga orwarukirwe ibara lyange, ninywe muraagurukwa ekifubiro? MUKAMA ow'amahe naagamba ati, timwagurukwe kifubiro, habwokuba nintumisa empirima ey'okurwanisa abasi ab'ensi yoona.’

³⁰“Habweki, obarangirre ebigambo binu noobagambira oti. ‘MUKAMA alyema omwiguru abbuukule, kandi alyema omu kiikaro kye ekirukwera agambe; alicoomera abantu be n'amaani kandi aliruruma nk'abantu abarukujunga emizabbibbu, alicoomera abasi boona ab'omunsi.

³¹Iraka lirihulirwa ha mpero z'ensi, habwokuba MUKAMA naajunaana amahanga; MUKAMA naagamba ngu, naija kucwera abantu boona omusango, kandi ababi baliitwa empiririma.’

³²“MUKAMA ow'amahe naagamba ati: Akabi nikaruga omu ihanga limu, nikagenda omwihanga erindi, kandi ihunga ririimuka omu bicweka eby'ensi ebya hara muno.

³³“Ha kiro eki emitumbi y'abantu abaliitwa MUKAMA, erigarangatana okuruga ha mpero emu ey'ensi, okuhika ha mpero endi. Abantu abo tibaliteererwa muranga, tibalisorozibwa, kandi tibaliziikwa; baliikara ha itaka eruguru, nk'obusa obunyakunagirwe ha rubuungo.

³⁴Inywe abaliisa, muborooge, mukunge, kandi inywe abakama b'igana, mwekulingule omu iju, habwokuba akasumi ak'okwitwa kwanyu n'okurarangibwa; kahikire, mulitemwa mugwe nk'amataagi amarungi.

³⁵Abaliisa tibaligira bwirukiro, kandi bakama b'igana tibalibona bwesumbiro.

³⁶Muhurre omukungo gw'abaliisa, muhurre bakama b'igana nibaborooga! Habwokuba MUKAMA nanyaga iriisizo lyabo,

³⁷kandi habw'ekiniga kya MUKAMA ekisaaliire, amasibiko ag'obusinge gahwerekereziibwe.

³⁸Nk'entale oku eruga omu bwingira bwayo na MUKAMA nukwo arugireho abantu be, obutiini bw'obulemu n'ekiniga kya MUKAMA ekisaaliire, ensi kizifoire itongo.”