Read Runyoro - rutooro Yer 26 Bible Online

Yer 26 - Runyoro - rutooro bible

Yer 26

¹Yehoyakimu mutabani wa Yosiya omukama wa Yuda obwakaba yakateera engoma MUKAMA akangambira ekigambo kinu ati,

²“MUKAMA naagamba ati: Oyemerre omu zigati y'enju ya MUKAMA, ogambire abantu ab'embuga zoona eza Yuda abanyakwija kuramiza omunju ya MUKAMA, ebigambo byona ebi ndaakuragira kubagambira; otasigayo ekigambo na kimu.

³Tibaikara kuhurra, buli muntu akacwa engeso ze embi, nukwo nkaleka akabi aka ndukwenda kubakoraho, habw'ebikorwa byabo ebibi ebi barukukora.

⁴Obagambire oti, ‘MUKAMA naagamba ati: Obu mutampurre mukakwata ebiragiro byange ebi nabateeriireho,

⁵kandi mukata omutima ha bigambo by'abaheereza bange abarungi aba nyikara nimbatumira, noobu muraaba mutahuliire,

⁶obu, enju enu ndaagikora eki nakozire Silo, kandi orubuga runu ndufoole kintu eky'okukyenwa amahanga goona ag'ensi.’ ”

⁷Baanyakatagara, abarangi n'abantu boona, bakahurra Yeremiya, n'abaliza ebigambo ebi omunju ya MUKAMA.

⁸Yeremiya obu yamazire kubaza byona MUKAMA ebi akaba amuragiire kubaliza abantu boona, banyakatagara, abarangi n'abantu boona nubwo baamukwasire nibagamba bati, “Oli w'okufa!

⁹Kiki ekikurangisize omu ibara lya MUKAMA, noogamba oti, ‘Enju enu niija kuba nka Silo, kandi oti orubuga runu ruraaba itongo eritasobora kwikarwamu muntu’?” Abantu boona bayesoroolezaaho Yeremiya omunju ya MUKAMA.

¹⁰Abanyoro ba Yuda obu baahuliire ebintu ebi, baaruga omunju y'omukama baija ha nju ya MUKAMA, baikarra ha ntaaho y'irembo erihyaka ery'enju ya MUKAMA.

¹¹Baanyakatagara n'abarangi, nubwo baagambiire abanyoro n'abantu boona bati, “Omuntu ogu asemeriire kucwerwa omusango ogw'okufa habwokuba, arangireho orubuga runu, nkooku mwehuliriire inywenka.”

¹²Yeremiya nubwo yagambiire abanyoro boona n'abantu boona ati, “Ebigambo byona ebi muhuliire, MUKAMA nuwe yantumire kubirangaho enju enu n'orubuga runu.

¹³Hati nu, mucwe engeso zanyu musemeze ebikorwa byanyu, kandi muhurre ebigambo bya MUKAMA Ruhanga wanyu, nubwo alireka kukora akabi akayarangire kubakoraho.

¹⁴Nyowe ndi omu mikono yanyu. Munkole eki murukurora, kirungi kandi ekihikire.

¹⁵Kyonka mumanyire kimu, obu muranyita, inywe n'abantu ab'orubuga runu, muraajunaanwa omusango ogw'okwita omuntu ataina kabi, habwokuba MUKAMA nuwe yantumire kubagambira ebigambo ebi.”

¹⁶Abanyoro n'abantu boona, nubwo baagambiire banyakatagara n'abarangi bati, “Omuntu onu tasemeriire kucwerwa omusango ogw'okufa, habwokuba akatubaliza omu ibara lya MUKAMA Ruhanga waitu.”

¹⁷Abamu ha bakuru ab'ensi baimuka baabaliza abantu boona abakaba beesoroize bati,

¹⁸“Omu businge bwa Hezekiya omukama wa Yuda, Miika Omumorreseesi akaranga, yagambira abantu ba Yuda boona ati: ‘MUKAMA ow'amahe naagamba ati, orubuga Siyoni rulirimwa nk'omusiri, Yerusaalemu ruliba ntuumo y'ebikamburo kandi orusozi orwombekerweho enju ya MUKAMA rulifooka kibira.’

¹⁹Hezekiya omukama wa Yuda na Yuda yoona, bakamwita? Atatiine MUKAMA, kandi atamusabe kumugirra embabazi, kandi MUKAMA, akabi akaakaba arangire kuleetera abantu, atakaleke? Baitu itwe tuli haihi kwereetera itwenka akabi akakooto.”

²⁰Hakabaho omusaija ondi, ayarangire omu ibara lya MUKAMA, nuwe Uliya, mutabani wa Semaaya ayarugire Kiryasiyaimu. Akaranga ha rubuga runu, na hansi enu, naagamba ebigambo, nka Yeremiya ebi yagambire.

²¹Omukama Yohoyakimu hamu n'abaserikale be, n'abanyoro be boona, obu baahuuliire ebigambo ebi, omukama yagonza kumwita; Uliya obu yakihuliire, yatiina yairukira Misiri.

²²Omukama Yehoyakimu nukwo kutuma Misiri abasaija abamu, Erinasani mutabani w'Akibbora, n'abandi, baatabarra Uliya baamwiha Misiri,

²³baamuleetera omukama Yehoyakimu, yamwisa empirima omutumbi gwe yaguhungura nambere haaziikwaga abantu abatali b'ekitiinisa.

²⁴Baitu Yeremiya akasagikwa Ahikamu mutabani wa Safani, nukwo kutamulekera abantu kumwita.