Read Runyoro - rutooro Yer 29 Bible Online

Yer 29 - Runyoro - rutooro bible

Yer 29

¹Binu nibyo ebigambo eby'ebbaruha Yeremiya omurangi ali Yerusaalemu ei yatwekiire abakuru b'enzaahisibwa, banyakatagara, abarangi n'abantu boona Nebbukadaneza aba yaihire Yerusaalemu, yabazaahisiza Bbabbulooni.

²Ebbaruha enu ekahandiikwa omukama Yekoniya nyina omukama, abagaragara, abantu abakuru aba Yuda na Yerusaalemu, abafundi n'abaheesi b'ebyoma, bamazire kuruga Yerusaalemu.

³Erasa mutabani wa Safani, na Gemaliya mutabani wa Hirikiya, Zedekiya omukama wa Yuda aba yatwekere Bbabbulooni hali Nebbukadaneeza omukama, nubo baagitwaire.

⁴“Enzaahisibwa boona aba naihire Yerusaalemu nabazaahisiza Bbabbulooni, MUKAMA ow'amahe Ruhanga owa Isirairi naabagamba ati:

⁵Mwombeke amaju mugaraalemu; mulime emisiri, mulye ebyokulya ebirukuruga omu misiri egi.

⁶Muswere abakazi, muzaale abaana aboojo n'abaisiki; muswererre batabani banyu, kandi bahara banyu mubasweeze, nabo nukwo bazaale abaana aboojo n'abaisiki, mukanye omunsi egi, baitu muleke kukeeha.

⁷Murwanirre obusinge obw'orubuga oru nabazaahisiizaamu, kandi murusabire hali MUKAMA, habwokuba oburulitunga obusinge, na inywe nubwo mulitunga obusinge.

⁸Habwokuba MUKAMA ow'amahe Ruhanga owa Isirairi naagamba ati: Abarangi n'abafumu banyu aba muli nabo, baleke kubabiiha, kandi muleke kwikiriza ebirooto ebi barukuroota,

⁹habwokuba MUKAMA naagamba ati, nibabarangira ebisuba omu ibara lyange; ntabatume.

¹⁰“Habwokuba MUKAMA naagamba ati, emyaka nsanju yonka eyahairwe kwikara Bbabbulooni obu erihwaho, ndibabungira mpikirize eki naraganiize, ndibagirra embabazi nimbagarra omu kiikaro kinu.

¹¹MUKAMA naagamba ati, mmanyire ebi ndukubategekera, nimbategekera obusinge, tindukubategekera bubi, kubaleetera ebintu ebirungi ebi murukunihira.

¹²Obu nubwo mulinyeta, muliija munsabe, kandi ndibaha eki murukusaba.

¹³Mulinserra munzoole; obu mulinserra n'omutima gwanyu gwona.

¹⁴MUKAMA naagamba ati, mulinzoora, ndibagarurra itungo lyanyu, ndibasorooza mbaihe omumahanga goona n'omu biikaro ebi nabararangiizeemu, mbagarre omu kiikaro eki nabaihiremu kubazaahya.

¹⁵“Mukagamba ngu, ‘Omu Bbabbulooni, MUKAMA atwimukiizemu abarangi,’

¹⁶omukama anyakutiire engoma ya Daudi, n'abantu boona abanyakwikara omu rubuga runu, beene banyu abatarazaahire na inywe:

¹⁷‘MUKAMA ow'amahe naagamba ati, ndibatwekera empirima, kugwerwa kiihe na kagingo mbafoole nk'ebijuma by'emitini ebinyakujundiire kimu, ebitasobora kuliibwa.

¹⁸Ndibabingisa empirima, kiihe na kagingo, kandi ndibafoora kintu ky'okutiinwa amakama goona ag'ensi, ndibaleetera kukyenwa, kuba kintu katiinwa, kasiimuzibwa, ekijumo, omu mahanga aganabararangizeemu;

¹⁹MUKAMA naagamba ati habwokuba bakanga kukwata ebigambo byange kandi kunu naikaraga nimbatumira abaheereza bange abarangi, nabwo batahurre.’

²⁰Baitu inywe enzaahisibwa aba naihire Yerusaalemu nabatweka Bbabbulooni muhurre MUKAMA eki arukugamba:

²¹‘Ahabbu mutabani wa Kolaya na Zedekiya mutabani wa Maaseya, abarukubarangira ebisuba omu ibara lyange, MUKAMA ow'amahe Ruhanga owa Isirairi naabagambaho ati: Ndibalekera Nebbukadaneeza omukama wa Bbabbulooni, kandi alibaita muroleriire muti.

²²Habw'abo, enzaahisibwa boona abaarugire Yuda abanyakuli Bbabbulooni, baraakyenaga abantu nibagamba bati: “MUKAMA naakakukole nka Zedekiya n'Ahabbu, omukama wa Bbabbulooni aba yasiririize omu murro;”

²³habwokuba, bakanjukira omu Isirairi, baasiihana n'abakazi bakabataahi baabu, kandi omu ibara lyange bakabaza ebigambo eby'ebisuba ebi ntarabaragiire. MUKAMA naagamba ati, ninyowe anyakumanya, kandi ninyowe kaiso.’ ”

²⁴Semaaya Omunya-Neheramu mumugambire muti:

²⁵“MUKAMA ow'amahe Ruhanga owa Isirairi naagamba ati: Okatwekera ebbaruha abantu boona abanyakuli Yerusaalemu, na Zefaniya mutabani wa Maaseya nyakatagara, na banyakatagara boona, okabatwekera ebbaruha erukugamba eti

²⁶‘MUKAMA akufoire nyakatagara omu kiikaro kya Yehoyaada nyakatagara, orolerrege omunju ya Ruhanga, buli mugu w'iraro wena arukuranga, omutege omu nkomo n'omu rusengo.

²⁷Kandi hati habwaki otajunaine Yeremiya ow'Anasoosi anyakutaaha naabaliza abantu nk'omurangi?

²⁸Habwokuba akatutumaho tuli Bbabbulooni naagamba ati: “Okuzaahisibwa kwanyu kwokutwara akasumi; mwombeke amaju mugaikalemu, kandi mulime emisiri, mulye ebyokulya eby'emisiri egi.”’”

²⁹Zefaniya nyakatagara, yasomera Yeremiya omurangi ebbaruha egi.

³⁰MUKAMA nubwo yagambiire Yeremiya ati:

³¹“Tumaho enzaahisibwa boona obagambire oti, Semaaya owa Neheramu, MUKAMA naamugambaho ati: ‘Habwokuba Semaaya akakurangira kandi kunu ntamutumire, yakuleetera kwesiga ebisuba,

³²habweki, MUKAMA naagamba ati: Ndifubira Semaaya owa Neheramu n'abaijukuru be; MUKAMA naagamba ati; omu bantu banu taligiramu n'omu ow'alyomeera akarora ebirungi ebi ndikorra abantu bange, habwokuba akabaza eby'okwemera MUKAMA.’ ”