Read Runyoro - rutooro Yer 3 Bible Online

Yer 3 - Runyoro - rutooro bible

Yer 3

¹Omusaija kakuba ayahukana na mukazi we, omukazi akamurugaho akaswerwa omusaija ondi, iba oli asobora kumugarukira? MUKAMA naagamba ati, ensi egi terisisikara muno? Okanjuka n'abantu baingi kandi nooyenda kungarukira?

²Imukya amaiso orole obutwetwe bw'obusozi, nambere otakabyamaga, ninkaha? Nk'omuharabu oku aikara omwirungu ategeriize enyamaiswa na iwe nukwo waikaraga hamuhanda rubaju, otegeriize enganzi zaawe. Okasiisa ensi n'obusiihani bwawe obutagambwa.

³Enjura nukwo kulema kugwa, ey'obutoigo nayo tekagwire; n'amaiso gawe, nigooleka nkooku oli musiihani eki tikirukukukwasa nsoni.

⁴Nongambira oti, ‘Niiwe isenyowe, kandi okangonza okuruga omu buto bwange.

⁵Toliikara obiihiirwe; tolinkwatirwa ekiniga ebiro byona.’ Isirairi, ebi nibyo wagambire, baitu okakora ebibi byona byona nkookuwasoboire.”

⁶Omu biro by'omukama Yosiya, MUKAMA akankaguza ati: “Isirairi ogu engobya aboine eki akozire? Nkomukazi malaaya okwayegemura ha buli omu weena, nukwo Isirairi yatembere buli kasozi akaraihire koona, kandi nukwo yagenzire hansi ya buli muti gwona ogujumbire nuho yaramiize embandwa?

⁷Nkateekereza nti, ‘Nkooku amazire kukora ebi byona, aligaruka nambere ndi baitu atagaruke’, n'owanyina Yuda omugobya, eki akakirora.

⁸Habw'ebikorwa eby'obusiihani byona ebyakozirwe engobya ogu Isirairi, owanyina Yuda akarora nkooku namubingire, nimukwasa ebbaruha ey'okwahukana na we baitu atatiine kukora nkawe.

⁹Nkoku yarahukirwaga muno kweha embandwa, akasiisa ensi, naaramya amabaale n'emiti.

¹⁰MUKAMA naagamba ati, noobu haraaba habaireho ebi byona, owanyina Yuda engobya atagaruke nambere ndi n'omutima gwe gwona, akazooka nk'agarukire, kandi kunu nangwa.”

¹¹MUKAMA akangambira ati, Isirairi katesigwa ayeyolekere nkooku aina omusango muke, okukira ogwa Yuda engobya.

¹²MUKAMA naagamba ati, genda orangirre ebigambo binu ha bukiizi bw'emoso oti, Iwe Isirairi katesigwa, ogaruke. Tindikuroza eriiso ery'ekiniga, habwokuba mba munyambabazi, tindikubihirirwa ebiro byona.

¹³MUKAMA naagamba ati, iwe ikiriza omusango gwawe: nkooku wandugireho nyowe MUKAMA Ruhanga wawe kandi nkooku wagondeze abanyamahanga, walema kumpurra.

¹⁴MUKAMA naagamba ati, Inywe abaana engobya, mugaruke; habwokuba ninyowe MUKAMA wanyu; ninyija kubatwara omu buli rubuga, nyihemu omu, omu buli ruganda nyihemu babiri, mbatwale Siyoni.

¹⁵Kandi ndibaha abaliisa abandukugonza, abalibaliisa n'amagezi n'obwetegereza.

¹⁶MUKAMA naagamba ati, omu biro ebi, obu muliba mumazire kukanya n'okuzaagurukana omunsi, abantu tibalyongera kubazaaho bati, “Esanduuko ey'endagaano yange.” Teriteekerezibwaho, teriijukwa, terisaaliririrwa, kandi tihalikorwa endi.

¹⁷Akasumi ako obu kalihika Yerusaalemu rulyetwa kitebe ky'obukama bwa MUKAMA, amahanga goona nuho galyesorooleza kundamya. Abantu tibaligaruka kukora emitima yabu eyakadadaire kandi emibi eby'erukubagambira.

¹⁸Omubiro ebi, enju ya Yuda eryeteeraniza n'enju ya Isirairi, baliruga hamu omunsi eya ha bukiizi bw'emoso baije omunsi ei nahaire baisenkuru inywe, bube bugwetwa bwabo.

¹⁹“‘MUKAMA naagamba ati: Isirairi, nkagonza kukwikiriza obe mwana wange, kandi nkuhe ensi erukusemereza, ensi eyasemiire kukirra kimu zoona omunsi yoona. Nkagonza onyetege Sso, kandi oleke kundugaho ebiro byona.

²⁰Mazimakwo MUKAMA nagamba ati, nkoomukazi kateesigwa oku arugaho iba, na iwe nju ya Isirairi nukwo wabaire kateesigwa hali nyowe.’ ”

²¹Obwogo nibuhulirirwa ha butwetwe bw'obusozi, abo bantu ba Isirairi nubo barukurra kandi nibatongana, habwokuba bakeeha engeso mbi, baayebwa MUKAMA Ruhanga wabo.

²²“Inywe baana abateesigwa, mugaruke, ninyija kubatambira obuteesigwa bwanyu.” “Dara itwe nitwija mbere oli; habwokuba niiwe MUKAMA Ruhanga waitu.

²³“Mazimakwo obusozi nibubiihabiiha, okuramiza hansozi nakwo bisuba MUKAMA Ruhanga waitu nuwe mujuni wa Isirairi.

²⁴“Okuruga omu buto bwaitu, okuramya Baali embandwa kaswaza kukabuuleeza byona baisenkuruitwe ebi baatalibaniire: amagana gaabo ag'embuzi n'ag'ente, batabani baabu na bahara baabu.

²⁵Kituhikiriire kwikara n'ensoni zaitu n'okuswara kwaitu, habwokuba okuruga omu buto bwaitu okuhika na hakiro kinu, eki twakozire hamu na baisenkuruitwe nukwo kubiihiza MUKAMA Ruhanga waitu; tutakwate Biragiro bye.”