Read Runyoro - rutooro Yer 30 Bible Online

Yer 30 - Runyoro - rutooro bible

Yer 30

¹MUKAMA akagambira Yeremiya ekigambo kinu ati:

²“MUKAMA Ruhanga owa Isirairi naagamba ati: Ebigambo byona ebi nkugambiire, obihandiike omukitabu.

³MUKAMA naagamba ati, habwokuba akasumi aka ndigarurramu abantu bange aba Isirairi na Yuda, itungo lyabo, kalihika, kandi ndibagarra omunsi ei nahaire baisenkurubo, bagirye.”

⁴Binu nibyo ebigambo MUKAMA ebi yagambireho Isirairi na Yuda:

⁵“MUKAMA naagamba ati: Tuhuliire iraka ery'obutiini, ery'enkizi, eritali ly'obusinge.

⁶Hati mukaguze murole, haroho omusaija ow'arukusobora kuzaara omwana? Habwaki, nindora buli musaija ayekwasire enyugunyu nk'omukazi arukurumwa ebisa eby'okuzaara? Kiki ekireetiire abantu boona kusiihuuka bati?

⁷Haa! Ekiro eki kiriba ky'okutiinisa okutagambwa tihalibaho kindi ekirikisisana; nuko akasumi ak'omuhito hali Yakobbo; baitu nabwo alikitabuka.

⁸“MUKAMA ow'amahe naagamba ati: “Akasumi ako obu kalihika, ndibacwa ekikoligo omubikya mbakatulemu enjegere, kandi tibalyongera kulemwa abanyamahanga.

⁹Baitu baliheereza MUKAMA Ruhanga wabo, na Daudi omukama wabo ou ndibakomera.

¹⁰“MUKAMA naagamba ati Yakobbo mwiru wange, leka kutiina Isirairi, leka kucwekwa enkizi. Ndikujuna nkwiihe omunsi eza hara, n'abaijukuru bawe ndibaiha omunsi ei banyagiirwemu. Yakobbo aligaruka ateekaane kandi agwagwane, hatakyaroho n'omu ow'okumutiinisa.

¹¹Habwokuba, ndi na iwe kukujuna, amahanga goona aga nakurarangizeemu, ndigahwerekereza; iwe, tindikuhwerekereza, kyonka ndikuhana nindengeerra, baitu tindikuleka.

¹²Habwokuba MUKAMA naagamba ati ekihooya kyawe tikirukutambwa kandi ekihuta kyawe tikirukukizibwa.

¹³Busaho muntu n'omu ow'okukurolerra, tiharoho mubazi oguraakutambira ebihooya, amasiko gahoire, tosobora kutambirwa.

¹⁴Enganjani zawe bakweberwe; tibakuroho naakake konka; habwokuba nkutiire omwigo nk'ogu bateera omunyanzigwa nkufubiire nkooku bafubira omuzigu atagira mbabazi habwokuba omusango gwawe mukooto, habwokuba ebibi byawe bihinguraine.

¹⁵Habwaki n'otontorroma habw'ekihooya kyawe? Oburumi bwawe tibuli bw'okutambwa. Habwokuba omusango gwawe mukooto, habwokuba ebibi byawe bihinguraine, nikyo nkukoliire ebintu ebi.

¹⁶Baitu nabwo, boona abakuhwerekereza balihwerekerezibwa, kandi abazigu bawe, boona balinyagwa; abo abanyakukunyaga ebintu byawe, bo bonyini balinyagwa kandi abo boona abanyakukuhiiga, ndibafoora kintu ky'okuhiigwa.

¹⁷MUKAMA naagamba ati, ndikugarurra obwomeezi, kandi ebihooya byawe ndibitamba, habwokuba abantu bakakweta omusendwa, ngu, ‘Siyoni, busaho muntu asobora kugifaaho!’

¹⁸MUKAMA naagamba ati: “Abantu bange ndibagarra omunsi yabu, kandi enganda zoona ndizigirra embabazi; Yerusaalemu rulyombekwa buhyaaka, n'ekikaali kyarwo kirigarurwaho.

¹⁹Balizina ebizina eby'okusiima n'amaraka ag'okusemererwa. Ndibakanyisa, tindibakeehya, ndibaleetera kuheebwa ekitiinisa, tindibaleetera kugaywa.

²⁰Abaana baabu baliba nkooku bakaba bali kara, ekitebe kyabo kirinyemerra omumaiso; kandi ndifubira boona abanyakubabonesa.

²¹Omwebembezi wabo aliba omu hali bo bonyini. Omulemi wabo aliruga omulibo; ndimweta airre haihi, kandi alinyirra haihi, habwokuba MUKAMA naagamba ati, n'oha asobora kwehwamu kunyirra haihi?

²²Muliba bantu bange, na nyowe ndiba Ruhanga wanyu.”

²³Ekiniga kya MUKAMA kisisana ihunga, ekiyaga eky'amaani ekiriteera ha mitwe y'ababi.

²⁴MUKAMA atakakozire kandi atakahikiriize ebi yategekere omu mutima gwe, ekiniga kye ekibi tikirihwaaho. Omu biro eby'omumaiso, eki nubwo mulikyetegereza.