Read Runyoro - rutooro Yer 31 Bible Online

Yer 31 - Runyoro - rutooro bible

Yer 31

¹MUKAMA naagamba ati, omu kasumi ako, ndiba Ruhanga ow'enganda zoona eza Isirairi, kandi nabo, baliba bantu bange.

²“MUKAMA naagamba ati “Abo abaatabukire empirima, bakagirirwa embabazi omwirungu; Isirairi obu yaserwiire ekihuumuro,

³MUKAMA akeema hara yamubonekera. Nkakugonza buli na buli, nahati ninyongera kukugonza ntarukugarukirra.

⁴Iwe mwisiki empikirre owa Isirairi, ninyongera kukwombeka; oraayombekwa buhyaka! Oligaruka ojwale esurumbeete, ogende omu kuzina kw'abarukusemererwa.

⁵Oligaruka olime emisiri ey'emizabbibbu hansozi za Samaliya; ababyaazi balirya, kandi balirya ebijuma.

⁶Habwokuba, ekiro kirihika, abalinzi baamiirre omu nsi ey'ensozi ey'Efuraimu nibagamba bati: Mwimuke tugende Siyoni omba MUKAMA Ruhanga waitu.”

⁷Habwokuba MUKAMA naagamba ati “Muzinire muno Yakobbo n'okusemererwa, mwimukize amaraka ihanga erirukukira amahanga goona; murangirre, muhaisanize kandi mugambe muti, ‘MUKAMA, abantu be Abaisirairi abaasigaireho, abajunire.’

⁸Ndibaiha omunsi eya habukiizi bw'emoso mbagarre, kandi ndibasorooza mbaihe omu mitaano eya hara ey'ensi; boona abahimbaara n'abalema, abakazi abaina enda n'abarukurumwa ebisa eby'okuzaara baligaruka hanu, bali kitebe kikooto.

⁹Bakaba bagenzire nibarra, obu ndiba nimbagarra ndibahuumuza; ndibeebembera mbatwale ha byambu by'amaizi ndibarabya omu muhanda omurungi nambere batalibaijukira. Habwokuba ninyowe ise Isirairi kandi Efuraimu nugwo omuzigaijo gwange.

¹⁰Inywe amahanga muhurre ekigambo kya MUKAMA, kandi mukirangirre omu bizinga ebya hara; mugambe muti, ‘Ogu ayararangize Isirairi, amusorooze, kandi amulinde, omuliisa nkooku alinda igana lye.’

¹¹Habwokuba MUKAMA acungwiire Yakobbo amunuunwiire yamwihaho abamuhinguraine amaani.

¹²Baliija bazinire muno ha katwetwe ka Siyoni, balisemerererwa oburungi bwa MUKAMA balisemerererwa engano, eviini, n'amagita, balisemerererwa ebyana by'embuzi n'eby'ente; obwomeezi bwabo bulisisana nk'omusiri ogunyakwitiriirwe amaizi, tibaligaruka kubona enaku.

¹³Obu, abaisiki nubwo balikyanganurwa kuzina nibacekeca kandi abasigazi n'abagurusi balisemererwa. Okurra kwabo ndikwihamu omuhimbo, ndibahuumuza, mbahe okusemererwa omu kiikaro ky'obujune;

¹⁴MUKAMA naagamba ati, Baanyakatagara ndibajebeka empura y'ebintu, kandi abantu bange balisiima oburungi bwange.”

¹⁵MUKAMA naagamba ati: “Iraka nirihulirirwa Rama, ery'empamo n'okutaabaana. Rakeeri nuwe arukulirirra abaana be; habwokuba bahoireho”.

¹⁶“MUKAMA naagamba ati Wesize wesusule amaizi ag'omumaiso gawe. Kyona eki wakoliire abaana bawe, tikiriburwa mpeera; nibaija kuruga omunsi y'omunyanzigwa bagaruke.

¹⁷MUKAMA naagamba ati, Oleke kuhwa amasiko, abaana bawe nibaija kugaruka omunsi yabu yonyini.

¹⁸‘Mpuliire Efuraimu naarra ati MUKAMA okampana, kandi nkaikiriza kuhanwa; nk'enimi ento etakaikaraga n'abantu. Ongarre, onyikirize ngaruke, habwokuba niwe MUKAMA Ruhanga wange.

¹⁹Ego, nkakurugaho, baitu okuruga obu, nayegarukamu; nkakenga, nayeteerateera ekibero nkaswara muno, ensoni zaayenda kunyita, ego, nahati hoona, nkyaina ensoni ez'obuto bwange.’

²⁰Efuraimu, niiwe mwana wange omugonzibwa? Niiwe mwana wange enganzi yange? Habwokuba nkooku mmubazaaho emirundi nyingi, mwijuka kukiraho. MUKAMA naagamba ati, habwaki, omutima gwange nigumwitanira; mananukwo ndimugirra embabazi.

²¹Mute ha mihanda emitaano, mweteereho ebihandiiko, oruguudo muruteho kurungi akarorwaho, mwetegereze kurungi omuhanda omukuru, ogu nugwo muhanda ogwabatwaire. Rugayo otaahe iwe empikirre ya Isirairi, garuka omu mbuga zawe zinu.

²²Mwisiki we kateesigwa, oligurukagurukya kuhika di? Habwokuba omunsi, MUKAMA akoziremu ekintu ekihyaka. Omukazi nuwe arukulinda omusaija.”

²³MUKAMA ow'amahe Ruhanga owa Isirairi naagamba ati: “Obu ndigarra abantu omunsi yabu, omunsi ya Yuda n'omu mbuga zaayo, baligaruka bagambe bati: ‘MUKAMA ahe omugisa orusozi orurukwera orwa Yerusaalemu, ekiikaro ekirukwera eki aikaramu.’

²⁴Yuda n'embuga ze zoona, abalimi n'abo boona abaliisa amagana, baliikara omunsi enu.

²⁵Habwokuba nduhura omuntu anyakujwahire, kandi nsemereza wena anyakwina obujune. Omu kasumi ako, nasisiimuka naayehurra,”

²⁶ngarukirwemu amaani, habwokuba nkagwijagira kurungi.

²⁷MUKAMA naagamba ati, ebiro birihika ebi ndisigiramu enju ya Isirairi n'eya Yuda, embibo ey'abantu n'ey'ebisoro.

²⁸MUKAMA naagamba ati, nkooku nataireho omutima nukwo mbakuule mbaseese, mbakumbagaze, mbahwerekereze kandi mbaleetere akabi, nukwo ndaataho omutima kubombeka n'okubabyara.

²⁹Omu biro ebi tibaligamba bati: “Baisiitwe bakalya ebijuma byaitu eby'emizabbibbu ebirukukamba,” kandi amaino g'abaana gaizirwa obutungununu.

³⁰Baitu buli muntu aliitwa ekibi kye; buli muntu owalirya emizabbibbu yaitu erukukamba, amaino ge nugo galiizirwa obutungununu.

³¹ “MUKAMA naagamba ati, akasumi kalihika, aka ndikorramu endagaano empyaka hamu n'enju ya Isirairi n'eya Yuda,

³²etarukusisana eri einakozire na baisenkurubo, obu nabakwasire ha mukono mbaihe omunsi Misiri, MUKAMA naagamba ati, noobwakubaire nkaba ndi mukama wabo, endagaano yange bakagicwa.

³³Baitu MUKAMA naagamba ati, ebiro ebi obu birimara kuhwaho, endagaano egi ndigikora n'enju ya Yuda. Ndibatamu ebiragiro byange, kandi ndibibahandiika omu mitima, ndiba Ruhanga wabo, kandi nabo baliba bantu bange.

³⁴MUKAMA naagamba ati, buli muntu talyongera kwegesa omutaahi, rundi kwegesa owanyina ati, ‘Manya MUKAMA,’ habwokuba boona, okurugirra h'arukukirra kimu obuto okugarukira h'arukukirra kimu obukuru, balimmanya. Habwokuba ndibaganyira obubi bwabo, kandi tindigaruka kwijuka ebibi byabo.”

³⁵MUKAMA naagamba ati ogu anyakutaho izooba lijwe nyamusana, anyakuteeraho okwezi ekiragiro ekitahinduka, kandi anyakuragira enyunyuuzi kujwa ekiro, anyakutengesa enyanja, ebigonzi byayo nukwo bikahirra ibara lye nuwe MUKAMA ow'amahe:

³⁶MUKAMA naagamba ati: “Ekiragiro eki ekitaihurruka obukirinduga omumaiso baijukuru ba Isirairi nubwo balirekera aho kuba ihanga lyange ebiro byona.”

³⁷MUKAMA naagamba ati “Iguru erinyakuli haiguru obu liraaba nirisobora kulengwa, n'emiganda y'ensi enyakuli hansi okuzimu obu erisobora kuzoorwa, obu nubwo ndyoga baijukuru ba Isirairi, habw'ebi byona ebi baakozire.”

³⁸MUKAMA naagamba ati: “Akasumi kalihika, orubuga rwombekerwe MUKAMA buhyaka, okurugirra ha munaara ogwa Hananeeri, okugarukira ha irembo erya ha keekubo.

³⁹Omuguha ogw'okulengesa, gulyeyongera omumaiso, gutereekerre okuhika ha kasozi Galebbu, hanyuma gwekube guhike Gowa.

⁴⁰Ekihanga kyona ekinyakuziikwamu emitumbi kandi ekinyakunagwamu oburofu, n'emisiri yoona enyakuli eruguru y'akasaaru Kiduroni, okuhikira kimu ha irembo ery'embaraasi ha rubaju rwa Burugaizooba, rulihongerwa MUKAMA. Tiruligaruka kuseeswa rundi kuhwerekerezibwa ebiro byona.”