Read Runyoro - rutooro Yer 33 Bible Online

Yer 33 - Runyoro - rutooro bible

Yer 33

¹Yeremiya obwakaba akyakingiirwe omu zigati y'abalinzi, MUKAMA akamugambira obwa kabiri ati:

²“MUKAMA ayahangire ensi, ayagibumbire yagigumya ogu anyakwetwa MUKAMA, naagamba kinu:

³Onyete, ndikugarukamu, nkugambire ebintu ebikuru eby'ensita ebi otamanyire.

⁴Habwokuba, amaju ag'orubuga runu, n'ebikaali bya Yuda eby'obukama, ebirukwija kuhwerekerezibwa, MUKAMA Ruhanga owa Isirairi naabigambaho ati:

⁵Haihi n'entuumo ez'itaka n'engo, nuho balirwanisiza Abakalidaaya, baijuze kwonka orubuga n'emitumbi y'abo abanditeera mbiihiirwe, kandi nkwasirwe ekiniga, abo abanaimire amaiso gange habwo'obubi bwabo.

⁶Orubuga runu ndirutambira, hamu n'abantu baarwo, kandi ndibagarurra obwomeezi, ndibaha obusinge obuhinguraine n'okugwagwana.

⁷Itungo lya Yuda n'erya Isirairi ndirigarra mboombeke buhyaka, nkooku bakaba bali okubanza.

⁸Ndibeeza mbaiheho ebibi ebi bansobezeeho, ndibaganyira ebibi byabo n'obwemi bwabo.

⁹Yerusaalemu hali nyowe, ruliba nsoro y'omuhimbo, y'ekitiinisa kandi y'okusemererwa; ihanga lyona ery'omunsi yoona, obu lirihurra ha bintu ebirungi ebi nkorra abantu ba Yerusaalemu, na ha businge obu ndeetera orubuga oru, balitiina kandi balitukumira.”

¹⁰“MUKAMA naagamba ati: Omu kiikaro kinu eki murukubazaaho muti, ‘Kitongo ekitarumu bantu n'ebisoro;’ omumbuga za Yuda n'omu nguudo za Yerusaalemu ezaafiire, nambere hatali bantu n'ebisoro, haligaruka hahulirwemu amaraka ag'okusemererwa n'agokukyanganuka,”

¹¹halihulirwa amaraka ag'abagole abasaija n'abakazi, n'abo abanyakuleeta ebyonzira eby'okusiima omunju ya MUKAMA, balihulirwa nibazina bati “Musiime MUKAMA ow'Amahe, habwokuba MUKAMA murungi, habwokuba engonzi ze z'ebiro n'ebiro.” MUKAMA naakigumiza kimu ati, ensi enu ndigigarurra itungo lyayo, nkooku likaba liri kara.

¹²“MUKAMA ow'amahe naagamba ati, omukiikaro kinu itongo, eritarumu bantu rundi bisoro, n'omu mbuga zaakyo zoona haligaruka habemu ebiikaro by'abaliisa ebi balizaagirizaamu amagana gaabo.

¹³MUKAMA naagamba ati, omu mbuga ez'ensi ey'ensozi, omu mbuga ez'omu kyeya, omu mbuga eza Negebbu omunsi ya Benyamiini, n'omu mbuga eza Yuda, amagana g'embuzi galigaruka garabeho omuntu arukugabara.

¹⁴“MUKAMA naagamba ati: “Dora akasumi aka ndihikiririzaaho eki naraganiize enju ya Isirairi n'eya Yuda, kalihika.

¹⁵Omu kasumi ako, ndikoma omukama omurungi mwijukuru wa Daudi. Omukama ogu nuwe alikora omunsi yoona ebihikire, kandi eby'obwinganiza.

¹⁶Omu biro ebi, Yuda erijunwa, na Yerusaalemu eriikara n'obusinge. Linu niryo ibara eri rulyetwa ‘MUKAMA nubwo obuhikiriire bwaitu.’

¹⁷“Habwokuba MUKAMA naagamba ati: “Ebiro n'ebiro, Daudi taliburwa omwijukuru ow'okwikarra ha kitebe eky'obukama eky'enju ya Isirairi.

¹⁸N'abanyakatagara Abaleevi, ebiro byona tibaliburwa mwijukuru ow'okwemerra omumaiso gange kuhonga ebihongwa eby'okwokya, n'okuntambiraga ebyonzira buli kiro.”

¹⁹Ekigambo kya MUKAMA ekyamanyisiibwe Yeremiya

²⁰MUKAMA nagamba ati: “Obworaaba noosobora kucwa endagaano yange hamu n'obwire bwa nyamusana n'obw'ekiro, obwire nukwo bukalema kukya n'okwira omu kasumi kaabyo akaatairweho,

²¹obu endagaano yange n'omwiru wange Daudi, nayo nubwo esobora kucwibwa, nukwo aburwe omwana w'obwojo ow'okuteera engoma ye, n'eya banyakatagara Abaleevi abanyakumpeereza, nayo nukwo eti.

²²Nk'ebintu eby'omumwanya okubitasobora kubarwa, n'omusenyi ogw'enyanja oku gutasobora kulengwa, n'abaijukuru ba Daudi omwiru wange, n'abanyakatagara Abaleevi abanyakumpeereza, nukwo ndibakanyisa nti.”

²³MUKAMA akakaguza Yeremiya ati:

²⁴“Oboine abantu nkooku barukugamba ngu, ‘MUKAMA enganda ibiri ezi yakomere akazaanga’? Abantu bange nukwo babagayire bati, tibakyabarora nk'ihanga.

²⁵MUKAMA naagamba ati: Kakuba ntaragumiize kimu endagaano yange ey'obwire obwa nyamusana n'obw'ekiro, n'ey'ebiragiro eby'iguru n'ensi,

²⁶obu nubwo naakwogere baijukuru ba Yakobbo na Daudi omwiru wange, ndeke kukoma omu baijukuru be, ow'okulema oruzaaro rw'Abburahamu, Isaaka na Yakobbo. Habwokuba ndibagarurra itungo lyabo, kandi ndibagirra embabazi.”