Read Runyoro - rutooro Yer 34 Bible Online

Yer 34 - Runyoro - rutooro bible

Yer 34

¹Nebbukadaneeza omukama wa Bbabbulooni n'ihe rye ryona, abakama boona ab'ensi abayalemaga, n'amahanga goona, obu bakaba nibarwanisa Yerusaalemu n'embuga ezigiheriire zoona, kinu nikyo ekigambo kya MUKAMA ekyagambiirwe Yeremiya:

²“MUKAMA Ruhanga owa Isirairi naagamba ati: Genda ogambire Zedekiya omukama wa Yuda oti, ‘MUKAMA Ruhanga wa Isirairi naagamba ati: Orubuga runu ninyija kuruha omukama wa Bbabbulooni arwokye n'omurro.

³Hataroho kugurukyagurukya tolimutabuka noija kukwatwa noija kurorangana n'omukama wa Bbabbulooni amaiso n'amaiso, kandi mubaze hamu akanwa n'akanwa; kandi oraagenda Bbabbulooni.’

⁴Eki noobu kiraaba kiri kiti, iwe Zedekiya omukama wa Yuda, ohurre ekigambo kya MUKAMA! MUKAMA naakugambaho ati: ‘Toliitwa mpirima.

⁵Olifa kurungi. Ebintu ebirukuboya nkooku byayokeziibwe baaswenkuru n'abakama abaira abaakubandiize na iwe, abantu nukwo balikwokeza ebintu ebirukuboya, balikuteera empamo nibagamba bati, “Ai bambi Kabumba Omukama!” ’ MUKAMA naagamba ati, eki ninyowe nkigambire.”

⁶Yeremiya omurangi ebigambo ebi byona nubwo yabigambiire Zedekiya omukama wa Yuda, bali Yerusaalemu,

⁷ihe ry'omukama wa Bbabbulooni nirirwanisa Yerusaalemu n'embuga za Yuda zoona ezikaba zisigaireho, Lakisi n'Azeeka; habwokuba ezi, nizo zikaba ziri mbuga za Yuda zonka ezigumire, ezaasigaireho.

⁸Omukama Zedekiya obu yamazire kukora endagaano n'abantu boona abakaba bali Yerusaalemu, MUKAMA akaragira Yeremiya arangiirre obusinge obw'okubaheebwa,

⁹buli muntu alekere abairu be Abaheebburaayo, abasaija n'abakazi nukwo haleke kubaho omuntu arukwikirizibwa kutunga Omuyudaaya mugenzi we akamufoora mwiru.

¹⁰Abanyoro n'abantu abakaba bali omu ndagaano egi, boona bakaikirraniza ngu, buli muntu alekere abairu be, abasaija rundi abakazi, baleke kwongera kubaikaza bali omu bwiru.

¹¹Baitu hanyuma, baahindura ebiteekerezo byabo baagarra abairu abasaija n'abakazi, aba kababa balekiire, baabagarra omu bwiru.

¹²MUKAMA akagambira Yeremiya ati,

¹³“MUKAMA Ruhanga owa Isirairi naagamba ati: Obu naihire baisenkuru inywe omunsi Misiri, omunju ey'obwiru nkakora nabo endagaano ningamba nti,

¹⁴‘Obu halihwaho emyaka mukaaga, buli omu haliinywe, alekere mugenziwe Omuhebburaayo, ou baakugulize, kandi anyakukukoliire okumara emyaka mukaaga; omulekere alekere aho kukuheereza.’ Baitu baisenkuru inywe batampurre, kandi batantegere matu.

¹⁵Omu biro ebike ebihingwiireho, mukeeteera, mwakora ekihikire eki ndukugonza, nimurangirra obusinge, buli muntu naaburangirra omutaahi, kandi mukakora nanyowe endagaano omunju eyarukirwe ibara lyange;

¹⁶baitu kandi mukeehindura, mwasiisa ibara lyange, buli omu omuli inywe, abairu be abasaija n'abakazi, abamukaba mulekiire beetwale nkooku, barukugonza yabegarurra mwabagarra omu butungwa, babe bairu banyu.

¹⁷Habweki MUKAMA naagamba ati: habwokutampurra, buli muntu akarangirra mugenzi we n'omutaahi; obugabe, nyowe ninyija kubarangirra obugabe obw'okubahikya ha mpirima, ha kagingo na ha kiihe. Ndibafoora kintu ky'okutiinwa abakama boona ab'ensi.

¹⁸Kandi abantu abaacwiire endagaano yange, baalema kuhikya ebigambo eby'endagaano ei baakozire omumaiso gange, ninyija kubakora nk'enyana, ei baayasizeemu ebicweka bibiri, ebicweka byayo ebi, baabiraba hagati.

¹⁹Abanyoro ba Yuda n'aba Yerusaalemu abagaragara, banyakatagara, n'abantu boona ab'omunsi abaarabire hagati y'enyana egi;

²⁰ninyija kubalekera abanyanzigwa baabu, mbalekere n'abo abarukwenda kubaita. Emitumbi yaabu, eriboijwa amahungu ag'omu mwanya, kandi eririibwa n'enyamaiswa ez'omwirungu.

²¹Kandi Zedekiya omukama wa Yuda n'abanyoro be, na bo ndibalekera abanyanzigwa baabu mbalekere n'abo abarukwenda kubaita, mbalekere n'ihe ery'omukama wa Bbabbulooni eryabarugireho lyagaruka enyuma.

²²Dora, MUKAMA naagamba ati, ndiragira, kandi ndibagarra omurubuga runu; balirurwanisa barukwate, kandi barwokye n'omurro. Embuga za Yuda, ndizifoora itongo eritarumu muntu.”