Read Runyoro - rutooro Yer 35 Bible Online

Yer 35 - Runyoro - rutooro bible

Yer 35

¹Omu businge bwa Yehoyakimu mutabani wa Yosiya omukama wa Yuda, MUKAMA akaragira Yeremiya ati:

²“Genda omb'Abarrekabbu obaze na bo, kandi obaleete omunju ya MUKAMA, obataahye omu kimu ha bisiika; hanyuma obahe eviini banywe.”

³Nanyowe, nukwo kutwara Yaazaniya mutabani wa Yeremiya mwijukuru wa Habaziniya abanyina, batabanibe, n'enju yoona ey'Abarrekabbu,

⁴nabaleeta omunju ya MUKAMA, nabataahya omu kisiika eky'abatabani ba Hanani mutabani wa Igidaliya omuntu wa Ruhanga, ekikaba kiherraine n'ekisiika ky'abanyoro, eruguru y'ekisiika kya Maaseya mutabani wa Saluumu, omulinzi w'omulyango.

⁵Hanyuma nabaleetera ensoha eziijwiire eviini, hamu n'ebikopo; nabagambira nti, “Eviini ngigyo munywe.”

⁶Bangarukamu bati “Itwe titurukwija kunywa viini, habwokuba Yonadabbu isenkuru itwe mutabani wa Rrekabbu, akatuteererra ati:

⁷‘Ebiro byona inywe, inywe na batabani banyu; mutalinywa eviini, mutalyombeka amaju, mutalisiga embibo, mutalibyara emisiri y'emizabbibbu rundi kutunga ebintu; baitu obwomeezi bwanyu bwona, murralege omu heema, nukwo muhangaale omunsi ei musuuhuukiremu.’

⁸Ebiragiro isenkuru itwe Yonadabbu mutabani wa Rrekabbu ebi yaturagiire, tukabikwatira kimu, itwe nabakazi baitu, n'abatabani baitu, na bahara baitu, titunywa eviini,

⁹titwombeka maju ag'okuraaramu; titugira musiri ogw'emizabbibbu, kandi titubyara musiri,

¹⁰turaara omu heema, byona isenkuru itwe Yonadabbu ebi yaturagiire, tukabihikiririza kimu.

¹¹Baitu Nebbukadaneeza omukama wa Bbabbulooni obu yaseesiire ensi enu twacwamu tuti, ‘Turuge hanu tugende! Tugende Yerusaalemu, nukwo tutabuke ihe ery'Abakalidaaya n'ery'Abasiriya,’ nikyo turaikarra Yelusalemu.”

¹²Hanyuma ekigambo kya MUKAMA kikamanyisibwa Yeremiya kiti:

¹³“Genda ogambire abantu ba Yuda n'abasi ba Yerusaalemu oti, MUKAMA w'amahe Ruhanga owa Isirairi naagamba ati, ‘Timwaikirize ebi murukwegesibwa, kandi timwakwate ebigambo byange?’

¹⁴Ekiragiro eky'okutanywa viini Yonadabbu mutabani wa Rrekabbu eki yateeriireho batabani be, eby'okutanywa viini, bakakikwata; okuhika na hati, tibaginywa naakake, habwokuba bakakwata ekiragiro kya isenkurubo. Nyowe nkaikara nimbagambira, baitu mutampurre.

¹⁵Nkabatumaho abaheereza bange boona abarangi, nkabatuma obutalekerra, ningamba nti, ‘Buli omu omuli inywe, ayeteere engeso ze embi, ayegarukemu, muleke kukuraatira embandwa n'okuziheereza nubwo muliikara omunsi ei nabahaire, kandi ei nahaire baisenkuru inywe.’

¹⁶Batabani ba Yonadabbu mutabani wa Rrehabbu, bakakwata ekiragiro, isenkurubo eki yabahaire, baitu abantu banu, nyowe bakanga kumpurra.

¹⁷Habweki MUKAMA Ruhanga ow'amahe, Ruhanga owa Isirairi nikyo arukugambira ati: Abantu ba Yuda n'abasi ba Yerusaalemu boona, ninyija kubaleetera akabi koona aka nabagambireho; habwokuba nkabagambira tibaahurra, nkabeeta tibaagarukamu.”

¹⁸Baitu eb'ekika ky'Abarrekabbu, Yeremiya akabagambira ati: MUKAMA ow'amahe, Ruhanga owa Isirairi naagamba ati: Habwokuba mukakwata ekiragiro kya Yonadabu isenkuru inywe mwahikiriza byona ebi yaragiire kandi mwakora byona ebi yabaragiire.

¹⁹MUKAMA ow'amahe Ruhanga owa Isirairi nikyo arukugambira ati: Ebiro byona, Yonadabbu mutabani wa Rrekabbu taliburwa omuntu ow'okwemerra omumaiso gange.