Read Runyoro - rutooro Yer 36 Bible Online

Yer 36 - Runyoro - rutooro bible

Yer 36

¹Omu mwaka ogwa kana ogwa Yehoyakimu mutabani wa Yosiya omukama wa Yuda, MUKAMA akagambira Yeremiya ekigambo kinu ati:

²“Kwata omuzingo gw'ekitabu, oguhandiikemu ebigambo byona ebi nakugambiire hali Isirairi, Yuda na ha mahanga goona, okurugirra ha kiro eki nabaliizeeho na iwe okubanza. Omu biro bya Yosiya okuhika hati.

³Enju ya Yuda rundi kakuba eraahurra akabi ako koona akandukuteekereza kubakora, buli muntu akacwa engeso ze embi, nanyowe nubwo nsobora kubaganyira obubi bwabo n'ekibi kyabo.”

⁴Yeremiya nukwo kweta Bbaruki mutabani wa Neriya, Bbaruki yahandiika ebigambo byona MUKAMA ebi yagambiire Yeremiya.

⁵Yeremiya yagambira Bbaruki ati, tindukwikirizibwa kutaaha omunju ya mukama;

⁶habweki, iwe wenka ogende kandi ha kiro eky'okusiiba, ebigambo bya MUKAMA ebi nakuragiire wabihandiika ha muzingo gw'ekitabu obisomere omunju ya MUKAMA, abantu boona bategere amatu. Kandi obisomere abantu ba Yuda abaliruga omu mbuga zaabu.

⁷MUKAMA, rundi araahurra okwesengereza kwabo, buli muntu nukwo acwe engeso ze embi, habwokuba MUKAMA, akahayira abantu banu akwasirwe muno ekiniga, kandi abiihiriirwe kimu.

⁸Bbaruki mutabani wa Neriya akakora byona Yeremiya omurangi ebiyamuragiire, yasoma ebigambo bya MUKAMA, omunju ya MUKAMA, naabiiha ha muzingo gw'ekitabu.

⁹Omu mwaka ogwa kataano ogwa Yekoyakimu mutabani wa Yosiya omukama wa Yuda, omu kwezi okwa mwenda, abantu boona abakaba bali Yerusaalemu, n'abantu boona abaarugire omu mbuga za Yuda baija Yerusaalemu, bakarangirra ekisiibo omumaiso ga MUKAMA.

¹⁰Bbaruki yasoma ebigambo bya Yeremiya, omunju ya MUKAMA, omu kisiika kya Gemaliya mutabani wa Safani omuhandiiki, ekikaba kiri omu zigati ey'eruguru, ha mulyango ogw'Irembo Erihyaka ery'Enju ya MUKAMA, naabiiha ha muzingo gw'ekitabu abantu boona bahunzire amatu.

¹¹Mikaaya mutabani wa Gemaliya mwijukuru wa Safani, obu yahuliire ebigambo bya MUKAMA byona ebyasomerwe ha muzingo gw'ekitabu,

¹²yasirimuka ha Nju ya MUKAMA, yataaha omu kisiika ky'omuhandiiki abanyoro boona nuho bakaba baikaliire: Erisaana omuhandiiki Delaaya mutabani wa Semaaya, Elinasani mutabani w'Akiboora, Gemaliya mutabani wa Safani, Zedekiya mutabani wa Hananiya n'abanyoro boona.

¹³Mikaaya, byona ebi yahuliire Bbaruki naasomera abantu, yabibagambira.

¹⁴Abanyoro boona nubwo baatumire Yehudi mutabani wa Nesaniya mwijukuru wa Seremiya mutabani wa Kimasi, agambire Yeremiya ati, “Kwata omuzingo gw'ekitabu ogu osomiire abantu, oije nagwo.” Bbaruki mutabani wa Neriya nukwo kukwata omuzingo gw'empapura yabahikaho.

¹⁵Bamugambira bati, “Ikarra ogusome.” Na Bbaruki yagubasomera.

¹⁶Obu baahuliire ebigambo byona, baakubuutukirangana bakwasirwe obutiini; baagambira Bbaruki bati, “Ebigambo binu byona, kituhikiriire kubigambira omukama.”

¹⁷Hanyuma baakaguza Bbaruki bati, “Tugambire ebigambo binu byona okabihandiika ota? Yeremiya akabikusomera?”

¹⁸Bbaruki yabagarukamu ati “Ebigambo ebi byona yabingambiraga, nyowe nimbihandiika na bwino, ha muzingo gw'ekitabu.”

¹⁹Hanyuma abanyoro baagambira Bbaruki bati, iwe na Yeremiya, “mugende mwesereke, hatabaho omuntu amanya nambere muli.”

²⁰Obu baamazire kuta omuzingo gw'ekitabu omu kisiika ky'Erisaama omuhandiiki, baataaha omu kikaali, baahikaho omukama, bamusoborra ebi byona.

²¹Omukama nubwo yatumire Yehudi atabarre omuzingo gw'empapura; yagwiha omu kisiika ky'Erisaama omuhandiiki; yagusomera omukama, n'abanyoro boona abakaba bali haihi omukama.

²²Kukaba kuli kwezi kwa mwenda, kandi omukama akaba asingire omu karuziika ei yaikaramuga omu busumi bw'obutiti, omumaiso ge, haroho omurro nigwaka ha kiswa.

²³Yehudi obu yakamaraga kusoma enkarra isatu rundi ina, Omukama nazisara ha muzingo nazinaga omu murro. Kinu akaikara naakikora kuhika omuzingo gwona obu gwahoireho.

²⁴Baitu omukama rundi abamu ha baheereza be abaahuliire ebigambo ebi byona, batatiine kandi batatemule byokujwara byabo.

²⁵Elisani, Delaaya na Gemaliya, noobu baayesengeriize muno omukama aleke kwokya omuzingo gw'ekitabu, atabahurre.

²⁶Yaragira Yeremeeri mutabani w'omukama, na Seraiya mutabani w'Azirieli, na Seremiya mutabani w'Abudeeri; bakwate Bbaruki omuhandiiki, na Yeremiya omurangi, baitu MUKAMA yabasereka.

²⁷Omukama obu yamazire kwokya omuzingo gw'ekitabu oguroho ebigambo, Bbaruki ebiyahandiikire naabigambirwa Yeremiya, MUKAMA akagambira Yeremiya ati:

²⁸“Kwata omuzingo gw'empapura ogundi, ohandiike ebigambo byona ebyahandiikirwe ha muzingo ogw'okubanza, ogwayokiibwe Yehoyakimu omukama wa Yuda.

²⁹Yehoyakimu omukama wa Yuda, omugambire oti, ‘MUKAMA naagamba ati, oyokeze omuzingo gw'ekitabu kinu, noogamba oti, “Kiki ekyakikuhandiikisizeemu noogamba oti, mananukwo omukama wa Bbabbulooni aliija ahwerekereze ensi enu, atemateme abantu n'ebisoro abamalemu?”

³⁰Habweki, Yehoyakimu omukama wa Yuda, MUKAMA naamugambaho ati: Talitunga muntu ow'aliikarra ha kitebe ky'obukama ekya Daudi kandi omutumbi gwe omu bwire bwa nyamusana gulihungurwa aheeru guteerwe omusana, kandi omu bwire bw'ekiro gunagwe omumbeho.

³¹Ndimufubira n'oruzaaro rwe n'abaheereza be, habw'obubi bwabo; bbo, abasi ba Yerusaalemu n'abantu ba Yuda, akabi aka nahayire kubaleetera baayanga kuhurra. Ndikabaleetera.’ ”

³²Yeremiya nubwo yakwasire omuzingo ogundi, yaguha Bbaruki omuhandiiki mutabani wa Neriya, yaguhandiikaho ebigambo byona Yeremiya ebiyamugambiraga ebikaba biri ha muzingo, Yehoyakimu omukama wa Yuda ogu yayokeze omu murro; kandi hali biri, hakongerwaaho ebigambo bingi ebirukusisana.