Read Runyoro - rutooro Yer 37 Bible Online

Yer 37 - Runyoro - rutooro bible

Yer 37

¹Zedekiya mutabani wa Yosiya, Nebbukadaneeza omukama wa Bbabbulooni ou yafoire mukama omunsi ya Yuda, nuwe yalemere omu kiikaro kya Koniya mutabani wa Yehoyakimu.

²Baitu uwe, abaheereza be nobwakubaire abantu ab'omunsi egi, ebigambo MUKAMA ebi yagambire naaraba omuli Yeremiya omurangi, busaho ayabitaireho omutima.

³Omukama Zedekiya akatumira Yeremiya omurangi, Yehukaali mutabani wa Seremiya, na Zefaniya nyakatagara mutabani wa Maasehiya, naagamba ati, “Otusabire hali MUKAMA Ruhanga waitu.”

⁴Omukasumi ako, Yeremiya akaba naakyarabanganamu omu bantu, habwokuba akaba atakatairwe omu nkomo.

⁵Ihe rya Faaraho likaba limazire kuruga Misiri; Abakalidaaya abakaba bagosire Yerusaalemu obu baahuliire eki, baaruga Yerusaalemu.

⁶Kinu nikyo ekigambo kya MUKAMA ekyamanyisiibwe Yeremiya omurangi kiti:

⁷“MUKAMA Ruhanga owa Isirairi naagamba ati: ‘Ogambire omukama wa Yuda ayakuntumireho kunyekaguzaaho, oti ihe rya Faraaho eryaizire kukukoonyera liri haihi kugaruka Misiri owabulyo.

⁸Kandi Abakalidaaya nibaija kugaruka barwanise orubuga runu; nibaija kuruhamba barwokye n'omurro.

⁹MUKAMA naagamba ati, muleke kwebiiha nimugamba muti, “Mananukwo Abakalidaaya batulekere,” tibakalekere.

¹⁰Habwokuba, noobu mwakutematema ihe lyona ery'Abakalidaaya abarukubarwanisa hati, hakasigaraho omuli bo emputa zonka, bali omu heema zaabu, baraimuka nabwo baakugarukire nukwo bookye orubuga runu n'omurro.’ ”

¹¹Ihe ry'Abakalidaaya obu lyamazire kuruga Yerusaalemu, habw'okurora ihe rya Faaraho nirirra haihi,

¹²Yeremiya akaimukya Yerusaalemu agende omunsi ya Benyamiini omu bantu b'owabo, kutunga omugabo gwe.

¹³Obu yahikire ha irembo lya Benyamiini, omulinzi ow'akaba ali aho, ibara lye Iriiya mutabani wa Seremiya mwijukuru wa Hananiya, yamukwata naagamba ati, “Noiruka noogenda omu Bakalidaaya.

¹⁴Yeremiya yagarukamu ati, eki obalize ky'ebisuba, tindukwirukira omu Bakalidaaya.” Baitu Iriiya ataikirize Yeremiya eki yamugambiire, nukwo kumukwata yamuleetera abanyoro.

¹⁵Abanyoro baabiihirirwa muno Yeremiya, nukwo kuragira bamuteere, kandi bamukingire omunju ya Yonasani omuhandiiki, ey'ekaba efoirwe nkomo.

¹⁶Yeremiya obu yataahire omu nkomo, amazireyo ebiro bingi,

¹⁷Omukama Zedekiya yamutumaho, yamukaguliza ha rubaju ati. “Haroho ekigambo MUKAMA eki arukugamba?” Yeremiya yagarukamu ati, “Ego kiroho.” Hanyuma yagamba ati, “Noija kuheebwayo omu mikono y'omukama wa Bbabbulooni.”

¹⁸Yeremiya nawe, yakaguza omukama Zedekiya ati, “Iwe, abaheereza bawe rundi abantu banu, nkabakora ki, eki wasigikiireho kunta omu nkomo?

¹⁹Abarangi bawe abaakurangiire bati, ‘Omukama wa Bbabbulooni talikurwanisa kandi talirwanisa, ensi enu, baraha’?

²⁰Hati nu, MUKAMA wange omukama nkwesengeriize: ompuliirize, kandi ompe eki ndukukusaba. Otaikiriza kungarra omba Yonasani omuhandiiki, obu ndaagarukayo, ntaliikara kugwayo.”

²¹Omukama Zedekiya yaragira, baata Yeremiya omu zigati y'abalinzi; buli kiro, baamuhaga akagaati nibakaiha mu bacumbi b'emigaati, okuhika emigaati ey'omu rubuga yoona obu yakahoire. Yeremiya nukwo yaikaire ati, omu zigati y'abalinzi.