Read Runyoro - rutooro Yer 38 Bible Online

Yer 38 - Runyoro - rutooro bible

Yer 38

¹Sefaniya mutabani wa Mataani, Gedaliya mutabani wa Pasuhara, Yukaali mutabani wa Sereniya, bakahurra ebigambo Yeremiya ebi akaba naagambira abantu ati,

²“MUKAMA naagamba ati, omuntu ow'araasigara omu rubuga runu, araitwa empirima, kiihe rundi kagingo; baitu ow'araarurugamu akeehongera Abakalidaaya, nuwe alyomeera, alitabuka, agende ali mwomeezi.

³MUKAMA naagamba ati, mananukwo, orubuga runu, nirwija kulekerwa ihe ery'omukama wa Bbabbulooni ruhambwe.”

⁴Abanyoro nubwo baagambiire omukama bati: “Omusaija onu aitwe, habwokuba habw'ebigambo nk'ebi ebi arukubaza, naaterebura abaserikale abanyakusigaire omu rubuga runu, n'abantu boona. Habwokuba omuntu ogu, abantu banu tarukubagondeza businge, baitu naabagondeza akabi.”

⁵Omukama Zedekiya yagarukamu ati: “Nukwo ngugwo mmubahaire, habwokuba omukama tasobora kukora kantu, inywe mutaikiriize.”

⁶Nukwo kukwata Yeremiya bamusirimuza emiguha, baamunaga omu iziba lya Malikiya mutabani w'omukama, erikaba liri omuzigati y'abalinzi. Omwiziba eri, hakaba hatarumu maizi, hakaba harumu esaabu yonka, Yeremiya yadikira omu saabu egi.

⁷Ebbedimereki Omunya-esopiya omugaragara omukonwa ow'akaba akwasiibwe okurolerra ekikaali, obu yahuliire nkooku bataire Yeremiya omu iziba, omukasumi ako, omukama asingire ha irembo lya Benyamiini.

⁸Ebbedimereki yaruga omu kikaali yabaza n'omukama naagamba ati,

⁹“MUKAMA wange Nzaire, abantu banu, bakozire ekintu kibi, kukora bati Yeremiya omurangi. Bamunagire omu iziba, omu rubuga nkooku hatarumu byokulya, enjara niija kumunagamu.”

¹⁰Omukama nubwo yaragiire Omunya-esopiya yamuragira ati, “Iha hanu abasaija basatu ogende nabo, mwihe omu iziba Yeremiya omurangi atakafiire.”

¹¹Ebbedimereki yagenda hamu n'abasaija omunju y'omukama, omulyahurro yaihayo engoye enkuru, ebisense yabisirimurra ha miguha yabinagira Yeremiya omu iziba.

¹²Hanyuma Ebbedimereki Omunyaesopiya, yagambira Yeremiya ati, “Ebisense binu n'engoye enkuru, obyeete omu mankwaha, nukwo oteho emiguha.” Yeremiya nukwo yakozire.

¹³Nubwo baasikire Yeremiya ha miguha, baamwiiha omu iziba; yaikara omu zigati y'abalinzi.

¹⁴Omukama Zedekiya, akatumaho Yeremiya amuhikeho ha mulyango ogwa kasatu ogurukutaahya omunju y'omukama, yamugambira ati, “Nyina eki ndukwenda kukukaguza, otansereka akantu n'akatoito kati.”

¹⁵Yeremiya yagarukamu Zedekiya ati, “Obu ndaakugambira, mananukwo tonyite? Kandi obu ndaakuhabura toikirize eki ndaakugambira.”

¹⁶Omukama Zedekiya nubwo yarahiire Yeremiya omunsita ati, “Ndahiire MUKAMA omwomeezi ayatuhaire obwomeezi, tindukwija kukwita, kandi tinkulekere abantu abo abarukwenda kukwita.”

¹⁷Yeremiya nubwo yagambiire Zedekiya ati, MUKAMA Ruhanga ow'amahe, Ruhanga owa Isirairi naagamba ati, “Obu oraayehongera abanyoro b'omukama wa Bbabbulooni, obu nubwo oraatabuka, orubuga runu tirwayokebwe n'omurro, iwe n'enju yawe muraayomeera.

¹⁸Baitu obu otalyehongera abanyoro b'omukama wa Bbabbulooni, obu orubuga runu, ruliheebwa Abakalidaaya, barwokye n'omurro, kandi na iwe tolibatabuka.”

¹⁹Omukama Zedekiya yagambira Yeremiya ati, “Nintiina Abayudaaya abairukiire omu Bakalidaaya, ntaikara kubagwa omu ngaro bakambonabonesa.”

²⁰Yeremiya yagarukamu ati, “Toorukwija kubagwa omu ngaro, hurra MUKAMA eki arukugamba, ohikirize eki nkugambiire, byona birikugendera kurungi, kandi oliba n'obusinge!

²¹Baitu obu oraayanga kwehonga, kinu MUKAMA nikyo angambiire.

²²Abakazi boona abaalekerwe omu kikaali ky'omukama wa Yuda bakaba nibatwalirwa abanyoro b'omukama wa Bbabbulooni, nibagamba bati: ‘Banywani bawe abeesigwa bakakubiiha, kandi bakakusingura; hati nkooku osaabiire omu saabu, bakwirukireho baayegendera.’

²³Bakazi bawe boona na batabani bawe, balitwalirwa Abakalidaaya, kandi na iwe wenka tolibatabuka, baitu olikwatwa omukama wa Bbabbulooni; kandi orubuga runu, rulyokebwa n'omurro.”

²⁴Zedekiya nubwo yagambiire Yeremiya ati, “Otagambiraho omuntu ebigambo binu, obu orabigamba, noija kufa.

²⁵Abanyoro obu baraahurra nkoku mbalize na iwe bakakuhikaho bakakugamba bati, ‘Tugambire eki ogambiire omukama, kandi n'omukama eki akugambiire; otatusereka akantu n'akatoito kati, titurukwija kukwita;’

²⁶Omale obagarukemu oti, ‘Nyesengeriize muno omukama nti, otangarra omba Yonasani nkagwayo.’”

²⁷Abanyoro boona, nubwo baahikireho Yeremiya baamukaguza, yabagarukamu omukama nkooku yamuragiire. Batasobole kugira eki bakora, habwokuba busaho muntu ayahuliire eki yabalize n'omukama.

²⁸Yeremiya yaikara omu zigati y'abalinzi, okuhika hakiro, Yerusaalemu ekirwakwatiirweho.