Read Runyoro - rutooro Yer 39 Bible Online

Yer 39 - Runyoro - rutooro bible

Yer 39

¹Omu mwaka ogwa mwenda ogwa Zedekiya omukama wa Yuda, omu kwezi okwa ikumi, Nebbukadaneeza omukama wa Bbabbulooni n'ihe rye, akaseesira Yerusaalemu yarugota;

²omu mwaka ogwa ikumi na gumu ogwa Zedekiya, omu kwezi okwa kana, ha kiro kya mwenda eky'okwezi, orubuga nubwo rwahagwirwe.

³Yerusaalemu obu yakwasirwe, abanyoro b'omukama wa Bbabbulooni boona, bakaija baikarra omu irembo erya hagati nubo banu: Neragali-sereze, Samugaara-nebbo, Sarasekimu omurabbusali, n'abanyoro b'omukama wa Bbabbulooni

⁴abandi boona, obu baababoine, bairuka, baaturuka orubuga ekiro baaraba omuhanda ogw'omusiri gw'omukama, ogunyakuraba omwirembo erinyakuli hagati y'ebisiika ebibiri; baagenda nibeebinga Arabba.

⁵Baitu ihe ry'Abakalidaaya lyabairukya, Zedekiya lyamukwatira omu byeya bya Yeriko; obu baamazire kumukwata, baamuleetera Nebbukadaneeza omukama wa Bbabbulooni baamumusangisa Rribbula omunsi ya Hanasi; yamucwera omusango.

⁶Omukama wa Bbabbulooni yaita batabani ba Zedekiya, yabaitira Ribula, na Zedekiya aroleriire ati, kandi yaita abanyoro ba Yuda boona.

⁷Yaihamu Zedekiya amaiso, yamubohesa enjegere nukwo atwarwe Bbabbulooni.

⁸Abakalidaaya bakokya ekikaali eky'obukama, amaju g'abantu, kandi baaseenya ebisiika bya Yerusaalemu.

⁹Hanyuma Nebbuzaradaani engabwa y'abalinzi, abantu abasigaireho abakaba basigaire omu rubuga, abo abakaba bamwirukiireho, n'abandi abaasigaire yabazaahisiza Bbabbulooni.

¹⁰Abamu ha bantu abanaku abakaba bataina kantu, yabaleka omunsi ya Yuda, kandi omu kasumi ako konyini, yabaha emisiri ey'emizabbibbu n'emisiri endi.

¹¹Nebbukadaneeza omukama wa Bbabbulooni, akaragira Nebbuzaradaani engabwa y'abalinzi hali Yeremiya, naagamba ati,

¹²“Ngugwo mutwale, omurolerre kurungi, kandi otamukora akabi, baitu omukorre kyona eki araakugambira.”

¹³Nebbuzaradaani engambwa y'abalinzi, Nebbusazibbaani, Omurabbusali, Neragali-Sereze omurabbumaagi, n'abanyoro abakuru boona ab'omukama wa Bbabbulooni,

¹⁴nubwo baatumire abantu, baiha Yeremiya omu zigati y'abalinzi. Bamukwasa Gedaliya mutabani w'Ahikamu mwijukuru wa Safani amutaahye omuka. Yeremiya nukwo yaikaire ati omu bantu.

¹⁵Yeremiya obwakaba akyakingiirwe omu zigati y'abalinzi, MUKAMA akamuragira ati:

¹⁶“Genda ogambire Ebbedimereki Omunya-esopiya oti, ‘MUKAMA ow'amahe, Ruhanga owa Isirairi naagamba ati: Hati nu ebigambo nagambireho orubuga runu, ninyija kubihikiriza, nindeeta akabi, ntarukuleeta oburungi, kandi ha kiro eki, birihikirizibwa, na iwe noorora oti.

¹⁷MUKAMA nagamba ati ha kiro eki, ndikucungura omumikono y'abantu abo abarukutiina.

¹⁸MUKAMA naagamba ati, Mananukwo ndikujuna, toliitwa mpirima; olitabuka, habwokuba okanyesiga.’ ”