Read Runyoro - rutooro Yer 4 Bible Online

Yer 4 - Runyoro - rutooro bible

Yer 4

¹“MUKAMA naagamba ati: Isirairi obu oraaba noogonza kugaruka, ogaruke hali nyowe. Ofuuhye ebikorwa byawe ebibi, Otaligaruka kutengatengeeta.

²Obu olirahira oti, ‘Ndahiire MUKAMA omwomeezi!’ Omu mananu, omu bwinganiza n'omu bwesige, omuli iwe amahanga goona nubwo galiheererwamu omugisa, kandi niiwe galyenyumirizaamu.”

³Habwokuba abantu ba Yuda n'abasi ba Yerusaalemu, MUKAMA naabagambira ati: “Muteere kurungi ebiteneke, muleke kusiga omumahwa.

⁴Mwesale inywenka habwa MUKAMA, Inywe abasaija ba Yuda n'abasi ba Yerusaalemu, mweyiheho ebisusu by'emitima yanyu; habw'ebibi ebi mwakozire ekiniga kyange kitaija kwimuka nk'omurro, kikaaka, hakaburaho omuntu ow'okukiraaza.”

⁵Mukimanyise omunsi Yuda, mukirangirre omu rubuga Yerusaalemu mugambe muti, “Muteere engwara ehulirwe omunsi yoona; mutokere haiguru mugambe muti, ‘Mwesorooze tugende tutaahe omu mbuga ezizitiriirwe zaaguma’

⁶Mwimukye ebendera mugyolekiize Ziyoni, mwiruke muteezigaziga, nukwo mutunge obusinge habwokuba nindeeta akabi n'okuhwerekerra okutagambwa, nimbiiha ha bukiizi obw'emoso.

⁷Entale erugire omu kijumba kyaayo yagenda. Omuhwerekereza w'amahanga aimukize arugire omu kiikaro ky'ensi yawe agifoole itongo; embuga zanyu niziija kuba bikambuuro ebitarumu muntu.

⁸Habweki, mweteege eguniya, muteere empamo kandi muborooge; habwokuba ekiniga kya MUKAMA ekirukwaka eki yatukwatiirwe, tikikamuhoireho.”

⁹“MUKAMA naagamba ati: ha kiro eki, omukama n'abanyoro balihwa amasiko; banyakatagara obutiini bulyenda kubaita, kandi abarangi balitangara.”

¹⁰Nubwo nagambire nti: “Mazimakwo MUKAMA Ruhanga obu wagambiire abantu ba Yerusaalemu oti, nimwija kuba n'obusinge, kandi kunu empirima ebahikireho, okababiihira kimu ebisuba.”

¹¹Omu kasumi ako, abantu ba Yerusaalemu nubwo baligambirwa ngu, “omuyaga ogurukwokya niguteera niguruga omwirungu, nigutwara nambere bali.

¹²Omuyaga ogu, tiguliba muyaga omurungi ogunyakuhuuhuura omusunga gwonka, omuyaga oguliragirwa MUKAMA, guliba gw'amaani okukira ogu. Omu kasumi ako, Nyowe nyenka ninyowe ndibacwera omusango.”

¹³Dora naija nk'ebicu, ebigaali bye biri nk'akairiringwa embaraasi ze nizanguha okukira amasamba tulikibona, habwokuba tuliba b'okuhwerekerra!

¹⁴Iwe Yerusaalemu, omutima gwawe ogwogyemu ebibi, nukwo ojunwe. Olihikya nkaha kwikara nootekereza ebiteekerezo ebibi?

¹⁵Baitu, iraka niridumiriirra Daani nirimanyisa amakuru kandi niryema ha busozi Efuraimu nirirangirra akabi.

¹⁶Mutererre amahanga nkooku arukwija; murangirre Yerusaalemu muti: “Abanyanzigwa abalirugota baliruga omunsi eya hara, balicoomera embuga za Yuda.

¹⁷MUKAMA naagamba ati: Baligota Yerusaalemu nk'abalinzi oku behinguliriza omusiri, habwokuba rukaanyemera.

¹⁸Engeso zawe n'ebikorwa byawe, nibyo bikuleetiire eki. Ako nuko akabi akookuhwerekereza akoyeretiire, akabi akahinguraine obusaalizi kakucumitiire kimu omutima.”

¹⁹Barungi omuhito, omuhito guncandize! Obujune bw'okunyita! Inywe ebisiika by'omutima gwange! Omutima gwange niguteerwa n'ebikiratima; tinsobora kuteekaana; habwokuba nimpurra engwara neegamba, nimpurra enduuru y'obulemu.

²⁰Emihito niija ehonderaine, ensi yoona ehindukire itongo. Eheema zange ihwerekereziibwe ahonaaho, entimbe zange tizikiroho.

²¹Ndihikya ha kurora ebendera, n'okuhurra iraka ly'engwara?

²²“Habwokuba abantu abange basema, tibammanyire; baana badoma, tibarukwetegereza. Baina amagezi ag'okukora ebibi, baitu okukora ebirungi eki tibakimanyire.”

²³Nkarora ensi, nasanga liri itongo kandi etarumu kantu; kandi narora iguru, likaba litarumu kyererezi.

²⁴Nkarora ensozi, zikaba niitengeeta, kandi obusozi bwona, bukaba nibuzongazonga.

²⁵Nkamagamaga, tinarora muntu, enyonyi zoona ez'omu mwanya zikaba ziirukire.

²⁶Nagaruka narora, ensi eyayanaga ebijuma, ekaba efookere irungu, kandi habw'ekiniga kya MUKAMA ekibi, embuga zaayo, bikaba biri bikamburo.

²⁷Habwokuba naagamba ati: “Ensi yoona eriba itongo; baitu tindigihwerekerereza kimu.

²⁸Habweki ensi eriteera empamo niiguru liriiragura, habwokuba nkakigamba kandi tindihindura kiteekerezo kyange nkakicwamu, kandi tindikigarukaho.”

²⁹Abantu boona obu balihurra obwogo obw'abatembi b'embaraasi n'abarasi b'emyambi, baliiruka. Abamu baliiruka bataahe ekibira, abandi balitemba hagati y'emyandara. Embuga zoona zirisigara kwonka, busaho muntu aligaruka kwiraaramu!

³⁰Iwe mwinazi we, noogenderra ki kujwara ebirukunanata, kwejahiika n'ebintu ebya zaabbu, kwesiiga erangi ha maiso? Nooyesemereza busa. Enganjani zawe zikakuhwamu nibenda kukwita.

³¹Habwokuba, nkahurra okurra nk'okw'omukazi arukurumwa ebisa eby'okuzaara, nkahurra okwamuza nk'okw'omukazi arukuzigaija; okwamuza oku, kw'abantu ba Siyoni, nubo barukuhiija, nibanaga emikono nibagamba bati “Nyabura nyowe! Nagwa omumaiso g'abaziinzi.”