Read Runyoro - rutooro Yer 40 Bible Online

Yer 40 - Runyoro - rutooro bible

Yer 40

¹Nebbuzaradaani engabwa y'abalinzi obu yamazire kwikiriza Yeremiya aruge Rrama, kandi amutwaire aboherwe enjegere, hamu n'abakwatwa boona aba Yerusaalemu na Yuda abakaba nibazaahisibwa Bbabbulooni, kinu nikyo ekigambo MUKAMA eki yagambiire Yeremiya:

²Engabwa y'abalinzi akagarra Yeremiya ha rubaju yamugambira ati, “MUKAMA Ruhanga wawe, ensi enu akagirangaho akabi, kanu

³akaleesire, yakora nkooku yagambire. Eki muhikiirweho ekintu kinu, habwokuba mukasobeza MUKAMA mwayanga kumuhurra.

⁴Hati kiro kinu, ninkubohorraho empingo ezinyakukuli ha mikono. Obu oraaba noogonza kugenda na nyowe Bbabbulooni, ija tugende, ndikurolerra kurungi, baitu obu oraaba otarukugonza, oleke. Naga amaiso orole, ensi egi yoona ngigyo noogirora; genda hoona nambere hali harungi kandi nambere hasemeriire kugenda.

⁵Obu oraaba noikara, garuka omba Gedaliya mutabani w'Ahikamu, mwijukuru wa Safani, omukama wa Bbabbulooni ou yafoire mulemi mukuru ow'embuga za Yuda, oikale nawe, hamu n'abantu abandi; rundi ogende handi nambere hasemeriire kugenda.” Engabwa y'abalinzi, nubwo yamuhaire ebyokulya n'ekisembo, yamuraga yagenda.

⁶Yeremiya yagenda Mizipa omba Gedaliya mutabani w'Ahikamu, yaikara nawe, hamu n'abantu abakaba bakyasigaire omunsi egi.

⁷Engabwa z'amahe zoona ezikaba ziri omu byaro n'abasaija baabu, obu baahuliire ngu omukama wa Bbabbulooni akomere Gedaliya mutabani w'Ahikamu amufoire mulemi omukuru omunsi, kandi amukwasize abasaija, abakazi n'abaana, abo abaakirraga kimu obunaku omunsi, abakaba batazaahisibwe Bbabbulooni,

⁸baagenda Mizipa omba Gedaliya-Isimairi mutabani wa Nesaniya, Yohanaani mutabani wa Kaleya, Seraaya mutabani wa Tanihumeesi, batabani b'Efai Omunetofasi, na Yezaniya mutabani w'omumaaka, n'abasaija baabu.

⁹Gedaliya mutabani w'Ahikamu, mwijukuru wa Safani, yabarahira hamu n'abasaija baabu ati, “Mutatiina kuheereza Abakalidaaya. Mwikale omunsi muheereze omukama wa Bbabbulooni nukwo mutunge obusinge.

¹⁰Nyowe habwange ninyija kwikara Mizipa, mbege mukurasi wanyu, hali Abakalidaaya abalituhikaho; baitu inywe, musorooze eviini, ebijuma eby'omu mwaka ogw'ekyanda n'amagita, ebimu mubyahule omu minaga yanyu, nukwo mwikale omu mbuga ezi mwahambire.”

¹¹Omu mulingo nugwo gumu Abayudaaya boona abakaba bali Mowabbu omu Baamooni, Edomu n'omunsi ezindi, nabo obu baahuliire ngu omukama wa Bbabbulooni alekere abantu bake omunsi ya Yuda, kandi ngu akomere Gadaliya mutabani w'Ahikamu mwijukuru wa Safani, abe mulemi wabo omukuru,

¹²boona nubwo baarugire omubiikaro byona ebi bakaba babingiirwemu, baija omunsi ya Yuda, baahika Mizipa omba Gedaliya; baasorooza eviini n'ebijuma eby'omwaka ogw'ekyanda ebihinguraine muno obwingi.

¹³Yohanaani mutabani wa Kaleya n'abaduumizi b'amahe boona, abakaba bali omu byaro, baagenda Mizipa omba Gedaliya,

¹⁴baamukaguza bati, “Omanyire Baalisi omu kama w'Abamooni, nkooku atumire Isimairi mutabani wa Nesaniya kukwita?” Baitu Gedaliya tiyabaikiriza.

¹⁵Yohanaani mutabani wa Kaleya nubwo yabaliize Gedaliya omunsita, bali Mizipa ati, “Kangende nyite Isimairi, mutabani wa Nesaniya eki busaho muntu arakimanya. Naasobora kukwita ata, Abayudaaya boona abanyakukwesorooliizeeho bakararanga, n'abantu ba Yuda abasigaireho, bakahwerekerra?”

¹⁶Baitu Gedaliya mutabani wa Ahikamu yagarukamu ati, “Eki otakisura, habwokuba Isimairi noomuhangirra.”