Read Runyoro - rutooro Yer 41 Bible Online

Yer 41 - Runyoro - rutooro bible

Yer 41

¹Omu kwezi okwa musanju, Isimairi mutabani wa Nesaniya mwijukuru w'Erisaama omwana w'engoma omu ha banyoro b'omukama abakuru, aina abasaija ikumi akahika Mizipa omba Gedaliya. Obu bakaba nibalya hamu omu kiikaro eki Mizipa,

²Isimairi mutabani wa Nesaniya, yayemerra hamu n'abasaija be ikumi, baimukirra Gedaliya mutabani w'Ahikamu mwijukuru wa Safani, omukama wa Bbabbulooni ou akaba afoire mulemi omukuru ow'ensi, baamwisa empirima zaabu.

³Isimairi, Abayudaaya boona abakaba bali Mizipa hamu na Gedaliya, n'abaserikale Abakalidaaya abakaba bali aho nabo yabaita.

⁴Hakiro ekyakurasireho, Gedaliya amazire kwitwa hatakabaireho muntu anyakukimanyire.

⁵Abasaija kinaana beemwiire omuleju, bajwaire engoye ezitemukire, beesarasazire omubiri, bakaruga Sekemu, Siilo, na Samaliya, baleesire ebihongwa eby'ebyokulya n'obubbaani kubihonga omunju ya MUKAMA.

⁶Isimairi mutabani wa Nesaniya akaruga Mizipa yagenda kubatangaana, akaba narra obu yabahikireho, yabagambira ati, “Murugeyo murole Gedaliya.”

⁷Obu baatahire omurubuga, Isimairi hamu n'abasaija be baabaita, emitumbi yabu baaginaga omu iziba.

⁸Baitu omuli bo, hakaba harumu abasaija ikumi bagambira Isimairi bati, “Otatwita, habwokuba twina engano, sayiri, amagita n'obwoki tubiserekere omu kisaka.” Abo nukwo kubaleka, tiyabaita hamu na bagenzi baabu.

⁹Iziba Isimairi eri yanagiremu emitumbi y'abantu boona aba akaba aisire, likaba liri likooto, lirimirwe omukama Asa, habwokwerinda Baasa omukama wa Isirairi; Isimairi mutabani wa Nesaniya akaliijuzaamu emitumbi.

¹⁰Hanyuma, abantu boona abaasigaireho abakaba bali Mizipa, bahara b'omukama n'abantu boona abakaba balekerwe Mizipa, Nebbuzaradaani engabwa y'abalinzi aba akaba akwasize Gedaliya mutabani w'Ahikamu, Isimairi mutabani wa Nesaniya nubwo yabakwasire; yabatwara bali banyankomo, yaimukya kugenda omu Bamooni.

¹¹Baitu Yohanaani mutabani wa Kaleya, n'engabwa z'amahe boona abakaba bali hamu nawe, obu baahuliire akabi koona Isimairi mutabani wa Nesaniya aka akaba akozire,

¹²baatwara abasaija baabu boona, baagenda kumurwanisa. Baamukwatira ha kiijongo ekikooto ekinyakuli Gibbyoni.

¹³Abantu boona abakaba bali na Isimairi obu baaboine Yohanaani mutabani wa Kaleya n'engabwa z'amahe zoona omuhimbo gwayenda kubaita.

¹⁴Abantu boona Isimairi aba akaba aihire Mizipa bali banyankomo nukwo kukubuutuka, baagenda hali Yohanaani.

¹⁵Baitu Isimairi mutabani wa Nesaniya hamu n'abasaija ikumi, bairukaho Yohanaani, baagenda omu Bamooni.

¹⁶Yohanaani n'engabwa z'amahe boona abakaba bali nawe, nubwo yatwaire abantu boona, Isimairi mutabani wa Nesaniya aba akaba aihire Mizipa bali banyankomo amazire kwita Gedaliya mutabani w'Ahikamu, abaserikale, abakazi, abaana n'abagaragara, n'abakonwa Yohanaani aba yaihire Gibbyoni yabagarra.

¹⁷Baagenda baikara Gerusi haihi na Betelehemu baina ekiteekerezo eky'okugenda Misiri,

¹⁸nukwo beeme hara Abakalidaaya; bakaba nibabatiina muno, habwokuba Isimairi mutabani wa Nesaniya akaba aisire Gedaliya mutabani w'Ahikamu, omukama wa Bbabbulooni ou akaba afoire mulemi mukuru w'ensi egi.