Read Runyoro - rutooro Yer 42 Bible Online

Yer 42 - Runyoro - rutooro bible

Yer 42

¹Engabwa z'amahe zoona, Yohanaani mutabani wa Kaleya, Azariya mutabani wa Hosaaya, n'abantu boona okurugirra hali arukukirra kimu okuba wa hansi, okugarukira hali arukukirra kimu okuba w'Ekitiinisa, nubwo bairiire haihi,

²baagambira Yeremiya omurangi bati: “Tukwesengeriize otukorre eki turukukusaba, kandi otusabire hali MUKAMA Ruhanga wawe, osabire abasigaireho banu boona, itwe ira abakaba bali baingi muno, hati tuli bake mali, na iwe nkooku orukurora,

³otusabire, MUKAMA Ruhanga wawe atwoleke omuhanda ogu turaakwata n'ekintu eki tusemeriire kukora.”

⁴Yeremiya omurangi yabagambira ati: “Mpuliire eki mugambire kandi mananukwo, ninyija kubasabira hali MUKAMA Ruhanga wanyu nkooku murukusaba; kyona MUKAMA Ruhanga wanyu eki araagarukamu, ndaakibagambira, busaho ekindaabasereka.”

⁵Nubwo baagambiire Yeremiya bati: “Obu tutalihikiriza ebigambo byona MUKAMA Ruhanga wawe ebiyakutumire kutugambira, MUKAMA ogu abe kaiso ow'amazima, kandi omwesigwa ow'okutusingisa omusango.

⁶Noobu turaaba nitukigonza, rundi tutarukukigonza, kituhikiriire kuhurra MUKAMA Ruhanga waitu ou turukukutumaho kutusabira obu turaahurra MUKAMA Ruhanga waitu, nubwo turaatunga obusinge.”

⁷Obu haahingwireho ebiro ikumi, ekigambo kya MUKAMA kikamanyisibwa Yeremiya.

⁸Yeremiya nukwo kweta Yohanaani mutabani wa Kaleya, n'engabwa z'amahe zoona ezikaba ziri hamu nawe, n'abantu boona okurugirra h'arukukirra kimu kuba wa hansi, okugarukira h'arukukirra kimu ekitiinisa,

⁹yabagambira ati: “MUKAMA Ruhanga owa Isirairi ou mwantumireho kubeesengerereza naagamba ati:

¹⁰Obu muraikara omunsi enu, obu nubwo ndibombeka mbagumye, baitu tindibaseesa; ndibabyaara, baitu tindibameenya; habwokuba akabi mbakozire, kakansaaliza.

¹¹Omukama wa Bbabbulooni ow'arukubakanga, muleke kumutiina; MUKAMA naagamba ati, Muleke kumutiina, habwokuba ndi na inywe, mbajune kandi mubaiheho.

¹²Ndibagirra embabazi, nawe ndimuleetera kubagirra embabazi, nukwo abaikirize mwikale omunsi y'owanyu.

¹³Baitu obu muraaba nimugamba muti, titurukwija kwikara omunsi enu, mukalema kuhurra MUKAMA Ruhanga wanyu,

¹⁴mukagamba muti, ‘Nangwa, turaagenda Misiri nambere tutalibona bulemu, nambere tutalihurra iraka ly'engwara kandi nambere tutaliburwa byokulya, nuho twikale,’

¹⁵hati inywe endagalika za Yuda, muhurre MUKAMA eki arukugamba. MUKAMA ow'amahe Ruhanga owa Isirairi naagamba ati: Obu muraagumiza kimu kugenda Misiri, obu muraagenda mukaikarayo,

¹⁶empirima ei murukutiina, nuho eribasanga, kiihe ey'erukubacwa enkizi, erigenda ebakuraatiire, ebataahize kimu omunsi Misiri; oku nuho muligwa.

¹⁷Abantu boona abanyakugumiize kimu kugenda kwikara Misiri, oku nuho baligwa, baitwe empirima, kiihe rundi kagingo, busaho n'omu ow'alisigaraho, akatabuka akabi aka ndukwija kubaleetera.

¹⁸“MUKAMA ow'amahe Ruhanga owa Isirairi naagamba ati: obu muraagenda Misiri, nkooku nakwatiirwe muno ekiniga kandi nkooku nabiihiriirwe abantu ba Yerusaalemu nainywe nukwo ndukwija kubakwatirwa ekiniga nti, kandi nukwo ndukwija kubabiihirirwa. Mulifooka kintu ekinugwa ihano ky'okutiinwa, mukyeno, kandi ekijumo. Ekiikaro kinu, timuligaruka kukirora.

¹⁹Inywe endagalika eza Yuda, MUKAMA akabatanga ati, ‘Mutaligenda Misiri, mumanyire kimu, nkooku ndukubahabura kiro kinu,

²⁰nti mukahaba mwayeyiita. Habwokuba mukantumaho MUKAMA Ruhanga wanyu nimugamba muti, otusabire hali MUKAMA Ruhanga waitu, kyona eki arakagamba, okitugambire turaakikora.’

²¹Kandi nkibagambiire kiro kya hati, baitu kyona MUKAMA Ruhanga wanyu eki yantumire kubagambira, mwangire kukikora.

²²Hati mumanyire kimu ngu oku nambere murukwegomba kugenda kwikara, nimwija kunagwayo empirima, kiihe na kagingo.”