Read Runyoro - rutooro Yer 43 Bible Online

Yer 43 - Runyoro - rutooro bible

Yer 43

¹Yeremiya obu yamazire kubaliza abantu boona ebigambo ebi byona, MUKAMA Ruhanga wabo ebi yamutumire kubagambira,

²hakaimuka Azaliya mutabani wa Hosaaya, Yohanaani mutabani wa Katea, n'abantu abandi ab'emigayo bakamugarukamu bati: “N'otubiiha, MUKAMA Ruhanga waitu atakutume kututanga kufurukira Misiri;

³Bbaruki mutabani wa Neriya nuwe akwoheriize kuturwanisa otulekere Abakalidaaya batwite, rundi batuzaahye batutwale Bbabbulooni.”

⁴Yohanaani mutabani wa Kareya n'engabwa zoona ez'amahe, n'abantu boona, nukwo baayangire bati kuhurra MUKAMA baikale omunsi ya Yuda.

⁵Baitu Yohanaani mutabani wa Kaleya, n'engabwa zoona ez'amahe, baatwara abantu boona aba Yuda abaasigaireho abakaba bagarukire kwikara omunsi ya Yuda barugire omumahanga goona aga bakaba bararangiziibwemu abakaba bagarukire kwikara omunsi ya Yuda.

⁶Abasaija, abakazi, abaana, ababiitokati, na buli-muntu weena Nebbuzaradaani engabwa y'abalinzi ou akaba asigiire Gedaliya, mutabani w'Ahikamu, mwijukuru wa Safani; na Yeremiya omurangi, na Bbaruki mutabani wa Neriya.

⁷Abo nubo baayangire kuhurra MUKAMA eki yagambire, baagenda omunsi Misiri. Bahika Tahapanihesi.

⁸Obu bakaba bali Tahapanihesi, MUKAMA akagambira Yeremiya ati:

⁹“Okwate amabaale amakooto, ogasereke omu budongo, omu muhanda ogwaliriirwe n'amabale, ogwa ha irembo ogurukutwara Tahapanihesi nigutaaha omu kikaali kya Faraaho; eki okikole abantu ba Yuda nibakurora,

¹⁰kandi obagambire oti: MUKAMA ow'amahe Ruhanga owa Isirairi naagamba ati: ‘Nyowe MUKAMA ow'obusobozi bwona, Ruhanga owa Isirairi omu kiikaro kinu ninyija kuleetamu omuheeeza wange, nuwe omukama Nebbukadaneeza owa Bbabbulooni ha mabaale aga muziikire ago, nuho alita ekitebe eky'obukama bwe, kandi nugo aliteeraho eheema ye ey'obukama.

¹¹Naija kwija ateere ensi enu Misiri. Abo abaatekaniriziibwe kagingo, baitwe kagingo, abaateekaniriziibwe kunyagwa banyagwe, kandi n'abo abaateekaniriziibwe kwitwa empirima, baitwe empirima.

¹²Amaju g'embandwa za Misiri, aligacumika omurro embandwa azitwale nkabanyankomo azokye, omuliisa nkooku asemeza omwegereko gwe akagumaramu enda, ensi enu Misiri nawe nukwo aligisemeza ati; kandi aligirugamu n'obusinge.

¹³Alihenda enyomyo ez'amabaale eziraihire eza Heryopolisi orw'omunsi Misiri; kandi amaju ag'embandwa za Misiri, aligokya n'omurro.’”