Read Runyoro - rutooro Yer 44 Bible Online

Yer 44 - Runyoro - rutooro bible

Yer 44

¹Kinu nikyo ekigambo Yeremiya eki yagambiirwe hali Abayudaaya boona abaikaraga omunsi Misiri, abaikaraga Migidori, Tahapanihesi, Menfisi n'omunsi eya Pasiroosi,

²“MUKAMA ow'amahe, Ruhanga owa Isirairi naagamba ati: Akabi koona aka naleetiire Yerusaalemu, n'embuga za Yuda zoona mukakerorra. Murole embuga ezi. Dora hati goona matongo busaho muntu asobora kuziikaramu,

³eki, kikaleetwa ebibi ebi baakozire bankwasa ekiniga, baagenda kucumiikirra obubbaani n'okuheereza embandwa; ezibakaba batamanyire, kandi ezitaramanyirwe inywe na baisenkuru inywe.

⁴Baitu naikaraga nimbatumira abaheereza bange abarangi, nimbagamba nti: ‘ekintu ekinugwa eki inoba mutakikora!’

⁵Baitu batahurre, kandi batateho mutima kuhurra, nukwo bakaleka ebibi byabo n'okucumiikirra obubbaani embandwa.

⁶Nanyowe nukwo kubiihirwa ekiniga kikararra kunyita nayokya embuga za Yuda n'enguudo za Yerusaalemu; byafooka matongo kandi mahamba, nkooku biri na hati.

⁷Hati MUKAMA ow'amahe, Ruhanga owa Isirairi naakaguza ati: Habwaki mweretera akabi akarukwingana aho ak'okubaihaho omusaija n'omukazi, enkerembe, n'abaana mukahwera kimu omunsi Yuda, hakaburaho n'omu asigaireho?

⁸Habwaki mumbiihiza, nimuramya ebisisani by'embandwa, nimutambira ebyonzira embandwa ez'omunsi enu Misiri, eimwizire kwikaramu, nukwo mukeehebwe, mube kintu ky'okukyenwa, mube kintu ky'okugaywa amahanga goona ag'ensi?

⁹Mweberwe ebibi ebya baisenkuru inywe, abakama ba Yuda, bakazi baabu, ebyanyu inywenka n'ebya bakazi banyu, ebi baakoliire omunsi ya Yuda n'omunguudo eza Yerusaalemu?

¹⁰Nookuhika hati tibakeeteeraga kandi tibakatiinaga tibakakwataga biragiro ebi nabateeriireho n'ebigambo ebi nabagambiire kandi ebi nagambiire baisenkuru inywe.

¹¹“MUKAMA ow'amahe, Ruhanga owa Isirairi nikyo arukugambira ati: Hati nu, ninyija kubarwanisa, ndeete akabi mpwerekereze Yuda yoona.

¹²Abalisigaraho abacwiremu kufurukira Misiri, abo boona ndibamaraho okurugirra harukukirra kimu kuba wa hansi kugarukira harukukirra kimu ekitiinisa, Misiri nuho baligwa, banu baliitwa obulemu, banu baitwe kiihe, baliba kintu ky'okunuga, kintu ky'amahano, kintu ky'okukyenwa, kandi ky'okugaywa.

¹³Abo aba Misiri ndibafubira nkooku nafubiire aba Yerusaalemu, mbaise obulemu, kiihe na kagingo,

¹⁴ha bantu ba Yuda abaasigaireho abaizire kwikara Misiri, nukwo habuleho n'omu ow'alitabuka rundi ow'alyomeera rundi ow'aligaruka omunsi ya Yuda ei barukwegomba kugaruka kwikaramu habwokuba tibaligarukayo, okwihaho abasingwa embarwa.”

¹⁵Abasaija boona abaamanyire bakazi baabu nkooku bacumikiriire embandwa obubbaani, n'abakazi abandi abakaba bali aho, ekitebe ekikooto eky'abantu, abantu boona abaikaraga Pasiroosi omunsi Misiri, nubwo baagarukiremu Yeremiya bati:

¹⁶“Ekigambo eki otugambiire omu ibara lya MUKAMA titurukwija kukiikiriza.

¹⁷Baitu nitwija kukora byona ebi twaraganiize kukora, nitwija kucumikirra omugo w'omwiguru obubbaani, tumuhe n'ebihongwa eby'ebyokunywa, nkooku twakakoraga kara koona, itwe na baisenkuru itwe, bakama baitu n'abanyoro baitu ab'omu mbuga eza Yuda, n'omu makuute ga Yerusaalemu; habwokuba omu kasumi ako tukaba twina ebyokulya bingi kandi tukaba tugwagwaine tutarukubona naku.

¹⁸Baitu okuruga twalekiire aho okucumikirra omugo ow'omwiguru obubbaani n'okumuha ebihongwa eby'ebyokunywa, ebintu byona bikatuhwaho twahwerekerezibwa obulemu na kiihe.”

¹⁹Abakazi baakaguza bati: “Obu twacumiikirraga omugo ow'omwiguru obubbaani tukamuha n'ebihongwa eby'ebyokunywa, baiba-itwe batakiikirize nukwo twamucumbira keeki ezinyakuroho ekisisani kye n'okumuha ebihongwa eby'ebyokunywa?”

²⁰Yeremiya nubwo yagarukiremu abantu boona abasaija n'abakazi abaamukagwize ekikaguzo eki ati:

²¹“Obubbaani obu mwacumiikirraga omu mbuga za Yuda n'omu makuute ga Yerusaalemu inywe, baisenkur-inywe, abakama banyu, abanyoro banyu, n'abantu boona ab'omunsi egi eki MUKAMA atakiijuke? Atakiteekereze?

²²Tiyaakwongiire kubagumiisiriza kukora ebibi, kandi tiyakwongiire kugumiisiriza ebintu ebibi ebi mwakozire; ensi yanyu nikyo yafookiire itongo kandi ihamba, nikyo yakyeniirwe yaburwa ow'okugiikaramu, nkooku eri hati.

²³Eki kikarugiirra ha kusobeza MUKAMA mwayanga kumuhurra, mwalemwa kukwata ebiragiro bye n'ebigambo bye, nukwo kugwerwa akabi nk'ako, akanyakuroho ha kiro kinu.”

²⁴Yeremiya yagambira abantu boona, okukira muno yagambira abakazi boona ati: “Inywe inywena aba Yuda, abanyakuli omunsi Misiri, muhurre ekigambo kya MUKAMA

²⁵MUKAMA ow'amahe Ruhanga owa Isirairi naagamba ati: Basaija inywe na bakazi banyu, eki mwabalize nakanwa kanyu mukikozire n'emikono yanyu, mukagamba muti: ‘Mananukwo tuhikirize eki twaraganiize ngu tulikikora, nukwo okucumikiirra omugo ow'omwiguru obubbaani n'okumuha ebihongwa eby'eby'okunywa.’ Habweki nu, ebi mwaraganiize mubigumye kandi mubihikirize!

²⁶Habweki inywe inywena aba Yuda abanyakuli omunsi Misiri, muhurre ekigambo kya MUKAMA. MUKAMA naagamba ati: Ndahiire ibara lyange ery'ekitiinisa, tindigaruka kwikiriza omuntu n'omu hali inywe, obu araabaga naaragaana kurahira ibara lyange naagamba ati: ‘Ndahiire MUKAMA Ruhanga omwomeezi.’

²⁷Ndibaikazaaho eriiso bagwe omu kabi, baitu baleke kutunga obusinge; abantu boona aba Yuda abanyakuli Misiri balihwerekerra baitwe obulemu na kiihe, okuhika boona obu balikahwaho.

²⁸Kandi abo abake abalitabuka obulemu, nubo baliruga Misiri, bagaruke omunsi ya Yuda; abo boona aba Yuda, abaizire kwikara Misiri nubwo balimanya ekigambo ekyabaire ky'amazima nikyo ekyange rundi ekyabu.

²⁹MUKAMA naagamba ati: Eki, nikyo kiribamanyisa nkooku ndibafubirra omu kiikaro eki, nukwo mumanye ebi nagambire hali inywe nkooku birihikirra, bibarugiremu akabi.

³⁰MUKAMA naagamba ati: Zedekiya omukama wa Yuda nkooku namulekiire Nebukadeneeza omukama wa Bbabbulooni ow'akaba ali munyanzigwa we kandi ayagendaga kumwita, Faraaho Hofura omukama wa Misiri nawe nukwo ndimulekera abanyanzigwa be n'abo abarukwenda kumwita.”