Read Runyoro - rutooro Yer 46 Bible Online

Yer 46 - Runyoro - rutooro bible

Yer 46

¹Kinu nikyo ekigambo MUKAMA eki yagambiire Yeremiya omurangi hali amahanga:

²Omu mwaka ogwa kana ogw'obusinge bwa Yehoyakimu mutabani wa Yosiya, ihe lya Faraaho Neko omukama wa Misiri erikaba liri Karakemusi haihi n'ekisaaru Efuraate, Omukama Nebukadeneeza eriyasingwire, binu nibyo yaligambireho:

³Muteekanize obugabu n'engabu mugende murwane obulemu.

⁴Inywe abatembi b'embaraasi, mutandiike embaraasi zaanyu muzitembe! Mwemerre, mujwaire enkofiira zaanyu; muteekere amacumu ganyu, mujwale ekooti zaanyu ez'ebyoma!

⁵MUKAMA naagamba ati: Kiki ekindukurora? Obutiini bw'okubaita. Abaserikale baabu abarwani bababingire, bairukire obutarora nyuma hoona hoona abantu bamazirwe obutiini

⁶Abo ab'enziriga, tibasobora kwiruka n'obwakubaire abaserikale abarwani, tibasobora kutabuka, beesitaire batabaijuka, baagwa hamukono ogw'emoso, haihi n'ekisaaru Efuraate.

⁷“N'oha ogu arukwimuka nk'ekisaaru Nairo, arukusisana ebisaaru ebinyakwina amaizi aganyakubimba nigeekenya?

⁸Ensi Misiri niyo erukwimuka nk'ekisaaru Nairo, niyo erukwimuka nkebisaaru ebiina amaizi aganyakubimba nigeekenya. Neegamba eti: Ndiimuka mbuutikire ensi yoona, mbuuleeze embuga n'abantu abanyakuzirumu.

⁹Inywe embaraasi, mugende omumaiso, kandi inywe ebigaali mukwatwe ekiniga. Abaserikale abarwani mugende omumaiso inywe abasaija aba Esopiya na Puuti, abanyakukwata engabu, inywe aba Luudi abanyakumanyire kwekoonyeza obuta.

¹⁰Kinu nikyo ekiro kya MUKAMA Ruhanga ow'amahe, nikyo ekiro eky'okuhoora enzigu, eky'okwehorra wenka abazigu be. Empirima ye eribatematema okuhika obwogi obu bulyekuba, ekajuba ekaiturruka esagama. Habwokuba MUKAMA Ruhanga ow'amahe, alitamba ekyonzira omunsi eya ha bukiizi-obw'emoso, haihi n'ekisaaru Efuraate.

¹¹Iwe muhara wa Misiri empikirre genda Giryadi oserreyo omubazi. Okanywa emibazi n'akabazi, baitu otaraarwe.

¹²Amahanga gakahurra nkooku wahemukire, kandi ensi yoona neekulirirra muno; habwokuba omuserikale omu akarubata omuserikale ondi bombi bagwera hamu.”

¹³Omukama Nebbukadaneeza owa Bbabbulooni obu yaizire kuseesira Misiri, MUKAMA akangambira ati:

¹⁴“Omanyise aba Misiri, kandi orangirre aba Migidoro; oteho aba Menfisi n'aba Tahapanihesi; obagambire oti: ‘Mwemerre mweteekanize, byona ebi mwinabyo, nibija kuhwerekerezibwa omu bulemu.’

¹⁵Ruhanga wawe Apisi kirimaani airukiibwe ki? Kiki ekimutangire kwemerra? Ruhanga amutiire ekigwo.

¹⁶Abantu bawe abaingi bati, bakeesitara baatabaijuka baagwa, baatoma kugambirangana bati: ‘Mwimuke tugaruke hali abantu baitu n'omunsi ei twazairwemu nukwo tutabuke empirima y'omunyanzigwa.’

¹⁷Faraaho omukama wa Misiri mumurukirre ‘Omunyatoko anyakuleka omugisa gwe gukamurabaho.’

¹⁸Omukama anyakwetwa MUKAMA ow'amahe naagamba ati: Nyowe MUKAMA ow'obusobozi bwona, ninyowe omukama ninyowe Ruhanga omwomeezi. Orusozi Tabbora nkooku ruraihire okukira ensozi ezindi n'orusozi Karameeri nkooku rurukwimuka haiguru muno omu nyanja, n'amaani g'ogu ow'alibaseesira, nukwo galiba gati.

¹⁹Inywe Abanyamisiri mubohe ebintu byanyu muzaahe. Habwokuba Menfisi niija kufooka itongo, kikamburro, ekitasobora kurarwamu muntu.

²⁰Ensi Misiri, niyo enyana nyakusemera, enyakuseesiirwe ekijuju ekinyakurugire ha bukiizi obw'emoso.

²¹“Noobwakubaire Abaserikale baayo abanyinabo, abaaguliriirwe noobubaraaba nibasisana enyana ezigomokere, bakubuutukire baasingirwa hamu habwokuba, ekiro eky'omuhito gwabo, akasumi ak'okufubirwa kwabo bibahikireho.

²²Misiri egi, neehuma nk'enjoka erukuhurumuka habwokuba abanyanzigwa baayo nibaija n'ihe, nibaija kugirwanisa bakwasire endemu nk'abantu abarukutema emiti.

²³MUKAMA naagamba ati: Ekibira kyayo noobukiraaba kitarukusobora kutaahwa nibaija kukitema, habwokuba baingi muno nibakira n'enzige; tibasoboka kubabara.

²⁴Abanyamisiri nibaija kuswazibwa, Misiri niija kulekerwa abantu abarukuruga ha bukiizi obw'emoso.”

²⁵MUKAMA ow'amahe Ruhanga owa Isirairi akagamba ati: Ninyija kufubira Amoni owa Tebesi, Faraaho, Misiri, embandwa zaayo n'abakama baayo, ninyija kufubira Faraaho n'abo abanyakumwesiga.

²⁶Ndibalekera abo abarukwenda kubaita, mbalekere Nebbukadaneeza omukama wa Bbabbulooni n'abanyoro be. MUKAMA naagamba ati: Obu halihinguraho akasumi, Misiri erigarukwamu abantu nka ira.

²⁷Baitu iwe Yakobbo omwiru wange, otatiina, na iwe Isirairi, otacwekwa enkizi; ninyija kukujuna nkwihe hara, n'abaana bawe mbaihe omunsi ei banyagiirwemu. Yakobbo aligaruka aikye, agwagwane, tihalibaho muntu n'omu alimutiinisa.

²⁸MUKAMA naagamba ati: Mwiru wange Yakobbo otatiina, habwokuba ndi hamu na iwe, amahanga goona aga nakurarangizeemu, ndigabuuleeza, baitu iwe tindikubuuleeza. Ndikufubira omu mulingo ogusemeriire ntarukuhinguraniza, baitu tindikuleka ntakufubire.