Read Runyoro - rutooro Yer 48 Bible Online

Yer 48 - Runyoro - rutooro bible

Yer 48

¹MUKAMA ow'amahe, Ruhanga owa Isirairi binu nibyo arukugambaho Mowabbu: “Neebo erikibona, habwokuba efoirwe itongo! Kiryasaimu ehemwirwe, ekwasirwe; ekigo kihemwirwe kandi kiseesirwe;

²Mowabbu tekyaranganwa. Aba Hesibboni, nibacika kugihwerekereza, nibagamba bati, ‘Murahuke! Tugihwerekereze, eruge omu mahanga!’ Bararu-inywe, nainywe muliculeezibwa, nimwija kuhonderwa empirima.

³“Hurra enduuru erukugambira Horonaimu ngu, ‘Kuliisa amaani n'okuhwerekerra okw'akabi!’

⁴Mowabbu ehwerekereziibwe enduuru neehulirwa n'aba Zowara.

⁵Habwokuba ha matemba ga Luhiisi, abantu nibatemba nibarra; habwokuba ha masirimuka ga Horanaimu, abantu bahuliire enduuru ey'okuhwerekerra.

⁶Mwiruke! Mwejune! Musisane nk'entulege ey'omwirungu!

⁷Ego nkooku wayesigire ebigo n'itungo lyawe, na iwe noija kukwatwa; kandi Kemosi naija kuzaahisibwa hamu na banyakatagara n'abanyoro be.

⁸MUKAMA nkooku yagambire ati: “Omuhwerekereza, aliseesira buli rubuga, kandi tihalihabo rubuga orulitabuka; ekihanga kirihwerekerra, ekyeya kiricwekerezibwa.

⁹“Muhe Mowabbu amapapa, habwokuba w'okuhurruka agende; embuga ze niziija kufooka itongo, ziburwe omuntu ow'okuziikaramu.

¹⁰N'akakyenwe omuntu ogu, atakora omulimo gwa MUKAMA n'omutima gwe gwona; kandi ogu anyakutanga empirima ye kuseesa esagama.

¹¹MUKAMA akagamba ati: “Okuruga ira naira, Mowabbu ataaha eteekaine, kandi tekazaahisibwahoga. Esisana eviini eyalekerwe eteeke etakwasirweho, kandi etaiturwirweho, kugiiha omu nsoha emu, kugita omu nsoha endi. Obunuzi bwayo tibugihwamu ebiro byona, kandi ikara neeboya obwire bwona.”

¹²Habweki MUKAMA naagamba ati: “Lero nu, akasumi kalihika, ntume abaituruzi bamwiturre nkooku baiturra eviini. Eviini enyakuli omunsoha zaayo bagiseese, ensoha bazibberengule.

¹³Mowabbu erikwatirwa embandwa Kemosi ensoni, nkenju ya Isirairi okuyakwatiirwe ensoni embandwa Beseri ei bayesigaga.

¹⁴Musobora muta kugamba muti, ‘Tuli manzi kandi tuli basaija b'amaani abarwani’?

¹⁵Omukama anyakwetwa MUKAMA ow'amahe naagamba ati, Omuhwerekereza wa Mowabbu n'embuga zaayo aizire, abasigazi baayo entongorwa, bagenzire omu ibaagiro kwitwa.

¹⁶Akabi ka Mowabbu kali haihi, n'omuhito gwayo nigugiirukirra.

¹⁷Inywena abaherraine n'ensi egi, inywena abanyakumanyire nkooku yarangaanwaga; mugiririrre nimugamba muti, ‘Obulemu bwayo obw'obusobozi buhoireho, ekitiinisa n'amaani gaayo tibikyaroho.’

¹⁸“Iwe omusi wa Dibboni, ruga omu kitiinisa kyawe, ija oikarre ha itaka erituumire kandi eryomere. Habwokuba omuhwerekereza wa Mowabbu akuseesiire; ebigo byawe abiseesire.

¹⁹Iwe omusi w'Aroweri, yemerra haihi ohange amaiso, kaguza omusaija ogu arukwiruka, okaguze n'omukazi ogu arukucwa; okaguze oti, ‘Hagwireho ki?’

²⁰Mowabbu, ehemwirwe habwokuba ecwirwe, muteere empamo muborooge! Mukisubiriirre haihi n'ekisaaru Aranooni, muti, Mowabbu efoirwe itongo.

²¹“Ensi ey'ekyeya, Horoni, Yahaza, Mufaasi,

²²Dibboni, Neebo, Besidibbulasaimu,

²³Kiryasaimu, Besigamuli, Besimeyoni,

²⁴Keryosi, Bozira, n'embuga ez'ensi Mowabbu eza hara n'eza haihi, zoona zicwerirwe omusango.

²⁵MUKAMA naagamba ati: ‘Amaani ga Mowabbu gahoireho; obusobozi bwayo tibukyaroho.’

²⁶“Mugitamiize, habwokuba ekeehemberaho MUKAMA; habweki, niija kwejulinga omu bitanake byayo, nayo esekerezibwe.

²⁷Iwe, Isirairi otamusekereze? Akakwatwa naiba hamu n'abasuma, buli kumubazaaho, nikyo ohungiza omutwe?

²⁸Inywe abasi ba Mowabbu, Muruge omu mbuga mwikale omu myandara! Musisane nk'eriiba erinyakwombeka ekiju kyalyo omu mbaju z'omunwa gw'oruhana.

²⁹Tukahurraho emyekuliirizo ya Mowabbu, eyekuliiriza muno, tukahurraho emyebbanaazo yayo, emyekuliirizo yayo, n'okwemanya kwayo, n'okwenywagiza kw'omutima gwayo.

³⁰MUKAMA naagamba ati: Mmanyire emigayo yayo. Emyehembo yayo y'okubiiha ebisuba, ebikorwa bye nabyo, nukwo biti.

³¹Nikyo ndukuterra Mowabbu empamo; nikyo ndukuterra Mowabbu yoona omukungo; habwokuba nindirirra abasaija ba Kyaheresi.

³²Okukira muno, nindirirra iwe omuzabbibbu gwa Libuna okukira nkooku ndukulirirra Yazere. Amataagi gawe gakambuka enyanja, gaahika Yazere; ha bijuma naha mizabbibbu yawe ebinyakunogerwe omu mwaka ogw'ekyanda, omuhwerekereza nuho agwire.

³³Ensi ey'orwezo Mowabbu, ekahoibwamu okusemererwa n'omuhimbo. Omu ndeeba nfuhizeemu eviini, abajungi b'emizabbibbu tibakyajunga, tihakyahulirwa toko ey'okukyanganuka.

³⁴“Hesibboni N'Eleyale itairemu omukungo; iraka lyabo nirihulirwa n'aba Yehazi, nirihulirwa aba Zowara, Horanaimu n'Egilasi-serisiya. Habwokuba amaizi g'akasaaru Nimulimu, goomiire kimu.

³⁵MUKAMA naagamba ati: Omuntu weena ow'omunsi Mowabbu, arukuhonga ekyonzira omu kirorro, akacumikirra embandwa ye obubbani, ndimuhwerekereza.

³⁶Omuntu nkooku ateera ha ndere ekizina eky'okuziika, n'omutima gwange nukwo gurukulirirra Mowabbu, n'abantu ba Kiri-heresi, habwokuba byona ebi baatungire bibahoireho.

³⁷“Boona beemwire isoke, kandi beekonere emireju beesarasazire emikono, kandi buli omu ajwaire eguniya.

³⁸Hamaju eruguru goona aga Mowabbu n'omu makuute gaayo, nihahulirwa empamo zonka; habwokuba MUKAMA naagamba ati, Mowabbu ngyasire nk'arukuhenda nk'ekibindi omuntu eki atarukugonza.

³⁹Mawe, Mowabbu keecwekere kubi! Mawe, hurra abantu nkooku barukuteera ekyoboobo! Mawe, Mowabbu ehindukire yarora enyuma esoni z'okugiita! Mowabbu, nukwo efookere eti kintu ky'okusekerezibwa; kandi ekirukutiinisa hali boona abagiherraine.”

⁴⁰Habwokuba MUKAMA naagamba ati: “Haroho omuntu ow'alihurruka bwango nk'isamba, ayanjurre amapapa ge, arwanise Mowabbu.

⁴¹Embuga zirihambwa, ebigo birinyagwa, Ha kiro eki, emitima y'abaserikale ba Mowabbu, erisisana omutima gw'omukazi ow'arukurumwa ebisa eby'okuzaara.

⁴²Mowabbu erihwerekerezibwa, kandi terigaruka kwetwa ihanga, habwokuba ekenyumiirizaaho MUKAMA.

⁴³MUKAMA naagamba ati, Iwe musi wa Mowabbu, Okukangwa, obuhya, n'omutego, nibyo bikutegeriize.

⁴⁴Ow'aliruka ekirukutiinisa, alitoora obuhya, kandi ow'aliruga omu buhya, alikwatwa omutego. MUKAMA naagamba ati, omu mwaka ogw'okufubirwa kw'abantu ba Mowabbu, nubwo ndibaleetera ebintu ebi.

⁴⁵Abarukwiruka, beemeriire omu kiituuru kya Hesibboni, bataina maani; habwokuba, Hesibboni harugireyo omurro, omunju ya Sihooni, haimukireyo endimi z'omurro, gusiiriize obuso bwa Mowabbu, nurwo oruhorohozi orw'abaana b'obwojo abali omu kambayaaya.

⁴⁶Iwe Mowabbu, olikibona! Abantu ba Kemosi bahwerekereziibwe, kandi batabani bawe na bahara bawe bakwasirwe, baatwarwa bali banyankomo.

⁴⁷MUKAMA naagamba ati: Baitu omubiro ebya hanyuma Mowabbu ndigigarurra obusinge.” Omusango gwa Mowabbu, nuho gwagarukiire.