Read Runyoro - rutooro Yer 49 Bible Online

Yer 49 - Runyoro - rutooro bible

Yer 49

¹Kinu, MUKAMA nikyo arukugambaho Abamooni ati: “Isirairi taina baana aboojo? Taina mugwetwa? Habwaki Mirikomu abingire Gaadi, abantu be bakaikara omumbuga zaayo?

²MUKAMA naagamba ati: Akasumi akandimukizaamu enduuru ey'obulemu obw'okurwanisa Rabba orw'Abamooni kalihika; eriba kasozi kandi embuga zaayo zirisiirizibwa omurro; MUKAMA naagamba ati, Isirairi, abo abaamubingire, nubwo alibabinga.

³Iwe Hesibboni, teera empamo habwokuba Ai efookere itongo! Inywe abantu aba Rabba mutaabaane, mweteege eguniya, muteere omukungo, mutaigire omu ngo, nimutoma hanu na hali! Habwokuba Mirikomu omucwezi wanyu, hamu na banyakatagara n'abanyoro be naija kuzaahisibwa.

⁴Iwe mwisiki kateesigwa habwaki oyenyumiriza omu bihanga byawe iwe ayayesigaga itungo lyawe noogamba oti, ‘N'oha alinseesira?’

⁵MUKAMA Ruhanga ow'amahe naagamba ati: boona abakuherraine ndibaleetereza kukukanga abalikukanga ha mbaju zoona. Muliiruka, buli muntu atome ogwe, kandi tihalibaho muntu ow'alisorooza ensuuhuuki.

⁶MUKAMA naagamba ati, Baitu hanyuma Abamooni ndibagarurra obusinge.”

⁷ MUKAMA Ruhanga ow'amahe, naakaguza hali Edomu ati, “Temani tekyarumu bwetegereza? Abeegendereza, amagezi gakabahwamu? Amagezi gaabo gakahwa?

⁸Inywe abasi ba Dedani, mwiruke mugende mwesereke! Habwokuba, akasumi ak'okumufubira obu kalihika, ndimuleetera omuhito nk'ogu naleetiire Esahu.

⁹Abanogi b'emizabbibbu kakuba bakuhikaho, tibaakusigire endagalikwa? Abasuma kakuba bakutahirra ekiro, tibaakunyagire ebintu byona ebi barukwenda?

¹⁰Esahu mmujwire namusiga busa ebiikaro bye ayeserekamu, mbisukwire, tasobora kubyeserekamu. Abaana be, abanyina n'abataahi, bahwerekeriire; nawe wenka takyaroho.

¹¹Abaana bawe enfuuzi, baleke, nyowe ndaabarolerra; abafaakati bawe, na bo banyesige.”

¹²“Habwokuba MUKAMA naagamba ati: Abo abakaba batasemeriire kufubirwa obubaraaba bafubiirwe, kandi iwe oleme ota kufubirwa? Toogurukwe kifubiro, oli w'okufubirwa.

¹³Habwokuba MUKAMA naagamba ati, nyerahiire nyenka, Bozira eriba kintu eky'okutiiniraho, eky'okugaywa, itongo kandi eky'omukyeno; embuga zaayo zoona galiba matongo ag'ebiro n'ebiro.”

¹⁴MUKAMA antwekiire obukwenda, kandi n'omukwenda atumirwe omu mahanga goona naarangirra ati: “Mweteerane mwije mugiseesire mwimuke murwane!”

¹⁵Habwokuba omumahanga ndikubundaaza, oganywe abantu.

¹⁶MUKAMA naagamba ati: “Iwe anyakuraara omu biina by'emyandara, anyakukwatira ha butwetwe bw'ensozi oburaihire muno kukira obundi bwona, okwekuliiriza okw'omutima gwawe kukakuhabya. Enju yawe noobu oraaba wagyombekere haiguru nk'isamba, ndikuhurumurayo nkukenye hansi.

¹⁷“Edomu eriba kintu ky'okutiinwa; wena ow'araagirabahoga, araayekangaga, kandi habw'okurora obubi bwona obwagigweriire, araasulizaaga.

¹⁸MUKAMA naagamba ati: Ekyabaireho Sodomu na Gomora, n'embuga eziherraineho, obu zahwerekeriire, eki kyonyini nikyo kiribaho Edomu. Tihaligaruka kwikarayo muntu.

¹⁹Lero nu, entale nkooku eruga omwirungu lya Yorudaani eroleriire isibiko ly'entaama erigumire, nanyowe nukwo ndibabinga bwango nti bagirugemu; kandi wena ou ndikagonza, nuwe ndikoma agireme. N'oha arukunyingana? N'oha ow'alindagira? Mulemi ki ow'alisobora kuunyema omu burangara?

²⁰Habweki muhurre entegeka MUKAMA ei ategekiire Edomu n'encwamu ye habasi ba Tamani: noobu hakubaire ebyana by'igana birikururwa bitwarwe; kandi buli muntu alitiina muno.

²¹Obu biriba nibigwa, ensi eritengeeta; okurra kwabo kulihulirwa ha nyanja Erukutukura.

²²Omuntu alitemba ahurruke bwango nk'isamba ayanjurre emikono ye agyolekiize Bozira, kandi ha kiro eki, emitima y'abaserikale b'Edomu, erisisana nk'omutima gw'omukazi arukurumwa ebisa eby'okuzaara.”

²³Kinu MUKAMA nikyo arukugambaho Damasiko, “Hamasi n'Arapaadi zisobiirwe, habwokuba zihuliire amakuru amabi; abantu obutiini buraaliire kubaita, batabangukire nk'enyanja etasobora kuteeka.

²⁴Damasiko amaani gagihoire, ekubuutukire kwiruka, ekwasirwe akatukumo. Obusaalizi n'emihito n'obujune bigiri kubi, nk'omukazi arukurumwa ebisa eby'okuzaara.

²⁵Mawe, orubuga nyamuranganwa kandi orw'omuhimbo murole abantu nkooku barwirukiremu!

²⁶MUKAMA ow'amahe naagamba ati: Habweki hakiro eki, abasigazi barwo baligwa omu makuute garwo, kandi abaserikale barwo boona nubwo balihwerekerra.

²⁷Ebisiika bya Damasiko, ndibicumika omurro, gusiiriize ebikaali bya Bbenihadadi.”

²⁸Kedara n'obukama bwa Hazora, Nebbukadaneeza omukama wa Bbabbulooni obuyasingwire, MUKAMA naabubazaaho ati: “Mugende museesire Kedara! Muhwerekereze abantu aba Burugaizooba.

²⁹Munyage eheema n'amagana gaabo ag'embuzi, engoye ez'okukingisa eheema zaabu, n'ebintu byona ebinyakurumu. Mutwale engamiya zaabu, kandi mugambire abantu muti: ‘Nimukangwa ha mbaju zoona!’

³⁰MUKAMA naagamba ati: Inywe abasi ba Hazora, musingwe, mugende hara muno mwesereke. Habwokuba Nebbukadaneeza omukama wa Bbabbulooni, aina ekyategekere, kandi aina ekyacwiremu kubakora.

³¹MUKAMA naagamba ati: Mwimuke mugende museesire ihanga erinyakuculiire erinyakwina obusinge, eritaina malembo n'ebihongozo, erinyakwikara lyonka.

³²Engamiya zaabu ebe minyago, amahyo gaabo ag'ente, ebe myandu. MUKAMA naagamba ati, abo boona abanyakwekona ha mbaju isoke ryabu, ndibararangiza omu mbaju zoona ez'ensi, kandi hoona hoona nambere baliba bali, nuho ndibaboneseza emihito.

³³Hazora erifooka bwikaro bw'eboha, eriba itongo ery'ebiro n'ebiro; tihaligaruka kwikarayo muntu, terigaruka kugonywamu muntu.”

³⁴Omubusumi bw'okulema kwa Zedekiya omukama wa Yuda obubukaba nibutandika, kinu nikyo kigambo ekirukukwataho Eramu ekyagambiirwe Yeremiya omurangi.

³⁵MUKAMA ow'amahe akagamba ati: “Abarasi b'emyambi boona abaafoire Eramu y'amaani eti, ndibaita;

³⁶emiyaga ena ey'ensonda ina ez'iguru, ndigiimukya, eteere neetwara Eramu; kandi abantu baayo boona, ndibararangiza omu nsonda ina ezi zoona, tihalibaho ihanga nalimu abo abaabingirwe Eramu eri batalihikamu.

³⁷MUKAMA naagamba ati, Eramu ndigireetera kutiina abanyanzigwa baayo, ngitiinise n'abo abarukwenda kwita abantu baayo; ndibaleetera akabi, ndibeemarraho ekiniga kyange ekibi, ndibakurasa empirima, okuhika obu ndikabamaraho.

³⁸Ekitebe kyange eky'obukama, ndikita Eramu, mpwerekereze omukama n'abanyoro baabu.

³⁹“MUKAMA naagamba ati: Baitu omu biro eby'omumaiso, Eramu ndigigarurra obusinge.”