Read Runyoro - rutooro Yer 5 Bible Online

Yer 5 - Runyoro - rutooro bible

Yer 5

¹Mwirukairuke omu makuute ga Yerusaalemu, mumagemage mwetegereze! Muserre omu butale bwarwo, Obu muraazoora omuntu, ow'arukukora eby'obwinganiza kandi arukuserra amazima; nukwo nsobole kuruganyira.

²Abantu noobu baraaba barahira bati, “Ndahiire MUKAMA omwomezi,” barahira eby'ebisuba.

³Ai MUKAMA, iwe toserra amananu? Okabateera, baitu batasaalirwe; okabasaasangura; baitu bakanga kugorrorwa Bakagumanganira kimu kukira omwandara; baayanga kwegarukamu.

⁴Nukwo kuteekereza nti: “Abantu banu banaku kandi badomadoma; habwokuba tibamanyire MUKAMA ebyarukugonza bakole tibamanyire Biragiro bya Ruhanga wabo.

⁵Kangendere abantu ab'ekitiinisa, nubo mbaze nabo; habwokuba bbo, bamanyirekwo Ruhanga wabo ebyarukwetaaga nibeetegereza ebiragiro bya Ruhanga wabo, boona bakeesumurramu enjegere.”

⁶Entale nikyo erirugira omu kibira ije ebaite omwaga nikyo gulirugira omwirungu gwije gubajunjubule. Engo eraikaraga eroleriire embuga zaabu, weena hali bbo ow'alituruka aheeru, erimutaagataagura, habwokuba ebibi byabo bingi, kandi baikara nibehugura Ruhanga.

⁷Mbaganyire nta? Abaana banyu bakandugaho, baarahira abo ebitali Ruhanga. Obu nabainwire baiguta, nubwo batemberiire bakaabasaija, baayerunda omu maju ga baamalaaya.

⁸Nk'enimi embaraasi ez'amaani, eziriisiibwe kurungi, okuzituubira ebuguma nabo buli omu nukwo yatuubiire muk'omutaahi.

⁹MUKAMA naagamba ati: “Abantu ndeke kubafubira habw'ebintu binu, ihanga nk'eri, ndeke kulihoora enzigu?”

¹⁰“Mugende murabe omu nkarra z'emizabbibbu yarwo mugitemateme baitu mutagimarraho kimu; muginogorreho amataagi, habwokuba tigali ga MUKAMA.

¹¹MUKAMA naagamba ati, habwokuba enju ya Isirairi n'eya Yuda, hali nyowe gatabe mesigwa naakake.

¹²MUKAMA bakamubazaaho ebisuba baagamba bati: ‘Taina eki alikora nakati kandi busaho kabi akalitwizira, titulicwekerwa bulemu rundi kugwerwa kiihe.

¹³Bakagamba bati: Abarangi nibagambisibwa kwonka, kandi ngu batatumwe MUKAMA.’ ”

¹⁴Habweki MUKAMA Ruhanga ow'amahe naagamba ati: “Abantu abo habw'okugamba ekigambo eki, ebigambo byange ebi nakutaire omu kanwa, ninyija kubifoora murro, kandi abantu mbafoole nku, omurro ogu gubasiiriize.

¹⁵MUKAMA naagamba ati ‘Iwe enju ya Isirairi, ninyija kukuleetera ihanga erya hara, Ihanga ery'amaani kandi erya ira, ihanga eri otamanyire ngambo yalyo, ery'otarukukenga ebi barukugamba.

¹⁶Nk'ekituuro oku kiikara kyesamiriire kiteegeriize kuziikwamu omuntu n'ebyokurwanisa byabo nukwo bitaiguta kwita boona basaija b'amaani.

¹⁷Balihwerekereza ebyokulya byawe eby'omu misiri n'eby'omuka balihwerekereza batabani bawe na bahara bawe; balihwerekereza amagana gawe ag'embuzi n'ag'ente; balihwerekereza emizabbibbu n'emitini yawe; embuga zawe ezigumire ez'oyesiga, baliiseesa n'ekitara.’”

¹⁸“MUKAMA naagamba ati, baitu omubiro ebi, nabwo tindibahwerekerereza kimu.

¹⁹Abantu banyu obu balyekaguza bati, ‘Kiki MUKAMA Ruhanga waitu ekyatukoliire ebintu binu?’ Mubagarukemu muti, ‘Nkooku mwandugireho mwaheereza embandwa zabanyamahanga omunsi yanyu, nukwo muliheereza abanyamahanga omunsi etali yanyu.’”

²⁰Kinu mukimanyise enju ya Yakobbo, mukirangirre omunsi ya Yuda muti:

²¹“Inywe abantu abadoma kandi abatarukwetegereza abanyakwina amaiso baitu mutarukurora, abanyakwina amatu baitu mutarukuhurra.

²²MUKAMA naagamba ati, ‘Timuntiina?’ Timutukumira omumaiso gange? Ninyowe nataireho omusenyi, gubege mutaano gw'enyanja, mutaano ogwa buli na buli ogu etasobora kuguruka ebigonzi noobu biimuka bita, aho tibicwaho, noobu bihirra bita, aho tibigurukaho.

²³Baitu abantu banu baina omutima omukadadazi kandi omwereme; bakeehugura baagenda.

²⁴Tibateekereza omu mitima yabu bati, ‘Kituhikiriire kutiina MUKAMA Ruhanga waitu, anyakunaga enjura omu kasumi kaayo, enjura ey'irumbi n'ey'obutoigo, kandi anyakutumanyisa ebiro by'igesa ebyatairweho.’

²⁵Obubi bwanyu nubwo bwaihireho ebi, kandi ebibi byanyu nibyo byabaihireho ebirungi.

²⁶Habwokuba omu bantu bange harumu abantu ababi; baikara babundaire nk'abahiigi b'ebinyonyi. Batega emitego bakwasa abantu.

²⁷Ekigega nkooku kiijura enyonyi, n'amaju gaabo nukwo gaijwire obucwangya; nukwo kuba b'ekitiinisa kandi baguuda,

²⁸bagomokere kandi nibamerameeta. Bakora ebibi bataina nambere barukugarukira; emisango y'enfuuzi tibagicwa omu bwinganiza, enfuuzi ezi nukwo zitunge obusinge, kandi tibarwaniirra abaseege, bakatunga ebibasemeriire.

²⁹MUKAMA naagamba ati, abantu timbafubire habw'ebintu ebi? Ihanga nk'eri, tindihoole enzigu?

³⁰Omunsi hagwiremu ekintu ekirukuhunaaza kandi ekirukutiinisa.

³¹Abarangi nibaranga ebisuba, kandi banyakatagara nibalema abarangi nkooku barukubaragira; inywe abantu bange, eki nikyo murukugonza, baitu empero obu erihika, mulikora ki?