Read Runyoro - rutooro Yer 50 Bible Online

Yer 50 - Runyoro - rutooro bible

Yer 50

¹Kinu nikyo ekigambo MUKAMA eki yagambiire Yeremiya omurangi, ekirukukwata ha Bbabbulooni na hansi y'Abakalidaaya:

²Mumanyise amahanga kandi murangirre musimbe ebendera kandi murangirre, mutakisereka mugambe muti: “Bbabbulooni ehambirwe Beeri eswaziibwe, ekisisani ky'embandwa yayo Merodaaki kicwacwainwe! Embandwa za Bbabbulooni ziswaziibwe; ebisisani byayo nyakubiiha bibberengwirwe.”

³“Habwokuba, ha bukiizi obw'emoso, harugireyo ihanga kugiseesira, ihanga eri, ensi yayo niriija kugifoora itongo kandi terigaruka kwikarwamu muntu; abantu n'ebisoro, byona birisiingwa.

⁴“MUKAMA naagamba ati: Omubiro ebi n'omu kasumi ako, abantu ba Isirairi n'abantu ba Yuda baliizira hamu nibarra; kandi baliserra MUKAMA Ruhanga wabo.

⁵Balikaguza omuhanda ogurukutwara Siyoni kandi kunu nuho baroleriire, nibagamba bati ‘Tukole endagaano ey'ebiro n'ebiro erukutubohera kimu hali MUKAMA, etali y'okwebwa ebiro byona.’

⁶“Abantu bange nibasisana nk'entaama, abaliisa bazo ezibahabirize zaburra hansozi, bayenjeeraga nibaruga ha rusozi orumu nibagenda harundi beeberwe eka yabo nambere eri.

⁷Boona abaabazoire, bakabahwerekereza, kandi abanyanzigwa baabu bakagamba bati, ‘Titwina musango, habwokuba bakasiisira MUKAMA, obwikaro bwabo obw'amananu MUKAMA, obunihizi bwa baisenkurubo.’

⁸“Mwiruke muruge Bbabbulooni, muruge omunsi y'Abakalidaaya, nainywe mukole nk'embuzi empaya okuzikora.

⁹MUKAMA naagamba ati, Hati nu, Bbabbulooni ninyija kugiimukiza ekitebe ky'amahanga amakooto, ngaihe omunsi eya ha bukiizi obw'emoso; balisimba enkarra bagirwanise, aho nuho erihambirwa. Emyambi yabu, neesisana omuserikale kalimagezi, atagaruka ngaronsa.

¹⁰MUKAMA naagamba ati, Kalidaaya erinyagwa; kandi abo abaliginyaga, balinyaakura ebintu banihe.

¹¹Haa! Inywe abanyagi b'obugwetwa bwange, noobu murakakyanganuka, noobu murakeebuga, noobu murakatagaija nk'enyana enyakutairwe ha bunyansi, kandi mukahebebera nk'enimi y'embaraasi,

¹²nyinainywe naija kuhemuka muno, ogu kikuzaara, naija kuswazibwa. Omu mahanga goona nuwe aliba ihanga erihererukayo, liriba irungu eryomere, kandi ibuga.

¹³Habw'ekiniga kya Ruhanga, teriikarwamu muntu, baitu eribeera kimu ihamba lyonyini; omuhinguzi wena araarabahoga Bbabbulooni, orayekangaga, kandi araahunirraga muno ahungye n'omutwe habw'emihito yayo erukusisa eti, ayasiimuzaaga.

¹⁴Inywe inywena abanyakurwanisa obuta, musimbe enkarra murwanise Bbabbulooni, mugigote, habwokuba ekasobeza MUKAMA.

¹⁵Muteere akoogo kagyehingulirize embaju zoona emazire kwehonga; ebisiika byayo bigwire, binu biseesekere. Habwokuba, MUKAMA obu naahoora enzigu: mugihoole enzigu, mugikole nkooku yakozire.

¹⁶Omusigi, n'omuntu wena anyakwekonyeza naijoro omu kasumi k'igesa, mubafuhye Bbabbulooni, habw'empirima y'ogu arukukora kubi abantu, buli muntu weena aligaruka omu bantu be, kandi buli omu aliiruka agaruke omunsi y'owabo.

¹⁷“Isirairi nesisana nk'entaama erukuhiigwa, eyabingirwe entale. Okubanza, omukama w'Asiriya, nuwe yamujunjubwire, kandi hati, omukama wa Bbabbulooni nuwe abwakwize amagufa ge.

¹⁸MUKAMA ow'amahe Ruhanga owa Isirairi, nikyo arukugambira ati: Nkookunakozire omukama w'Asiriya, nukwo ndukwija kufubira omukama wa Bbabbulooni n'ensi ye.

¹⁹Abantu ba Isirairi ndibagarra omunsi yabu. Balye ebyokulya ebinyakwera ha rusozi Karameeru n'omunsi eya Basani, banihe byona ebi barukwegomba ha byokulya ebinyakwera omunsi y'Efraimu, n'omunsi Giryadi.

²⁰MUKAMA naagamba ati, Omubiro ebi kandi omukasumi ako, obubi buliserurwa omu Isirairi, tibulisangwamu nakati; kandi omunsi ya Yuda, tihalizoorwamu kibi; habwokuba endagalikwa ezi ndiba nsigireho, ndibaganyira.

²¹MUKAMA naagamba ati, “Genda oseesire ensi Merasaimu, oseesire abasi ba Pekodi obahondere; ohungye empirima obateme obahwerekerereze kimu okole kyona ekindukukuragira.

²²Enduuru y'obulemu ejugire omunsi yoona, kandi okuhwerekerra okutagambwa nukwo kuroho.

²³Bbabbulooni niyo enyondo eyasasangwire ensi yoona, enyondo egi, hati nayo esasangwirwe! Ekyagweriire ensi egi, nikihuniriza amahanga goona.

²⁴Iwe Bbabbulooni, nkakutega omutego gwakukwata, eki otakimanye; okaserurwa wakwatwa, habwokuba okarwanisa MUKAMA.

²⁵MUKAMA akakingura eryahurro lye eryahurwamu ebyokurwanisa yabiihamu akwasirwe ekiniga, habwokuba, MUKAMA Ruhanga ow'amahe, omunsi ey'Abakalidaaya aina omulimo ogu arukwija kukoramu.

²⁶Muruge buli hantu mwije mugiseesire, musuukule amaguli gaayo; eminyago mugituume nk'emituumo y'engano! Ensi yoona mugihwerekereze! Mutagisigiraho akantu na kamu.

²⁷Abarwani baayo boona mubaite! Mubasale. Balikibona, habwokuba ekiro kihikire, kanu nuko akasumi ak'okufubirwa kwabo.

²⁸“Muhurre! Abasingwa n'abasuuhuuki, nibaruga omunsi Bbabbulooni, basubirre omu rubuga Siyoni, MUKAMA Ruhanga waitu nkooku ahoire enzigu habw'enju ye.

²⁹“Mwete abarasi b'emyambi, boona abasobora kugema obuta baseesire Bbabbulooni. Mugiteereho orukande mugigote; hatalibaho omuntu airuka. Mugisasule nimuginganainganiza ha biyakozire, mugikole byona nk'ebi yakozire abandi; habwokuba ekeehemberaho MUKAMA, Ogu Arukwera owa Isirairi.

³⁰MUKAMA nikyo arukugambira ati, Ha kiro eki, abasigazi baayo baligwa omumakuute gaayo, kandi abaserikale baayo boona balihwerekerezibwa.

³¹MUKAMA Ruhanga ow'amahe naagamba ati, “Iwe omunyamyehembo hati ekiro kihikire, kanu nuko akasumi aka ndaakufubirramu.

³²Nyamyehembo ogu alitabaijuka agwe, tihalihabo muntu ow'okumwimukya, embuga ze ndiicumika omurro, gusiiriize byona ebimwehinguliriize.

³³“MUKAMA Ruhanga ow'amahe naagamba ati: Abantu ba Isirairi n'aba Yuda, nibabonabonesibwa; boona abaabanyagire, bakabalemera, bakanga kubalekera.

³⁴Omucunguzi wabo w'amaani; ibara lye nuwe MUKAMA ow'amahe, nuwe alibatonganirra nukwo ahe ensi ekihuumuro, baitu abonese abasi ba Bbabbulooni.

³⁵MUKAMA naagamba ati: Abakalidaaya nibakahikweho empirima, neekahikeho Bbabbulooni, kandi neekahikeho abanyoro n'abasaija bayo abanyamagezi!

³⁶Empirima neekahikeho abaraguzi, bakaba basema! Empirima neekahikeho abaserikale baayo, bakahwerekerezibwa.

³⁷Empirima neekahikeho embaraasi n'ebigaali byayo, kandi neekahikeho amahe g'abanyamahanga abanyakugirumu, bakafooka bakazi! Empirima neekahikeho itungo lyayo lyona likanyagwa!

³⁸Ekyanda nikikateere ha maizi gaayo goona, gakoomera kimu! Habwokuba eba nsi y'ebisisani by'embandwa ebisarwirwe, kandi abantu bikabalyamu omutima.

³⁹“Habweki, Bbabbulooni eraikarwamuga enyamaiswa n'empisi, kandi maaya tizaagibulemuga; terigaruka kwikarwamu abantu ebiro byona teriikarwamu abantu ab'ebiro byona.

⁴⁰MUKAMA naagamba ati: nka buli, nkooku nahwerekeriize Sodomu na Gomora, n'embuga eziziherraine, kiri kyonyini ekyazigweriire, nikyo kirigwera Bbabbulooni; tihaligaruka kwikarayo muntu, kandi tihalibaho mwana w'omuntu ow'alisuuhuukiramu.

⁴¹Abantu mbabo nibaruga ha bukiizi obw'emoso; ihanga ery'amaani n'abakama baingi nibaruga mu bicweka ebya hara muno eby'ensi.

⁴²Bakwasire obuta n'amacumu; bantu abataina mbabazi, kandi abataganyira. Iraka lyabo nirisisana nk'okuhirra kw'enyanja; batembere embaraasi, bajwaire nk'omusaija arukugya habulemu nibaija kurwanisa inywe abantu ba Bbabbulooni!

⁴³“Omukama wa Bbabbulooni ahuliire ebibarukubagambaho emikono ye yateba; obusaalizi bwayenda kumwita, yarumwa nk'omukazi arukurumwa kuzaara.

⁴⁴“Entale nkooku ejumbuka omwirungu lya Yorudaani kuseesira isibiko ly'entaama erigumire, abakama abo, nukwo ndibaihaho bwango Bbabbulooni; ngikomere wena ou ndikagonza, nuwe agireme. N'oha anyingana? N'oha ow'alinyeta? Mulemi ki alisobora kumpakaniza?

⁴⁵Habweki muhurre MUKAMA eki ategekiire Bbabbulooni, kandi eki acwiremu kukora ensi y'Abakalidaaya: Mananukwo, ebyana by'igana birikururwa bitwarwe hara; mananukwo isibiko lyazo liryekanga muno okurora ekyabiteekanirizibwe.

⁴⁶Bbabbulooni obu ruliba nirunyagwa, halibaho etoko etagambwa, ensi yoona etengeete, enduuru ehulirwe omu mahanga goona.”