Read Runyoro - rutooro Yer 51 Bible Online

Yer 51 - Runyoro - rutooro bible

Yer 51

¹MUKAMA naagamba ati: “Bbabbulooni n'abasi ba Kalidaaya, ndibaimukiza omuyaga kahwerekereza;

²ha kiro eky'omuhito, nditweka abasegesi Bbabbulooni, obu baliruga ha mbaju zoona bakagiseesira, balirusegesa, ensi baligisiga kwonka.

³Omurasi w'emyambi ataligema obuta bwe, kandi atalijwara ekijwaro kye eky'ekyoma. Mutaliganyira abasigazi baayo, ihe lyayo mulihwerekerereze kimu.

⁴Baitirwe omunsi y'Abakalidaaya, bahutaalizibwe omu nguudo zaayo.

⁵Habwokuba, Ruhanga MUKAMA w'amahe, Isirairi na Yuda atabooge; baitu ensi ey'Abakalidaaya ekasobeza muno Ogu Arukwera mali owa Isirairi.

⁶Mwiruke muruge hagati ya Bbabbulooni, buli muntu ayejune! Obu ruraaba nirufubirwa na inywe mutaikara kugenderanamu, habwokuba kanu nuko akasumi MUKAMA akaarukuhorramu enzigu, nubwo arukuruha empeera enyakurusemeriire.

⁷Bbabbulooni ekaba eri kikopo eky'ezaabbu, MUKAMA eki akaba akwasire, ekyatamizaaga ensi yoona, amahanga gakanywa ha viini yayo, nubwo gaagwa iraro.

⁸Bbabbulooni egwire ahonaaho etalengeriirwe; kandi ehwerekereziibwe mugiterre empamo! Mugitwarre omubazi ogw'okugijuna obusaalizi; rundi yaakukira.

⁹Bbabbulooni twakubaire tugitambiire; baitu ekalema kukira. Hati mugireke, tugende buli muntu akwate ogw'owabo. Mananukwo ekifubiro kyayo kihikire haiguru kyatembera kimu kyahika ha bicu.

¹⁰MUKAMA ayolekere nkooku tutaina kabi, tusubirre omurubuga Siyoni MUKAMA Ruhanga waitu eki yakozire.

¹¹Muteekere emisogi! Mukwate engabu! MUKAMA ataire omwoyo omu bakama b'Abameedi, habwokuba ekyategekere kukoraho Bbabbulooni nukwo kugihwerekereza habwokuba enu niyo enzigu MUKAMA ei arukuhoora, enzigu ei arukuhoora habw'enju ye.

¹²Musimbe ebendera ha bisiika bya Bbabbulooni; mulinde obutakoimya muteho abalinzi; muteekanize ebiikaro eby'okweserekamu; habwokuba MUKAMA eki yabalizeeho abasi ba Bbabbulooni, akitegekere kandi akikozire.

¹³Iwe anyakuherraine amaizi amaingi, ayatungire yatungurra, empero yawe ehikire, ehuuzo ey'obwomeezi bwawe esazirwe.

¹⁴MUKAMA ow'amahe akeerahira wenka ati: Mananukwo ndireeta abantu baingi nk'obuhihi bw'enzige baseesire Bbabbulooni, bagisingule.

¹⁵Ogu nuwe yakoleze ensi obusobozi bwe, nuwe yagigumize n'amagezi ge, nuwe yabambire iguru n'obwetegereza bwe.

¹⁶Obu agamba ekigambo, amaizi aga haiguru gahirra, aimukya ekiho ha mpero z'ensi. Nuwe aleeta emirabyo erukumanyisa enjura nkooku eri haihi, kandi nuwe aiha omuyaga omumaahurro ge.

¹⁷Abantu obubarora eki, baburwa amagezi kandi balemwa kwetegereza, buli muheesi ekisisani kye akozire kimukwasa ensoni, habwokuba ebisisani bye masa kwonka, by'okubiiha ebisuba, kandi tibiina rwoya rw'obwomeezi.

¹⁸Tibiina mugaso, bintu by'okubiiha ebisuba; akasumi kabyo ak'okufubirwa obu kalihika, biriborogota.

¹⁹Ogu omugabo gwa Yakobbo, tarukusisana nk'ebi, habwokuba nuwe yabumbire ebintu byona, kandi Isirairi nurwo oruganda orw'obugwetwa bwe, ibara lye nuwe MUKAMA ow'amahe.

²⁰“Niiwe nyondo yange kandi niiwe kintu kyange eky'okurwanisa obulemu: Niiwe nyekoonyeza kusasangura amahanga; niiwe nyekoonyeza kuhwerekereza amakama

²¹niiwe nyekoonyeza kusasangura embaraasi n'omutembi; Niiwe nyekoonyeza kusasangura ekigaali n'omutembi wakyo;

²²niiwe nyekoonyeza kusasangura omusaija n'omukazi; niiwe nyekoonyeza kusasangura omugurusi n'omusigazi; niiwe nyekoonyeza kussasangura omwojo n'omwisiki;

²³niiwe nyekoonyeza kusasangura omuliisa n'igana lye; niiwe nyekoonyeza kusasangura omulimi n'ebisoro bye ebi alimisa; niiwe nyekoonyeza kusasangura abalemi abakuru n'engabwa z'amahe.

²⁴“MUKAMA naagamba ati, Bbabbulooni n'abasi ba Kaludaaya, ndibasasura ebibi byona ebi baakozire, nainywe nimurora muti.

²⁵MUKAMA naagamba ati: Haa! Iwe rusozi iwe kahwerekereza, orunyakuhwerekereza ensi yoona ninyija kugorra omukono gwange nkukwate, nkukumbye nkwihe ha butwetwe omu myandara nkuzinge, nkufoole kisiiriiza ky'orusozi.

²⁶MUKAMA naagamba ati: “Toliihwaho ibaale ery'okuta omu karugu, kandi toliihwaho ibaale ery'omusingi, baitu oliikara oli itongo ery'ebiro n'ebiro.

²⁷“Musimbe ebendera omunsi, muteere engwara amahanga gahurre; muteekanize amahanga garwanise Bbabbulooni, mugyetere abakama ab'okugirwanisa: ow'Ararati, owa Miini n'ow'Asikenazi; mukome engabwa ey'okugirwanisa muleete embaraasi enyingi muno nk'obuhihi bw'enzige.

²⁸Muteekanize amahanga ag'okugirwanisa, abakama ab'Abameedi hamu n'abalemi baabu abakuru, hamu n'abasigwa baabu, n'ensi yoona ei barukulema.

²⁹Ensi neetekemera kandi neesaalirwa muno, habwokuba MUKAMA ekiyamaliriire kukoraho Bbabbulooni nukwo kiri, nukwo kugifoora itongo eritasobora kwikarwamu muntu.

³⁰Abaserikale ba Bbabbulooni balekiire aho kurwana, nibaikara omubigo byabo; amaani gabahoire bafookere bakazi, Amalembo g'orubuga gacwirwe, amaju garwo gookibwe.

³¹Matalisi nairuka kwitirana matalisi ondi omukwenda nairuka kwitirana omukwenda ondi, bagambire omukama wa Bbabbulooni, orubuga rwe nkooku ruhambirwe ha mbaju zoona;

³²Amambukiro nkooku gakwasirwe, engo nkooku zookiibwe n'omurro, kandi abaserikale obutiini nkooku buraaliire kubaita.

³³Habwokuba MUKAMA ow'amahe Ruhanga owa Isirairi naagamba ati: Abantu ba Bbabbulooni nibasisana nk'orubuga orunyakuhulirwaho obu ruba nirurubaatirwa; hasigaire akacu kake, akasumi karwo ak'igesa kahike.”

³⁴“Nebbukadaneeza omukama wa Bbabbulooni anjunjubwire, amberengwiire anfoire kikopo ekitarumu kantu, ammizire, waizikya nkooku amira; ebirungi byange nibyo ayeyiigusize, anyehuugire.

³⁵Omusi wa Siyoni naakagambe ati: obubi obu nakozirwe n'obwakozirwe ab'oruganda rwange, niibukagarukeho Bbabbulooni;” Yerusaalemu neekagambe eti: “Esagama yange neekajunanwe abasi ba Kalidaaya.”

³⁶MUKAMA nikyo arukugambira ati: “Nditongana omusango gwawe, kandi ndikuhorra enzigu enyanja n'ensoro ye ndibyomeza kimu;

³⁷Bbabbulooni erifooka ntuumo y'ebikamburro, bwikaro bw'eboha, eriba kintu eky'okutiinwa kandi eky'okugaywa, teriikarwamu muntu.

³⁸“Ababbabbulooni balibbuukurra hamu nk'entale; baliturruma nk'ensole z'entale.

³⁹MUKAMA naagamba ati: “Obu baliba babiihiirwe, ndibakorra obugenyi, mbatamiize okuhika obu balitandika kuhungira, bakabyama obutasisiimuka.

⁴⁰Ndibatwara omu ibaagiro nk'ebyana by'entaama, nk'empaya z'entaama n'emburabuzi.

⁴¹MUKAMA naabazaaho Bbabbulooni ati: “Orubuga orunyakuhaisanizibwa Ensi yoona ruhambirwe! Omu mahanga goona, Bbabbulooni rufookere kintu eky'okwekanga.

⁴²Enyanja eboogiire Bbabbulooni; ebigonzi byayo ebirukuhirra bigibutikiire.

⁴³Embuga zaayo zifookere kintu ekyekangwa, ensi ey'ekyanda kandi itongo, ey'etasobora kwikarwamu muntu, kandi ey'etasobora kurabwamu omwana w'omuntu.

⁴⁴Beeri owa Bbabbulooni ninyija kumufubira, mmulengule mmutanakye ebi yamizire. Amahanga tigaligaruka kumweseesaho; Ekisiika kya Bbabbulooni kigwire.

⁴⁵“Inywe bantu bange, mururugemu! Buli muntu ajune obwomeezi bwe, abutabule ekiniga kya MUKAMA ekibi!

⁴⁶Engambo ezi murukuhurra, zireke kubaterebura n'okubatiinisa. Buli mwaka, hahulirwa orugambo orutarukusisana orundi. Engambo ez'ebintu ebibi eby'obuhoogozi ebirukukorwa omunsi, n'engambo ezirukugamba ngu: omukama omu naarwanisa omukama ondi.

⁴⁷“Habweki, lero hati, ebiro ebi ndifubirraho ebisisani by'embandwa za Bbabbulooni bihikire; ensi yayo yoona eriswazibwa, emitumbi y'abantu baayo yoona erigarangatana hagati yayo.

⁴⁸MUKAMA naagamba ati, hanyuma iguru n'ensi na byona ebinyakubirumu, nubwo birizina n'omuhimbo nibyebugira Bbabbulooni, habwokuba abantu ab'okugihwerekereza, baliruga ha matemba baije bagirwanise.

⁴⁹Bbabbulooni nkooku yaisize abantu omunsi yoona, hati habw'abantu abaingi muno abayaisize omu Isirairi runu nurwo rubu rwayo, nayo egwe.

⁵⁰“Inywe abaatabukire empirima, mugende mutaikara aho! Mweme hara oku nambere muli, mwijuke MUKAMA, kandi muteekerezeeho Yerusaalemu; nimugamba muti:

⁵¹‘Tuswaire kandi tuhemukire, tusobiirwe muno, habwokuba abanyamahanga batwaire ebiikaro ebirukwera eby'omunju ya Ruhanga.’

⁵²“Habweki MUKAMA naagamba ati: Akasumi aka ndicwerraho omusango abacwezi ba Bbabbulooni, kalihika, kandi emputa zoona ez'omunsi egi, zirisinda.

⁵³MUKAMA naagamba ati: Babbulooni noobu yakwereera ekahika haiguru, ekigo kyayo noobu yaakukigumya eta, nabwo ninkyasobora kutuma abantu ab'okugihwerekereza.

⁵⁴“Muhurre etoko enyakuli Bbabbulooni! Akoogo ak'okuhwerekerra okutagambwa akanyakuli omunsi y'Abakalidaaya!

⁵⁵Ogu ni MUKAMA, nuwe arukufoora Bbabbulooni itongo, kandi nuwe arukuculeeza obwogo bwayo obuhinguraine. Amahe nigarurumuka nk'ebigonzi ebirukuhirra, kandi nigaseesa n'etoko etagambwa.

⁵⁶Omuhwerekereza aseesiire Bbabbulooni; abaserikale baayo bakwasirwe amata gaabo gacwacwainwe; habwokuba MUKAMA nuwe Ruhanga omusasuzi, mananukwo alisasura nkooku kisemeriire.

⁵⁷Omukama anyakwetwa MUKAMA ow'amahe naagamba ati, abanyoro baayo n'abantu baayo abanyamagezi, abalemi baayo abakuru, engabwa n'abaserikale, ndibatamiiza; bagwijagire oturo otw'ebiro n'ebiro obutasisiimuka.

⁵⁸“MUKAMA ow'amahe naagamba ati: Ekisiika kya Bbabbulooni ekikooto kiriseeswa kisendwe kingananganire kimu n'itaka, kandi amalembo gaayo agaraihire, galyokebwa n'omurro. Abantu bejwahiza busa, kandi amahanga gatalibanira kwokebwa omurro kwonka.”

⁵⁹Yeremiya omurangi obuyagenzire Bbabbulooni na Zedekiya omukama wa Yuda omu mwaka ogw'akana ogw'engoma ye, kinu nikyo ekigambo eki yaragiire Seraaya mutabani wa Neriya mwijukuru wa Maaseya, Seraaya ogu nuwe yarolerraga ebintu eby'ihe.

⁶⁰Akabi koona akakaba nikaija kugwera Bbabbulooni, ebigambo byona ebyahandiikirwe ebirukubazaaho Bbabbulooni Yeremiya akabihandiika omukitabu.

⁶¹Yeremiya nukwo kugambira Seraaya ati: “Obu oraahika Bbabbulooni, oteho omutima kusoma ebigambo binu byona,

⁶²kandi ogambe oti, ‘Ai MUKAMA iwe wenka, niiwe warangiriire ekiikaro kinu nkooku kirihwerekerezibwa, kandi nkooku kitaligaruka kwikarwamu muntu, rundi kisoro, kandi nkooku kiriikara kiri itongo ebiro byona.’

⁶³Obu olimara kusomera abantu ekitabu kinu, okiboheho ibaale, okinage omu kisaaru Efuraate,

⁶⁴kandi ogambe oti, ‘habw'akabi aka ndukwija kuleetera Bbabbulooni, nukwo eridikira eti, okutagaruka kwiburruka.’” Aho ebigambo bya Yeremiya nuho byahwereriire.