Read Runyoro - rutooro Yer 52 Bible Online

Yer 52 - Runyoro - rutooro bible

Yer 52

¹Zedekiya kuteera engoma akaba ahikize emyaka abiri na gumu; akalemera omurubuga Yerusaalemu okumara emyaka ikumi na gumu. Ibara lya nyina, nuwe Hamutaali muhara wa Yeremiya owa Libuna.

²Akakora ebyabiihiize MUKAMA, nka Yehoyakimu oku yakozire.

³Mazimakwo, habw'ekiniga kya MUKAMA, omu rubuga Yerusaalemu na Yuda, hakabayo ebintu ebibi, MUKAMA nukwo kubabinga baruge omumaiso ge. Kandi Zedekiya akeemera omukama wa Bbabbulooni.

⁴Omu mwaka ogwa mwenda ogw'engoma ye, ha kiro ekya ikumi eky'okwezi kwa ikumi, Nebbukadaneeza omukama wa Bbabbulooni, akaseesa n'ihe rye lyona arwanise Yerusaalemu, baateera orukande aheeru y'orubuga, baarwombekaho ebisiika eby'okurugota baarwehinguliriza,

⁵baikara barugosire, okuhika omu mwaka ogwa ikumi na gumu ogw'engoma ya Zedekiya.

⁶Ha kiro ekya mwenda eky'omukwezi kwa kana, kiihe ekaba y'amaani muno omu rubuga, abantu ab'omunsi egi, nukwo kuburwa ebyokulya.

⁷Nubwo baadubwire ekihuru omu rubuga; ekiro, abasaija boona abarwani, bairuka baaruga omurubuga, batwarwa omuhanda ogw'irembo, ogukaba guli hagati y'ebisiika ebibiri, haihi n'omusiri gw'omukama, omu kasumi ako, Abakalidaaya bakaba bagosire orubuga. Banu baatoma habukiizi bw'Araba.

⁸Baitu ihe ry'Abakalidaaya lyakuraatira omukama Zedekiya lyamukwatira omu byeya bya Yeriko; ihe rye lyona, lyararanga lyamurugaho.

⁹Nubwo baamukwasire, baamuleetera omukama wa Bbabbulooni, baamumusangisa Ribula omunsi ya Hanasi, yamucwera omusango.

¹⁰Omukama wa Bbabbulooni, yaita batabani ba Zedekiya, isebo naarora ati kandi yaita n'abanyoro ba Yuda boona, yabanaga Ribula.

¹¹Zedekiya yamwihamu amaiso, yamutaho empinga, yamutwara Bbabbulooni, yamuta omu nkomo, yagiikaramu okuhika okufa kwe.

¹²Omu kwezi kwa kataano hakiro ekya ikumi eky'okwezi, omukama Nebbukadaneeza omukama wa Bbabbulooni eki yahikiizeeho emyaka ikumi na mwenda, Nebuzaradaani engabwa y'abaserikale abalinzi ayaheerezaaga omukama wa Bbabbulooni, nubwo yataahire Yerusaalemu.

¹³Yayokya enju ya MUKAMA, ne y'omukama, n'amaju goona aga Yerusaalemu; buli nju yoona ey'ekitiinisa akagyokya.

¹⁴Ihe ly'Abakalidaaya lyona abakaba bali hamu n'engabwa y'abalinzi, baaseesa ebisiika byona ebikaba byehinguliriize Yerusaalemu.

¹⁵Nebuzaradaani engabwa y'abalinzi, yatwara abanyagwa, abamu abarukukirra kimu obunaku ha bantu boona, n'abantu abandi abasigaireho abakaba balekerwe omu rubuga, n'abasingwa abakaba basingiirwe hali omukama wa Bbabbulooni, hamu n'abaasigaireho ha bantu abafundi.

¹⁶Abamu ha bantu abarukukirra kimu obunaku ha bantu ab'omunsi egi, yabaleka banogorrege emizabbibbu kandi balimege.

¹⁷Enyomyo ez'omulinga ezikaba ziri omunju ya MUKAMA, entebe, n'etanka ey'omulinga, Abakalidaaya bakabicwacwana, omulinga gwona baagutwara Bbabbulooni.

¹⁸Kandi batwara ebinaga, ebitiyo, makaasi, ebbeseni, encuba ez'okukwatiraho obubbaani, n'ebikwato by'omulinga byona, ebyayekonyezibwaga ha mulimo ogw'omunju ya MUKAMA;

¹⁹baataho n'ebbakuli entoito, esahaani ez'okuguhiraho omurro, ebbeseni, enyungu, ebikondo by'etaara, encuba ez'okukwatiraho obubbaani, n'ebbakuli ez'ekihongwa eky'ekyokunywa, ebintu byona, eby'ezaabbu n'eby'efeeza.

²⁰Enyomyo ibiri, etanka emu, enimi ikumi na ibiri ez'omulinga ezikaba zihangiize etanka, entebe omukama Solomooni ezi akaba akoliire Enju ya MUKAMA, omulinga gw'ebi byona, gukaba gutarukusobora kulengwa.

²¹Ebirukukwata ha nyomyo, oburaiha bw'enyomyo emu, yahikyaga mita munaana, okugyehinguliriza nka mita itaano, kandi omukoba gwayo sentimita emu, omunda etarumu kantu.

²²Ha mutwe gwayo, hakaba haroho ekikopo eky'omulinga; oburaiha bw'ekikopo kimu, kyahikyaga mita nka ibiri; ha kikopo eki kyona okukyehinguliriza, hakaba haroho ekintu ekirukusisana akatimba n'amakomamahanga, byona by'omulinga. Enyomyo ey'akabiri, nayo nukwo ekaba neesisana eti, eroho amakomamahanga.

²³Hambaju hakaba haroho amakomahanga kyenda na mukaaga; amakomamahanga goona agakaba gali ha kintu eki, ekirukusisana akatimba okukyehinguliriza, gakaba gali kikumi.

²⁴Engabwa y'abalinzi, ekatwara Seraaya nyakatagara omukuru, Zefaniya owa kabiri hali ogu, n'abalinzi abasatu ab'omulyango.

²⁵Kandi omurubuga akaihamu omunyoro engabwa y'abasaija, n'abasaija musanju abaasangirwe omu rubuga, abaikarraga omu rukurato rw'omukama; omuhandiiki ow'ebyensita ow'engabwa y'ihe ayasoroozaaga abantu ab'ensi egi; n'abantu nkaaga ab'ensi egi abaasangirwe omurubuga.

²⁶Nebuzaradaani engabwa y'abalinzi, yabakwata yabatwarra omukama wa Bbabbulooni yabamusangisa Ribula.

²⁷Omu kiikaro eki, Ribula omunsi Hanasi, omukama wa Bbabbulooni nuho yabatemiire yabaita. Abantu ba Yuda, nukwo baihirwe bati omunsi yabu, batwarwa bali banyagwa.

²⁸Gunu nugwo omuhendo gw'abantu, Nebbukadaneeza aba yatwaire bali banyagwa: Omu mwaka ogwa musanju, akatwara Abayudaaya enkumi isatu, abiri na basatu;

²⁹omu mwaka ogwa ikumi na munaana, Yerusaalemu akaihayo abanyagwa abanyankomo runaana mu asatu na babiri;

³⁰omu mwaka ogw'amakumi abiri n'esatu, ogwa Nebbukadaneeza, Nebuzaradaani engabwa y'abalinzi akatwara Abayudaaya abanyagwa rusanju mu ana na bataano; abantu boona bakahika enkumi ina n'orukaaga.

³¹Baitu omu mwaka ogw'amakumi asatu na musanju, Yehoyakini omukama wa Yuda ogu yazaahisiizibwemu, omu kwezi kwa ikumi n'abiri, ha kiro eky'amakumi abiri na bitaano, omwaka Evirimerodaki omukama wa Bbabbulooni ogu yateeriiremu engoma, akaganyira Yehoyakini, yamwiha omu nkomo.

³²Akamukorra ebirungi, yamuha ekiikaro eky'ekitiinisa ekirukukira eky'abakama abandi abakaba azaahisiibwe nabo Bbabbulooni.

³³Yehoyakini nukwo kujuura ebyokujwara bye ebi yajwaraga ali omunkomo. Kandi obwomeezi bwe bwona, obutoosa yalyaga ha meeza y'omukama.

³⁴Obwomeezi bwe bwona okuhika obu yafiire omukama yamuhaga obukoonyezi naarorra ha byetaago bye ebya buli kiro.