Read Runyoro - rutooro Yer 6 Bible Online

Yer 6 - Runyoro - rutooro bible

Yer 6

¹Inywe abantu ba Benyamiini, mwiruke mwejune muruge omu rubuga Yerusaalemu! Muterre engwara omu rubuga Tekowa, musimbe ebendera omu rubuga Besihaka-Keremu; habwokuba akabi n'okuhwerekerra okutagambwa, nibiija kuruga ha bukiizi obw'emoso.

²Muhara wa Ziyoni burungi butoonya kandi ayayoroirwe kurungi, ninyija kumuhwerekereza.

³Abaliisa abaina amagana gaabo balimuhikaho, baliteera eheema zaabu bamwehingulirize, buli omu aliriisiza nambere arukwenda.

⁴Mweteekanize mumurwanise; mwimuke, tumuseesire omu ihangwe!” Nibaija kugamba bati “Amahano gaagwa, obwire bwalenga, kutagirwa bwizire, ebiituuru eby'orwebagyo nibyeyongera kuraiha.”

⁵“Mwimuke tubaseesire ekiro, ebikaali byabo tubihwerekereze!”

⁶Habwokuba MUKAMA ow'amahe naagamba ati: emiti ye mugiteme, mutuume entuumo ey'itaka mwehingulirize Yerusaalemu. Runu nurwo orubuga orusemeriire kufubirwa; omu rubuga orumu, tiharumu kintu kindi, okwihaho kubonabonesibwa.

⁷Iziba nkooku liikarwamu amaizi amarungi, Yerusaalemu narwo nukwo rubikira obubi bwarwo. Okutwaza embanda n'okuhwerekereza nibyo bihulirwamu; oburwaire n'ebihuta nibyo nyikara nindora.

⁸Yerusaalemu ohabuke, ntaikara kukurugaho; nkakufoora itongo eritasobora kwikarwamu muntu.

⁹MUKAMA ow'amahe naagamba ati: “Isirairi alisingolererwa kimu nk'omusiri gw'emizabbibbu ogunyakunogiirwemu kimu ebijuma. Hati akasumi obu kakyaikaire, kibasemeriire mutabule boona aba murukusobora.”

¹⁰Nibaha aba ndaagambira nkabahabura bakahurra? Amatu gaabo gaigaire, tibasobora kuhurra; ekigambo kya MUKAMA, hali bo kintu ky'okugaya, tibarukukigonza.

¹¹MUKAMA ekiniga wabakwatiirwe, na nyowe nikyo nabakwatiirwe; tinsobora kwongera kukigumiisiriza. Kimarreho abaana abanyakuli omu makuute, na ha bitebe by'abasigazi; abasaija n'abakazi baabu banyagwe, oteho abantu abakuru n'abagundagunzire

¹²MUKAMA naagamba ati Amaju gaabo gaheebwe abantu abandi, oteho emisiri na bakazi baabu; habwokuba, ndigorra omukono gwange, ndwanise abantu abasi b'ensi egi.

¹³“Habwokuba, okurugirra h'arukukirra kimu okuba wa hansi okugarukira h'arukukirra kimu ekitiinisa boona batubiire ebintu ebitali by'obwinganiza; abarangi na banyakatagara, boona beehaire ebisuba.

¹⁴Abantu bange obuhuta babubatambiire muswekera, nibagamba bati: ‘Haroho obusinge! Haroho obusinge!’ Kandi kunu obusinge tiburoho.

¹⁵Obu baakozire ebintu ebibi ebi bakakwatwa ensoni? Kukwatwa ensoni? Batali nka bo! MUKAMA naagamba ati, Akasumi ak'okubakoraho obu kalihika, nk'abandi oku bagwa, nabo nukwo baligwa.”

¹⁶MUKAMA naagamba ati: “Mwemerre nguudo rubaju mumagamage, mukaguze babooleke obuhanda obukuru, nambere hali omuhanda omurungi; nugwo mutome, emyogo yanyu nukwo etunge ekihuumuro. Baitu bakagarukamu bati: ‘Ogu titwagutome.’

¹⁷Nkabateeraho abalinzi ningamba nti: ‘Mutege amatu muhurre iraka ly'engwara!’ Baitu baagarukamu bati ‘Titurukwija kutega amatu.’

¹⁸Habweki, inywe amahanga muhurre, na iwe ekitebe ky'abantu, omanye ekirigwera abantu abo.

¹⁹Iwe ensi ohurre, abantu banu ninyija kubaleetera akabi. Eki nikyo kirukuleetwa kuruga ha kwikiriza kwabo. Habwokuba batate omutima ha bigambo byange; kandi bakanga ebiragiro byange.

²⁰Kiki ekirukugendererwa, kundeetera obubbani obwa Seeba, rundi kundeetera ebikaka eby'ensi eya hara? Ebihongwa byanyu ebyokeze tibirukwiikirizibwa, kandi ebyonzira byanyu tibirukunsemereza.

²¹MUKAMA nikyo arukugambira ati: ‘Nditega abantu abo enkonge eziribateera baatabaijuke; baise baana n'abaana baabu, omutaahi na munywani we, boona balihwerekerra.’”

²²MUKAMA naagamba ati: “Nihaija ihanga erirukuruga omunsi eya ha bukiizi obw'emoso, ihanga ery'ekitiinisa niriruga omu bicweka eby'ensi ebya hara muno.

²³Bakwasire obuta n'amacumu, bantu abataina mbabazi kandi abataganyira, iraka lyabo nirisisana nk'okuhirra kw'enyanja; batembere embaraasi, bajwaire nk'abantu abarukugenda ha bulemu, kurwanisa iwe muhara wa Ziyoni!”

²⁴Eki tukakihurraho, emikono yaitu yateba, obujune bwayenda kutwita, twarumwa nk'omukazi arukurumwa ebisa eby'okuzaara.

²⁵Mutagenda omu misiri, kandi mutarubata omu nguudo; habwokuba abanyanzigwa baina empirima, hoona hoona, obutiini otagamba.

²⁶Iwe muhara w'abantu bange, jwara ebitengo kandi oyekumbye omu iju; oteere empamo nk'anyakufeeriirwe omwana omwojo omu wenka ou wazaire, oteeremu kimu ekyoboobo; habwokuba omuhwerekereza naija kutuseesira tutamweteekaniize.

²⁷Nkakusoroora oyetegereze kandi olengese abantu bange, nukwo omanye kandi oyetegereze engeso zaabu.

²⁸Boona beemi engumangani, bateera ebismba n'abageyi; nibaguma dai nk'omulinga n'ekyoma, boona bakora ebitali by'amazima.

²⁹Emijuba neejuguta n'amaani, isasi omurro nigulisiriiza okweyongera kusemeza, kwa busa, habwokuba ababi tibarugamu.

³⁰Baraayetwaga feeza ey'ebyenga, habwokuba MUKAMA abangire.