Read Runyoro - rutooro Yer 8 Bible Online

Yer 8 - Runyoro - rutooro bible

Yer 8

¹“MUKAMA naagamba ati: Omu kasumi ako, amagufa ag'abakama ba Yuda, ag'abanyoro, aga banyakatagara, ag'abarangi n'ag'abasi aba Yerusaalemu, galiziikurwa omu bituuro byabo;

²gaalirwe omumaiso g'izooba, ag'okwezi, n'ag'ebintu byona eby'omumwanya ebi baagonzaaga kandi ebi baaherezaaga, ebi baahonderaga, ebi baaserraga kandi ebi baaramyaga; amagufa ago tigalisoroozibwa kandi tigaliziikwa; galiba nk'obusa obunagirwa ha rubungo.

³MUKAMA ow'amahe naagamba ati: abaliba basigaireho ha ruganda oru orubi, omu biikaro byona ebi ndiba mbabingiiremu, balyegomba orufu okukira obwomeezi.

⁴“Olibakaguza oti, Abantu obu bagwa, tibagaruka bakaimuka? Omuntu obu ahaba, tagaruka?

⁵Baitu kiki ekyahabisize abantu banu, bakaikarra kimu enyuma nambere baahabiire? Bagumiire omu bisuba, nibanga kugaruka.

⁶Ntegere amatu ntaireho omutima, baitu tibabalize ebyobulyo. Tiharoho muntu n'omu arukuzira ebibi bye, akeekaguza ati, ‘Kinu nkozire ki?’ Buli muntu naayekwatira omuhanda gwe, nk'embaraasi erukwiruka neegenda ha bulemu.

⁷Noobwakubaire ekidongodongo eky'omu mwanya kimanyire akasumi kakyo; eriiba, entaahi n'entuuha, bimanyire akasumi aka bigarukiramu; baitu abantu bange tibamanyire kiragiro kya MUKAMA.

⁸Musobora muta kugamba muti, ‘Tuli banyamagezi kandi ngu tumanyire Ebiragiro bya MUKAMA’? Ekalamu ez'ebisuba ez'abahandiiki, zikabifoora bisuba.

⁹Abantu abanyamagezi baliswazibwa, balicwekwa enkizi bakwatwe; mahano! Bakanga ekigambo kya MUKAMA, kandi obu baina magezi ki?

¹⁰Bakazi baabu, nikyo ndibaheera abasaija abandi, kandi emisiri yabu ngihe abasinguzi, habwokuba okurugirra ha muntu arukukirra kimu kuba hansi okugarukira h'arukukirra kimu boona ekitiinisa, boona batuubiire ebintu ebitali by'obwinganiza; abarangi na banyakatagara, boona boona ncwangya.

¹¹Abantu bange obuhuta, babubatambiire muswekera nibagamba bati: ‘Haroho obusinge haroho obusinge!’ Kandi kunu obusinge tiburoho.

¹²Obu baakozire ekibi, bakakwatwa ensoni? Nangwa, batakwatwe nsoni naakake konka; kukwatwa ensoni? Batali nkabo! MUKAMA naagamba ati, “Akasumi ak'okubakoraho obukalihika, nk'abandi okubagwa nabo nukwo baligwa.

¹³MUKAMA naagamba ati, obu ndibasorooza ha miti y'emizabbibbu n'emitini, tihalibaho bijuma; noobwakubaire ebikoora birihotoka, kandi ebi nabahaire bibarugireho.”

¹⁴Habwaki twikara hanu twikaliire? Mwesorooze tugende omu mbuga ezigumire nuho tugwe; habwokuba MUKAMA Ruhanga waitu atucweriire omusango ogw'okuhwerekerra, kandi atuhaire amaizi agarumu obutwa nugo tunywe, habwokuba tukamusiisira.

¹⁵Tukaserra obusinge, hatabeho karungi na kamu, akasumi ak'okutambirwa, eby'okukanga nibyo byabaireho.

¹⁶“Embaraasi zaabu nkooku zirukufuukeera, nizihulirirwa Daani; embaraasi zaabu enimi obu zirukwamuza, ensi yoona etengeeta. Baija bahwerekereza ensi na byona ebinyakugirumu, orubuga n'abantu abanyakurumu.

¹⁷MUKAMA naagamba ati, ninyija kubatwekera enjoka, Empoma ezitasobora kurumurwa, nizo zibateme.”

¹⁸Obujune bwange tibusobora kutambwa, omutima niguruhirra.

¹⁹Hurra okurra kwa muhara w'abantu bange, nikuruga hara kandi nikuruga ha mbaju zona ez'ensi, naagamba ati: “Omu rubuga Ziyoni, MUKAMA tataahamu? Omukama warwo tarurumu?” MUKAMA omukama wabo yagarukamu ati: “Habwaki mwambiihiize, nimuramya ebisisani by'embandwa zanyu, kandi nimwinamira embandwa zanyu ezamahanga ezitaina mugaso?”

²⁰“Igesa lihingwiire, akasumi ak'ekyanda kahoireho, baitu titujunirwe.”

²¹Obundukurora obuhuta bwa muhara w'abantu bange, na nyowe omutima gwange guhutaara ningenda nindira, nyetuntwiire.

²²Omu rubuga Giryadi, busamu mubazi? Tihaliyo mufumu? Ebi obu biraaba biriyo habwaki, muhara w'abantu bange atatambiirwe?